Солномалар биринчи китоб 10:1–14
-
Шоул ва ўғилларининг ўлими (1-14)
10 Филистимликлар Исроилга қарши жанг қилишди ва исроиллик аскарлар улардан қоча бошлашди. Филистимликлар эса улардан кўпини Гилбова тоғида+ қирғин қилишди.
2 Филистимликлар Шоул билан унинг ўғиллари изидан тушиб, Шоулнинг ўғиллари Йўнатан, Абунадов ва Малкишувани+ ўлдиришди.
3 Шоулга қарши жанг қизғин тус олди ва камончилар унга ўқ отиб яралашди+.
4 Шоул қуролбардорига: «Қиличингни суғур-да, менга санч. Йўқса, бу суннатсизлар келиб, мени хўрлайди»+,— деб айтди. Лекин қаттиқ қўрққанидан қуролбардорининг бундай қилишга юраги дов бермади. Шунда Шоул қиличини олди-да, устига ўзини ташлади+.
5 Шоул ўлганини кўриб, қуролбардори ҳам ўзини қиличи устига ташлади-да, ҳалок бўлди.
6 Шундай қилиб, Шоул, унинг учала ўғли ва ёнида бўлган хонадонидагиларнинг бари ҳалок бўлди+.
7 Водийдаги Исроил халқи жангчилар қочганини, Шоул билан ўғиллари эса ҳалок бўлганини кўрганда, шаҳарларини ташлаб қоча бошлади. Филистимликлар бўлса келиб, шаҳарларни босиб олишди.
8 Эртаси куни филистимликлар ўлдирилганларнинг нарсаларини талон-торож қилгани келишганда, Гилбова тоғида+ Шоул билан ўғилларининг ўлигини топишди.
9 Улар Шоулнинг кийим-кечагию қурол-аслаҳаларини олишди-да, бошини кесишди. Сўнг бу ҳақда бутхоналарида+ ва халққа эълон этилиши учун, бутун Филист юрти бўйлаб хабар юборишди.
10 Бундан кейин Шоулнинг қурол-аслаҳасини ўз худоларининг ибодатхонасига қўйишди, бошини эса Дўғон ибодатхонасига+ осишди.
11 Гиладдаги Ёбош аҳолиси+ филистимликлар Шоул билан нималар қилишганини эшитганда+,
12 барча жангчилар йиғилди. Улар Шоул билан ўғилларининг жасадларини Ёбошга олиб келиб, суякларини Ёбошдаги катта дарахт тагига кўмишди+ ва етти кун рўза тутишди.
13 Шундай қилиб, Шоул ўлди. Сабаби, у Яҳованинг сўзига бўйсунмай, Яҳовага бевафолик қилди+. Бундан ташқари, у арвоҳ чақирувчи билан маслаҳатлашди+.
14 Яҳовага мурожаат қилмагани учун, У Шоулни ўлимга дучор қилиб, шоҳликни Эссай ўғли Довудга берди+.