Левилар 6:1–30
6 Яҳова Мусога яна қуйидагиларни айтди:
2 «Борди-ю, кимдир Яҳовага нисбатан бевафолик қилиб+, унга ишониб топширилган ёки гаров сифатида берилган ёки ўғирлаган нарсаси ҳақида яқинига ёлғон гапирса ёки уни алдаса+
3 ёки йўқолган бирон нарсани топиб олиб, у ҳақда ёлғон гапирса ва бу каби гуноҳ ишларни қилмаганликда ёлғондан қасам ичса+,
4 у гуноҳ қилган бўлиб, айбдор ҳисобланади. Шу боис, у ўғирлаган ёки дўқ-пўписа ё алдов йўли билан тортиб олган ёки унга ишониб топширилган ёки топиб олган нарсани эгасига қайтариб берсин.
5 Агар у фойда кўриш ниятида бировнинг нарсаси борасида ёлғондан қасам ичган бўлса, унда келтирилган зиённинг ўрнини тўлдириб+, у қанчага баҳоланса, ўша баҳонинг бешдан бир қисмини устига қўшиб берсин. Унинг айби очилган куни ўша нарсани эгасига қайтариб берсин.
6 Кейин белгиланган баҳога биноан, сурувидан нуқсонсиз бир қўчқорни Яҳовага атаб олиб келсин. Уни айб қурбонлиги сифатида руҳонийга берсин+.
7 Руҳоний Яҳованинг олдида унинг гуноҳини ювсин ва у қайси қилмишда айбдор бўлишига қарамай, унинг гуноҳи кечирилади»+.
8 Яҳова сўзида давом этиб, Мусога деди:
9 «Ҳорун билан ўғилларига шундай қилишни буюр: “Куйдириладиган қурбонлик ҳақидаги қонун қуйидагичадир+: куйдириладиган қурбонлик кечаси билан, эрталабгача қурбонгоҳ ичидаги олов устида қолиши ва қурбонгоҳдаги олов ёниб туриши лозим.
10 Руҳоний хизмат пайтида кийиладиган зиғир матосидан тикилган кўйлагини+ ва уятли жойларини ёпиш учун зиғир матоли иштонини* кийсин+. Сўнг қурбонгоҳдаги ёниб бўлган куйдириладиган қурбонликнинг кулини олиб+, қурбонгоҳнинг ёнига қўйсин.
11 Кейин эса бу кийимини ечиб+, бошқа кийимини кийсин ва кулни қароргоҳнинг ташқарисидаги тоза жойга олиб чиқсин+.
12 Қурбонгоҳдаги олов ўчмай, ёниб турсин. Руҳоний ҳар куни эрталаб унга ўтин солиб+, устига куйдириладиган қурбонликни қўйсин ва қурбонгоҳ устида тинчлик қурбонликларининг ёғини куйдирсин+.
13 Қурбонгоҳдаги олов ўчмай, доим ёниб турсин.
14 Дон назри тўғрисидаги қонун эса қуйидагичадир+: Ҳоруннинг ўғиллари уни олиб келиб, Яҳованинг ҳузурига, қурбонгоҳ олдига қўйишсин.
15 Улардан бири дон назри сифатида олиб келинган олий навли уннинг бир ҳовучини, оз-моз мойни ва дон назри устидаги хушбўй смоланинг ҳаммасини олиб, қурбонгоҳдан тутун кўтарилиши учун куйдирсин. Бу — Яҳова учун хуш ҳидли рамз назри+.
16 Дон назрининг ортиб қолганини Ҳорун ва унинг ўғиллари ейишсин+. Улар ундан хамиртурушсиз нон пишириб, уни муқаддас жойда, учрашув чодирининг ҳовлисида ейишсин+.
17 У хамиртуруш қўшилмай пиширилсин+. Буни уларга, Менга атаб оловда куйдириладиган дон назридан улуш сифатида бердим+. Бу, гуноҳ қурбонлиги ва айб қурбонлиги сингари ўта муқаддасдир+.
18 Уни Ҳоруннинг авлодидан бўлган барча эркаклар ейишсин+. Бу — Яҳовага аталган куйдириладиган назрдан авлодларингиз оша, асрлар бўйи сизларга тегадиган улуш бўлади+. Бу назрларга теккан ҳамма нарса муқаддас бўлади”».
19 Кейин Яҳова Мусога шуларни айтди:
20 «Мойланадиган куни+, Ҳорун билан ўғиллари Яҳовага қуйидаги назрни келтиришсин: мунтазам дон назри сифатида+ келтирилганидай олий навли ундан эфанинг*+ ўндан бир қисмини олиб, унинг ярмини эрталаб, қолган ярмини эса кечқурун олиб келишсин.
21 Унга мой қўшиб, товада пиширилсин+. У мой билан яхшилаб аралаштирилган бўлсин ва уни пиширилган дон назри сифатида бўлак-бўлак қилиб синдириб, Яҳовага аталган хуш ҳидли назр сифатида олиб келинсин.
22 Бу назрни Ҳоруннинг ўрнига руҳоний этиб мойланадиган ўғли ҳам олиб келсин+. Яҳовага аталган ушбу назр бутунлайин куйдирилсин. Бу, асрлар оша амал қилинадиган қоидадир.
23 Руҳоний олиб келадиган ҳар қандай дон назри бутунлайин куйдирилсин. У ейилмасин».
24 Яҳова Мусога яна қуйидагиларни айтди:
25 «Ҳорун билан ўғилларига шундай деб айт: “Гуноҳ қурбонлиги борасидаги қонун мана бундай+: гуноҳ қурбонлиги куйдириладиган қурбонлик сўйиладиган жойда+, Яҳованинг олдида сўйилсин. У ғоят муқаддасдир.
26 Уни гуноҳ қурбонлигини келтирган руҳоний муқаддас жойда, учрашув чодирининг ҳовлисида+ есин+.
27 Бу қурбонликнинг гўштига теккан ҳар қандай нарса муқаддас бўлиб қолади. Агар унинг қони кимнингдир кийимига сачраб кетса, қон сачраган кийимини муқаддас жойда ювсин.
28 Бу қурбонлик қайнатилган сопол идиш синдирилсин. Борди-ю, у мис идишда қайнатилган бўлса, бу идиш тозаланиб, сув билан ювилсин.
29 Қурбонликнинг гўштини руҳоний бўлган эркакларнинг ҳаммаси есин+. У ғоят муқаддасдир+.
30 Лекин гуноҳни ювиш мақсадида қони муқаддас жойга, учрашув чодирига олиб кирилса, гуноҳ қурбонлигини еб бўлмайди+. У оловда куйдирилиши даркор.