Шоҳлар биринчи китоб 24:1–22
24 Шоул филистимликларни таъқиб қилиб қайтиши биланоқ, унга: «Довуд Эн-Геди+ саҳросида экан!» — деб хабар беришди.
2 Шунда Шоул бутун Исроил халқи орасидан 3 000 нафар кишини танлаб олди-да, Довуд билан унинг одамларини тоғ эчкилари яшайдиган қояли жойлардан излашга отланди.
3 Шоул йўл ёқасидаги тошдан қурилган қўй қўралари ёнига келди. У ерда ғор бор эди. Шоул ҳожат чиқариш учун у ерга кирди. Бу пайт Довуд одамлари билан ғорнинг энг ичкарисида ўтирган эди+.
4 Довуднинг одамлари унга: «Мана, Яҳова душманингизни қўлингизга беряпти+. У билан истаганингизни қилишга йўл қўйяпти»,— дейишди. Шунда Довуд ўрнидан туриб, Шоулнинг камзули этагидан сездирмасдан кесиб олди.
5 Лекин Шоулнинг камзули этагидан кесиб олгани учун, Довуднинг виждони* қийнай бошлади+.
6 У одамларига: «Тақсиримга, Яҳованинг мойланганига қарши қандай қилиб қўл кўтараман?! Яҳованинг мойланганига ёмонлик қилсам, бу Яҳовага маъқул келмаслиги аниқ!»+ — деб айтди.
7 Бу сўзларни айтиб, Довуд одамларини тўхтатиб қолди* ва улар Шоулга ҳужум қилишларига йўл қўймади. Шоул эса ғордан чиқиб, ўз йўлида давом этди.
8 Кейин Довуд ўрнидан туриб, ғордан чиқди-да, Шоулнинг ортидан: «Шоҳ ҳазратлари!»+ — деб бақирди. Шоул ўгирилиб қараганида, Довуд ергача эгилиб унга таъзим қилди.
9 Довуд Шоулга шундай деди: «Нега сиз одамларнинг: “Довуд сизга зарар етказмоқчи”,— деган гапларига қулоқ соляпсиз?+
10 Бугун ғорга кирганингизда, Яҳова сизни менинг қўлимга топширганини ўз кўзингиз билан кўрдингиз. Менга сизни ўлдиришни айтишганда+, сизга раҳм қилиб: “Тақсиримга қўл кўтармайман, чунки у киши Яҳованинг мойлангани-ку!”+ — дедим.
11 Тақсирим, қаранг, камзулингиз этагининг бир парчаси менинг қўлимда. Камзулингиз этагидан кесиб олганимда, сизни ўлдирсам бўларди, лекин мен ундай қилмадим. Сизга зарар етказиш ёки сизга қарши исён кўтариш ниятим йўқлигини энди тушунгандирсиз? Мен сизга қарши гуноҳ қилмадим+. Сиз эса жонимни* олиш пайида юрибсиз+.
12 Ўртамизда Яҳованинг Ўзи ҳукм чиқарсин+ ва мен учун Яҳова сиздан қасос олсин+. Аммо менинг қўлим сизга қарши кўтарилмайди+.
13 Қадимий бир ҳикматда: “Ёвуз кишидан ёвузлик чиқади”,— деб айтилган. Лекин менинг қўлим сизга қарши кўтарилмайди.
14 Исроил шоҳи кимга қарши чиқяптилар? Сиз кимнинг ортидан қувиб юрибсиз? Ўлик итнинг, бир бурганинг ортидан эмасми?+
15 Яҳованинг Ўзи ҳакам бўлиб, ўртамизда ҳукм чиқарсин. У менинг масаламни кўриб чиқиб+, мени оқласин ва сизнинг қўлингиздан қутқарсин».
16 Довуд Шоулга бу гапларни айтиб бўлгач, Шоул: «Довуд, ўғлим, бу сенинг овозингми?»+ — деб сўради-да, уввос солиб йиғлай бошлади.
17 У Довудга қуйидагича деди: «Сен менга қараганда одил инсонсан, чунки сен ёмонлигимга яхшилик билан жавоб қайтардинг+.
18 Ҳа, ўзинг айтганингдай, бугун Яҳова мени қўлингга топширган бўлса-да, мени ўлдирмай, менга яхшилик қилдинг+.
19 Ким қўлга тушган душманини зиён етказмай қўйиб юборади? Бугун менга қилган яхшилигинг учун, Яҳова сени мукофотласин+.
20 Биламан, сен албатта шоҳ бўласан+. Исроил шоҳлиги доимо сенга ва хонадонингга тегишли бўлади.
21 Энди бўлса, авлодларимни* йўқ қилиб ташламаслигинг, отам хонадонидан исмимни ўчириб юбормаслигинг ҳақида Яҳова ҳаққи қасам ич»+.
22 Довуд Шоулга қасам ичди. Кейин Шоул уйига қайтиб кетди+. Довуд эса одамлари билан юриш қийин бўлган жойларга кетди+.
Изоҳлар
^ Сўзма-сўз «юраги».
^ Бошқа вариант «тарқатиб юборди».
^ Ёки «ҳаётимни».
^ Сўзма-сўз «уруғимни».
