Солномалар иккинчи китоб 1:1–17
1 Довуд ўғли Сулаймоннинг шоҳлиги мустаҳкамланиб борарди. Худоси Яҳова у билан бирга бўлиб, уни ғоят юксалтирди+.
2 Сулаймон бутун Исроилни — мингбошилар, юзбошилар, ҳакамлар ва Исроилнинг ҳамма йўлбошчиларинию хонадонлар бошларини бирга йиғди.
3 Кейин Сулаймон ва бутун жамоат Гивондаги+ тепаликка боришди, чунки у ерда Яҳованинг хизматчиси Мусо саҳрода ясаган чодир, яъни Аллоҳнинг учрашув чодири жойлашган эди.
4 Ҳақ Тангрининг аҳд сандиғини эса Довуд Хират-Ёримдан+ олиб, Қуддусда у учун атайин тайёрлаган чодирга қўйган эди+.
5 Хурнинг невараси Ури ўғли Базалил+ ясаган мис қурбонгоҳни+ Яҳованинг муқаддас чодири олдига ўрнатишди. Сулаймон ва бутун жамоат унинг олдида туриб ибодат қиларди.
6 Сулаймон Яҳованинг ҳузурида, учрашув чодири олдида турган мис қурбонгоҳда 1 000 бош молни куйдириладиган қурбонлик сифатида келтирди+.
7 Ўша кечаси Худо Сулаймонга зоҳир бўлиб: «Тила тилагингни»+,— деди.
8 Сулаймон Аллоҳга шундай деб айтди: «Отам Довудга чексиз меҳр-садоқат кўрсатдинг+. Ундан кейин эса мени шоҳ этиб тайинладинг+.
9 Эй, Худованд Яҳова, отам Довудга берган ваъдангни амалга ошир+. Сабаби, Сен мени ер юзидаги қумдай беҳисоб бўлган халқ устидан шоҳ қилиб қўйдинг+.
10 Бу халқни бошқариш учун менга донолик ва билим бер+. Акс ҳолда, ушбу буюк халқингга ким ҳам ҳакамлик қила олади?!»+
11 Сўнг Худо Сулаймонга шундай деди: «Бу сенинг қалб истагинг бўлиб, ўзингга мол-мулк, бойлик ва шон-шараф сўрамадинг. Сендан нафратланганларнинг ўлимини ҳам, ўзинг учун узоқ умр ҳам тиламадинг. Аксинча, сени шоҳ этиб тайинлаган халқимга ҳакамлик қилиш учун донолик ва билим сўрадинг+.
12 Шу боис, сенга донолигу билим ато этаман. Бундан ташқари, сендан аввалги шоҳларда бўлмаган ва сендан кейинги шоҳларда бўлмайдиган мол-мулк, бойлик ҳамда шон-шараф бераман»+.
13 Шундан сўнг, Сулаймон Гивондаги+ тепаликдан, учрашув чодири олдидан Қуддусга қайтиб, Исроил устидан ҳукмронлик қилди.
14 Сулаймон аравалар ва отларни* тобора орттириб борди. Унинг 1 400 та араваси ва 12 000 та оти бор эди+. Улар аравалар учун ажратилган шаҳарларда+ ва шоҳга яқин жойда, Қуддусда турарди+.
15 Шоҳ Қуддусда кумуш ва олтинни тошлардай+, кедр дарахтини ҳам Шефеладаги анжир дарахтларидек кўпайтирди+.
16 Сулаймонга отларни Мисрдан юборишарди+ ва шоҳнинг савдогарлари отларни пода-подаси билан сотиб олишарди*+.
17 Улар Мисрдан ҳар бир аравани 600, ҳар бир отни 150 шекел кумушга сотиб олиб, юборишарди. Шоҳнинг савдогарлари уларни хетийларнинг шоҳлари ва Сурия шоҳларига ҳам олиб келишарди.
Изоҳлар
^ Ёки «отлиқларни».
^ Бошқа вариант «Миср билан Қувайдан келтиришарди. Шоҳ савдогарлари уларни Қувайдан сотиб оларди». Қувай Киликияга ишора қилаётган бўлиши мумкин.