Саҳрода 24:1–25
24 Исроилни дуо қилиб, Яҳовани мамнун этганини тушунгач, Балом ёмон белгиларни изламай қўйди+. У юзини саҳро томонга бурди.
2 Балом бошини кўтариб, қабилалари бўйича чодир қурган Исроил ўғилларини кўрди+. Шунда Аллоҳнинг руҳи унинг устига тушди+.
3 Кейин у шундай деб гап бошлади+:
«Бавўр ўғли Баломнинг,Кўзлари очиқ кишининг гапларини,
4 Худонинг сўзларини эшитган кишининг,Кўзлари очиқ ҳолда ерга мук тушганда,Қодир Тангридан келган ваҳийни кўрган кишининг гаплари+:
5 Эй Ёқуб, чодирларинг нақадар гўзал,Маконинг қанчалар чиройлидир, эй Исроил!+
6 Водийлар каби,Дарё бўйидаги боғлар сингари,Яҳова ўтқазган алоэ каби,Сувлар бўйидаги кедр дарахти сингари улар кенг ёйилган+.
7 Унинг иккита челагидан сув оқиб турар,Унинг уруғи* кўп сувлар бўйига экилар+,
Унинг шоҳи+ Ўгахдан ҳам буюкроқ бўлар+,Унинг шоҳлиги мустаҳкам ўрнатилар+.
8 Худо уларни Мисрдан олиб чиқди.У улар учун ёввойи буқанинг шохлари кабидир.
У халқларни, зулм ўтказувчиларни ютиб юборар+,Уларнинг суякларини ғажиб ташлар, ўқларини синдирар.
9 У ётиб олди, арслон сингари ерга чўзилди,У шер кабидир, ким ҳам уни ўрнидан қўзғата олар?!
Сени дуо қилганлар барака топар,Сени лаънатлаганларга лаънат айтилар»+.
10 Шунда Болоқнинг Баломга ғазаби қайнаб кетди. Болоқ нафрат билан кафтини кафтига урди-да, Баломга шундай деди: «Душманларимга лаънат айтгин деб сени чақиртирган эдим+, сен бўлсанг уларни уч марта дуо қилишдан бўлак ҳеч нима қилганинг йўқ.
11 Ҳозироқ уйингга жўна! Мен сенга иззат-икром кўрсатмоқчи эдим+. Лекин Яҳова сени шарафдан маҳрум қилди».
12 Балом Болоққа жавобан: «Мен сиз юборган хабарчиларга:
13 “Болоқ кумушу олтинга тўла уйини менга берса ҳам, мен Яҳованинг амридан четга чиқиб, ўз хоҳишимча* на яхши, на ёмон иш қила оламан. Яҳова айтган сўзларнигина гапираман”+,— демаганмидим?
14 Майли, мен ўз халқимнинг олдига қайтиб кетаман. Бироқ аввал, бу халқ келажакда* сизнинг халқингизга нималар қилишини айтиб берай».
15 У шундай деб гап бошлади+:
«Бавўр ўғли Баломнинг,Кўзлари очиқ кишининг гапларини+,
16 Худонинг сўзларини эшитган кишининг,Аллоҳ Таолодан билим олган,Кўзлари очиқ ҳолда ерга мук тушганда,Қодир Тангридан келган ваҳийни кўрган кишининг гаплари:
17 Мен уни кўраман, аммо ҳозир эмас,Мен уни кўраман, бироқ яқин орада эмас.
Ёқубдан бир юлдуз чиқар+,Исроилдан салтанат ҳассаси+ кўтарилар+,
У Мўабнинг пешонасини*+,Жанговар ўғилларининг бош суягини парчалар.
18 Исроил ўз жасоратини намоён этганда,Эдом унинг мулкига айланар+,Ҳа, Сеир+ ўз душманларининг мулки бўлар+,
19 Ёқубдан забт этувчи чиқар+,Шаҳарда омон қолганларни яксон этар».
20 У Омолекни кўриб, гапини шундай давом эттирди:
«Омолек халқларнинг биринчиси эди+,Аммо у охир-оқибат қирилиб кетар»+.
21 Кейин у хайинийларни+ кўриб, гапини шундай давом эттирди:
«Сенинг турар жойинг мустаҳкамдир, у уяга ўхшаб қояга қурилгандир.
22 Бироқ Қайинни* куйдириб юборгувчи келар,
Оссурия сени асир қилиб олиб кетишига яна қанча қолди?»
23 У сўзини шундай дея давом эттирди:
«Ҳолингизга вой! Худо буларни амалга оширганда ким ҳам тирик қолади?!
24 Киттим+ соҳилидан кемалар келар,Улар Оссурияни босиб олар+,Улар Ибирни забт этар,
Аммо у уларни ҳам хароб қилар».
25 Бундан сўнг Балом+ ўрнидан турди-да, ўз ерига қайтиб кетди. Болоқ ҳам ўз йўлига кетди.
Изоҳлар
^ Ёки «зурриёти».
^ Сўзма-сўз «ўз юрагимдан».
^ Ёки «кунларнинг охирида».
^ Ёки «Мўаб бошининг чаккаларини».
^ Яъни хайинийлар қабиласи.
