Шоҳлар биринчи китоб 29:1–11
-
Филистимликлар Довуддан шубҳаланишади (1–11)
29 Филистимликлар+ бутун қўшинини Офоққа тўплашди. Исроилликлар эса Йизрилдаги+ булоқ олдида қароргоҳ қуришди.
2 Филистимлик беклар юзта ва мингта аскардан таркиб топган гуруҳлари билан бирга келаётган эдилар. Довуд ва одамлари эса орқада Охиш+ билан бирга келаётган эди.
3 Филистимлик беклар: «Манави ибронийлар бу ерда нима қилиб юрибди?» — деб сўрашди. Охиш уларга: «Бу, Исроил шоҳи Шоулнинг хизматкори Довуд. У ёнимда юрганига бир йилдан ошиб қолди+. У ҳузуримга қочиб келгандан то шу кунгача, мен ундан ҳеч қандай ёмонлик кўрмадим»,— дея жавоб берди.
4 Аммо филистимлик бекларнинг аччиғи чиқиб, Охишга бундай дейишди: «Уни орқага қайтаринг+, сиз унга ажратиб берган жойга қайтиб кетсин. У биз билан бирга жангга бормасин, акс ҳолда, жанг пайтида бизга қарши чиқиши мумкин+. Ахир у учун бу қулай фурсат эмасми? У одамларимизнинг каллаларини ҳукмдорига тортиқ этиш орқали унинг кўнглини топишга уринмайдими?
5 У ҳақда қўшиқлар айтиб, рақсга тушиб:
“Шоул минглаб душманларни ўлдирди,
Довуд эса ўн минглаб душманларни ўлдирди”+,— деб айтишган Довуд шу эмасми?»
6 Шунда Охиш+ Довудни чақириб, унга: «Барҳаёт Худо Яҳова ҳаққи қасам ичиб айтаманки, сен тўғри одамсан, чунки ҳузуримга келганингдан то шу кунгача, мен сендан ҳеч қандай ёмонлик кўрмадим+. Қўшиним билан бирга жангга боришингни хоҳлаган эдим+, аммо беклар сенга ишонмаяпти+.
7 Шундай экан, тинчгина орқангга қайтақол, тағин филистимлик бекларнинг жаҳлини чиқарадиган бирон иш қилиб қўйма»,— деб айтди.
8 Довуд бўлса Охишга: «Ахир мен нима қилдим? Хизматкорингиз ҳузурингизга келганидан то шу кунгача, сиз ундан қандай ёмонлик кўрдингиз? Нега мен сиз билан бирга бора олмайман? Нега шоҳ ҳазратларининг душманларига қарши жанг қилмаслигим керак?» — деди.
9 Охиш Довудга: «Сен Худонинг фариштасидай пок эканингга аминман+. Лекин филистимлик беклар: “У биз билан бирга жангга бормасин”,— деб айтишяпти.
10 Шу боис, ўзинг ҳам, сен билан келган одамлар ҳам эрталаб туринглар-да, тонг ёришиши биланоқ саҳарда кетақолинглар»,— дея жавоб берди.
11 Довуд одамлари билан бирга эрта тонгда туриб, филистимликлар юртига қайтди. Филистимликлар эса Йизрилга+ йўл олишди.