Солномалар иккинчи китоб 25:1–28
25 Эмозиё тахтга ўтирганида 25 ёшда эди ва Қуддусда 29 йил шоҳлик қилди. Онасининг исми Ёҳуваддон бўлиб, қуддуслик эди+.
2 Эмозиё Яҳованинг назарида тўғри ишлар қилиб яшаса-да, сидқидилдан хизмат қилмади.
3 У ҳукмронликни тўлиқ ўз қўлига олгач, шоҳни, яъни отасининг жонига қасд қилган хизматкорларни ўлдирди+.
4 Лекин у Мусонинг Таврот китобида: «Оталар ўғилларининг гуноҳи учун ўлдирилмасин, ўғиллар ҳам оталарининг гуноҳи учун ўлдирилмасин. Инсон фақатгина ўзининг гуноҳи учун ўлдирилсин»+,— деб ёзилган Яҳованинг амрига биноан, уларнинг ўғилларини ўлдирмади.
5 Эмозиё яҳудийларни бир ерга тўплади. У Яҳудо ва Бенямин қабилаларини юзбоши ҳамда мингбошиларнинг бошчилиги остида хонадонлари бўйича ажратди+. У 20 ва ундан юқори ёшдагиларни рўйхатга олди+. Ҳарбий хизматга яроқли, найзаю катта қалқон кўтарган сара жангчилар сони 300 000 нафарни ташкил этди.
6 Бундан ташқари, 100 талант* кумушга Исроилдан 100 000 та қудратли жангчини ёллади.
7 Бироқ унинг олдига Аллоҳнинг одами келиб, деди: «Эй шоҳим, Исроил қўшини сиз билан боришига йўл қўйманг. Чунки Яҳова Исроил билан ҳам, эфрайимликлар билан ҳам эмас+.
8 Жангга ўзингиз боринг ва жасоратли бўлинг. Акс ҳолда, ҳақ Худо душманларингиз сизни мағлуб қилишига йўл қўяди. Зеро, Тангри ҳам ёрдам бериш, ҳам мағлуб этиш қудратига эга»+.
9 Эмозиё Аллоҳнинг одамига жавобан: «Ахир мен Исроил қўшинига 100 талант тўладим-ку!» — деди. Аллоҳнинг одами эса: «Яҳова сизга бундан-да кўпроғини беради»+,— деб айтди.
10 Шунда Эмозиё Эфрайимдан келган қўшинга рухсат бериб, уларни уй-уйига жўнатиб юборди. Улар яҳудоликлардан қаттиқ ғазабланиб, жаҳл устида уйларига қайтиб кетишди.
11 Кейин Эмозиё жасоратга тўлиб, қўшинни Туз водийсига+ бошлаб кетди ва ўша ерда 10 000 нафар Сеир одамларини ўлдирди+.
12 Яҳудоликлар 10 000 кишини тириклайин қўлга олишди. Уларни қояга олиб чиқиб, пастга улоқтиришди, уларнинг бари ҳалок бўлди.
13 Эмозиё ўзи билан жангга олиб бормай+, орқага қайтариб юборган жангчилар Яҳудо шаҳарларига — Самариядан+ то Байт-Хўронгача+ ҳужумлар уюштириб, 3 000 кишини қириб ташлашди ва анчагина ўлжани олиб кетишди.
14 Эмозиё эдомликларни ер тишлатиб қайтгач, ўзи билан Сеир аҳолисининг худоларини олиб келди. Уларни ўзига худолар қилиб олиб+, сажда қила бошлади, шунингдек, уларга қурбонлик куйдириб тутатди.
15 Яҳованинг Эмозиёга қаҳр-ғазаби қайнаб, унинг олдига пайғамбар юборди ва у шоҳга: «Нега ўз халқини сизнинг қўлингиздан қутқара олмаган халқларнинг худоларига сиғиниб юрибсиз?»+ — деди.
16 Пайғамбар гапириб турганида, шоҳ унга: «Сени шоҳга маслаҳатчи қилиб тайинлаганмидик?!+ Бўлди, бас қил!+ Нима, ўлишни истайсанми?» — деди. Шунда пайғамбар: «Бу ишингиз ва маслаҳатимга қулоқ солмаганингиз учун+ Худо сизни яксон қилмоқчи эканини биламан»,— деди-да, бошқа гапирмади.
17 Яҳудо шоҳи Эмозиё маслаҳатчилари билан кенгашиб олгач, Исроил шоҳи Ёҳунинг невараси Ёҳухоз ўғли Йўшга хабар юбориб, унга: «Кел, жанг қиламиз»+,— деди.
18 Исроил шоҳи Йўш бўлса, Яҳудо шоҳи Эмозиёга шундай хабар юборди: «Ливандаги тиканли ўт Ливандаги кедр дарахтига: “Қизингни ўғлимга хотинликка бер”,— деб айтибди. Аммо Ливандаги йиртқич ҳайвон ўтиб кетаётиб, тиканли ўтни топтаб ташлабди.
19 Сен: “Мен Эдомни йўқ қилдим”+,— дея шуҳрат қозонишни истаб, мағрурланиб кетдинг. Лекин уйингда ўтиравер. Нега энди Яҳудо халқини ҳам ўзингга қўшиб кулфатга дучор қилмоқчисан?!»
20 Лекин Эмозиё унга қулоқ солмади+. Чунки бу Аллоҳнинг хоҳиши эди. Улар Эдом худоларига эргашгани учун+, Худо уларни душман қўлига топширмоқчи эди+.
21 Шу боис, Исроил шоҳи Йўш жангга отланди. У Яҳудо шоҳи Эмозиё билан Яҳудонинг Байт-Шамаш+ шаҳрида тўқнашиб, ўша ерда жанг қилди.
22 Исроил Яҳудони мағлуб қилди ва ҳар бири ўз уйига тумтарақай бўлди.
23 Исроил шоҳи Йўш, Ёҳухознинг* невараси Йўшнинг ўғлини — Яҳудо шоҳи Эмозиёни Байт-Шамашда асир қилиб, Қуддусга олиб келди. Йўш Эфрайим дарвозасидан+ то Бурчак дарвозасигача+ Қуддус деворининг 400 тирсак* жойини бузди.
24 У Обид-Эдом назорати остидаги ҳақ Тангрининг уйидан ва шоҳ саройининг ғазнасидан топилган барча олтин, кумуш ва бошқа буюмларни+, шунингдек, одамларни гаровга олиб Самарияга қайтди.
25 Яҳудо шоҳи Йўшнинг ўғли Эмозиё+, Исроил шоҳи Ёҳухоз ўғли Йўш ўлганидан кейин+, яна 15 йил яшади+.
26 Эмозиёнинг ҳаёти Яҳудо ва Исроил шоҳлари ҳақидаги китобда бошдан охиригача баён этилган.
27 Эмозиё Яҳовадан юз ўгирган вақтда, Қуддусда унга қарши фитна уюштирилди+ ва у Лахишга қочиб кетди. Аммо Эмозиёнинг орқасидан Лахишга одам юбориб, уни ўша ерда ўлдиришди.
28 Уни от-аравада қайтариб олиб келишди ва Яҳудо шаҳрида, ота-боболари ёнига дафн этишди.
Изоҳлар
^ Бир талант=34,2 кг. Илованинг Б14 мавзусига қ.
^ Бошқа исми «Охазиё».
^ Тахм. 178 м. Илованинг Б14 мавзусига қ.
