Шоҳлар биринчи китоб 7:1–17
7 Хират-Ёримдан келган одамлар Яҳованинг сандиғини олишди-да, Абунадовнинг тепаликда жойлашган уйига келтиришди+. Сўнг унинг ўғли Элазарни Яҳованинг сандиғини қўриқлаш вазифасига тайинлашди*.
2 Сандиқ Хират-Ёримга олиб келинганидан кўп вақт — 20 йил ўтди ва бутун Исроил хонадони фарёд қилиб, Яҳовани излай бошлади+.
3 Шунда Шомуил бутун Исроил хонадонига: «Агар бутун қалбингиз билан+ Яҳовага қайтсангиз, бегона худоларни+ ва Аштаретнинг* тасвирларини+ орангиздан йўқ қилсангиз, иккиланмасдан қалбингизни Яҳовага бериб, фақат Унга хизмат қилсангиз+, У сизларни филистимликлар қўлидан қутқаради»+,— деб айтди.
4 Исроилликлар Бааллар ва Аштаретнинг тасвирларини йўқ қилиб, фақатгина Яҳовага хизмат қилишди+.
5 Сўнг Шомуил: «Бутун Исроил халқини Миспахда+ йиғинглар ва мен сизлар учун Яҳовага ибодат қиламан»+,— деди.
6 Халқ Миспахда йиғилди. Улар сув тортиб, уни Яҳованинг олдида тўкишди* ва ўша куни рўза тутишди+. Улар: «Биз Яҳовага қарши гуноҳ қилдик»+,— деб айтишди. Шомуил Миспахдан туриб исроилликлар устидан ҳакамлик қила бошлади+.
7 Исроилликлар Миспахда йиғилганини филистимликлар эшитишди. Шунда филистимликларнинг беклари+ Исроилга қарши жангга отланишди. Исроилликлар бундан хабар топгач, филистимликлардан қўрқиб қолишди ва
8 Шомуилга: «Бизга ёрдам бериб, филистимликлар қўлидан бизни қутқариши учун, Тангримиз Яҳовага тинмай ибодат қилинг»+,— деб ёлворишди.
9 Шомуил қўзичоқни олиб, Яҳовага бутунлайин куйдириладиган қурбонлик қилиб келтирди+. У Исроил халқи учун Яҳовадан ёрдам сўради ва Яҳова уни эшитди+.
10 Шомуил куйдириладиган қурбонликни келтиргач, филистимликлар Исроил халқи билан жанг қилгани чиқишди. Ўша куни Яҳова филистимликларга қарши кучли момақалдироқ гулдуратиб+, уларни саросимага солди+ ва исроилликлар уларни мағлуб этишди+.
11 Исроилликлар Миспахдан чиқиб филистимликларни таъқиб қилишди ва Байт-Корнинг жанубигача уларни қириб боришди.
12 Кейин Шомуил бир тош олиб+, уни Миспах билан Яшоно ўртасига ўрнатди ва унга Эванзор* деб ном берди. Сўнг: «Яҳова шу ергача бизга ёрдам берди»+,— деб айтди.
13 Шу тариқа филистимликлар бўйсундирилди ва улар Исроил ҳудудига жанг қилгани қайта келишмади+. Шомуилнинг умри давомида Яҳованинг қўли филистимликларга қарши эди+.
14 Филистимликлар Исроилдан тортиб олган шаҳарларни — Эхрондан то Гатгача бўлган шаҳарларни — Исроилга қайтариб беришди. Бу шаҳарларга тегишли ҳудудни исроилликлар филистимликлардан қайтариб олишди.
Исроил халқи билан аморийлар+ ўртасида ҳам тинчлик ўрнатилди.
15 Шомуил умр бўйи Исроилга ҳакамлик қилди+.
16 У ҳар йили Байтил+, Гилгал+ ва Миспахни+ айланиб чиқиб, ушбу шаҳарларда Исроил халқига ҳакамлик қиларди.
17 Сўнг Рамага+ қайтарди, чунки уйи ўша ерда эди ва у ерда ҳам Исроил халқига ҳакамлик қиларди. Шомуил ўша ерда Яҳовага қурбонгоҳ бунёд этди+.
Изоҳлар
^ Сўзма-сўз «муқаддас қилишди».
^ Ёки «Астарта, Иштар».
^ Тавба қилишганини кўрсатувчи рамзий одат бўлиши мумкин.
^ Маъноси «ёрдам тоши».
