Ҳизқиё 35:1–15
-
Сеирнинг тоғли ҳудудига қарши башорат (1–15)
35 Яҳова менга яна сўзини аён қилди:
2 «Эй инсон ўғли, Сеирнинг+ тоғли ҳудудига юзланиб, унга қарши башорат қил+.
3 Унга айт: “Олий Ҳукмдор Яҳова шундай демоқда: “Эй, Сеирнинг тоғли ҳудуди, Мен сенга қарши чиқаман. Сенга қарши қўлимни узатаман ва кимсасиз ерга айлантираман+.
4 Мен шаҳарларингни харобага айлантираман ва сен кимсасиз бўлиб қоласан+. Шунда Мен Яҳова эканимни билиб оласан.
5 Чунки сен кучли адоватни намоён этдинг+. Исроилликларнинг бошига мусибат тушганда, сўнгги жазосини олаётган пайтда уларни қиличга топширдинг”+.
6 “Шунинг учун ҳаётим билан қасам ичиб айтаманки, — демоқда Олий Ҳукмдор Яҳова, — сени ўлимга* маҳкум этдим ва бундан қочиб қутула олмайсан+. Ўзинг нафратланганларга ўлимни раво кўрганинг учун, ўлим кетингдан қолмайди+.
7 Мен Сеирнинг тоғли ҳудудини кимсасиз қилиб+, ундан ўтиб-қайтаётганларнинг ҳаммасини қириб ташлайман.
8 Унинг тоғларини ўликларга тўлдираман. Тепаликларингда, водийларингда ва барча дарёларингда қиличдан ҳалок бўлганларнинг жасадлари ётади.
9 Сени абадий харобазорга айлантираман ва шаҳарларингда ҳеч ким яшамайди+. Шунда Мен Яҳова эканимни билиб оласизлар”.
10 Мен Ўзим — Яҳова шу ерда бўлишимга қарамай, сен: “Бу икки халқ ва юрт меники бўлади. Иккаласини ҳам мулк қилиб оламиз”+,— деганинг учун,
11 Олий Ҳукмдор Яҳова демоқда: “Ҳаётим билан қасам ичиб айтаманки, улардан нафратланиб қандай ғазаб ва ҳасадни намоён этган бўлсанг+, Мен ҳам сенга шундай муомала қиламан. Сени ҳукм қилганимда Ўзимни уларга танитаман.
12 Шунда Исроил тоғларига қарши: “Улар кимсасиз бўлиб қолди, бизларга йўқ қилиш учун берилди”,— дея кеккайиб гапирганингни Мен Ўзим — Яҳова эшитганимни билиб оласан.
13 Сизлар Менга қарши мағрурлик билан гапириб, сўзларингизни роса кўпайтирдингиз+. Мен уларнинг барини эшитдим”.
14 Олий Ҳукмдор Яҳова демоқда: “Сени кимсасиз жойга айлантирганимда, бутун ер юзи қувонади.
15 Исроил хонадонининг мероси кимсасиз бўлиб ётганида севинган эдинг. Мен ҳам сенга шундай муомала қиламан+. Эй, Сеирнинг тоғли ҳудуди, ҳа бутун Эдом, сен кимсасиз харобага айланасан+. Шунда улар Мен Яҳова эканимни билиб олишади”».
Изоҳлар
^ Сўзма-сўз «қонинг тўкилишига».
