Солномалар иккинчи китоб 6:1–42
6 Ўша пайт Сулаймон: «Эй, Яҳова! Сен қора булут ичра маскан қилишингни айтгансан+.
2 Мен Сен учун ҳашаматли бир уй, Сен абадий яшайдиган макон бунёд этдим»+,— деди.
3 Сўнг шоҳ халқ томонга ўгирилди ва тик турган бутун Исроил жамоатини дуо қилди+.
4 У шундай деди: «Исроил Худоси Яҳовага мадҳлар бўлсин! Зеро, У отам Довудга Ўз оғзи билан ваъда бериб, уни Ўз қўллари билан бажарди.
5 У: “Халқим Исроилни Мисрдан олиб чиққан кундан буён исмим улуғлансин деб уй қурилиши учун Исроилнинг бирон-бир қабиласидаги шаҳарни танламадим+. Халқим Исроил устидан раҳбар ҳам қўймадим.
6 Энди бўлса, исмим шу ерда улуғлансин дея Қуддусни+ танладим. Исроил халқимни бошқариш учун Довудни тайинладим”+,— деган эди.
7 Отам Довуд Исроил халқи Тангриси Яҳованинг исмига атаб уй бунёд этишни кўнглида ният қилган эди+.
8 Бироқ Яҳова отам Довудга: “Исмимга атаб уй қуришни дилингга тугиб қўйган экансан, бу жуда соз.
9 Аммо сен бу уйни бунёд этмайсан. Пушти камарингдан бўлган ўғлинг Менинг исмимга атаб уй қуради”+,— деб айтган эди.
10 Яҳова Ўз сўзида турди. Яҳова ваъда берганидай+, мен отам Довуднинг ўрнига Исроил тахтига ўтирдим+ ва Исроил Худоси Яҳованинг исмига атаб уй барпо этдим.
11 У ерга, Яҳованинг Исроил халқи билан қилган аҳди ёзилган иккита тош лавҳа солинган аҳд сандиғини қўйдим»+.
12 Кейин Сулаймон бутун Исроил жамоати кўз ўнгида Яҳованинг қурбонгоҳи қаршисида туриб, қўлларини кўкка кўтарди+.
13 (Сулаймон мисдан супа ясаб, уни ҳовлининг+ ўртасига қўйган эди. Унинг узунлиги беш тирсак*, эни беш тирсак, баландлиги уч тирсак эди. Шоҳ шу супа устида турарди.) У бутун Исроил жамоати олдида тиз чўкиб, қўлларини кўкка кўтарди+.
14 Сулаймон шундай деди: «Эй, Исроил Тангриси Яҳова! Еру осмонда Сенга ўхшаш Худо йўқ. Сен аҳдингга содиқсан, Сенга бутун қалби билан хизмат қилаётганларга меҳр-садоқат кўрсатасан+.
15 Сен Ўз хизматкоринг, отам Довудга берган ваъдангга+ вафо қилдинг. Ўз оғзинг билан ваъда қилганингни бугун Ўз қўлинг билан бажардинг+.
16 Энди, эй, Исроил Худоси Яҳова! Хизматкоринг, отам Довудга берган ваъдангда тур. Сен: “Агар ўғилларинг Менинг олдимда сен каби қонунимга амал қилиб, ўз йўлига диққатли бўлиб юрса, наслинг тоабад Исроил тахтида ўтиради”+,— деган эдинг.
17 Эй, Исроил Худоси Яҳова, хизматкоринг Довудга берган ваъданг амалга ошсин!
18 Аллоҳ одамлар билан ерда яшармиди?!+ Эй Худованд, осмон, ҳа, бепоён само Сени сиғдира олмаса+, мен бунёд этган уй нима бўлибди?!+
19 Ё Тангрим Яҳова! Хизматкоринг ибодатига, илтифот кўрсатишингни сўраб ёлворганига қулоқ тут. Хизматкоринг олдингда туриб қилаётган илтижосини тингла.
20 “Менинг исмим у ерда бўлади”,— деган сўзларингга биноан, кўзларинг туну кун мана шу уйга қаратилган бўлсин+. Хизматкоринг бу жойга юз буриб қилган ибодатини эшит.
21 Хизматкоринг ва халқинг Исроил бу жойга қараб ёрдам сўраб ёлворганида+ тингла. Осмондан, маконингдан туриб эшит+, қулоқ солиб бизни кечир+.
22 Кимдир яқинига қарши гуноҳ қилса ва қасам ичса*, қасамини бажаришга масъул бўлади. У қасам масъулияти остида бу уйнинг қурбонгоҳи олдига келса+,
23 осмондан туриб эшитгин ва хизматкорларингга ҳукм чиқаргин. Ёвуз одамга қилмишига яраша қайтар+, одил инсонни эса беайб деб эълон қил. Ёвузнинг қилмишини ўз бошига сол, одил инсонни эса одиллигига яраша мукофотла+.
24 Исроил халқинг Сенга қарши гуноҳ қилгани учун душман томонидан тор-мор этилганида+, ёнингга қайтиб, исмингни улуғласа+, илтифот кўрсатишингни сўраб, бу уйда Сенга ибодат қилса+,
25 осмондан туриб қулоқ сол+ ва халқинг Исроил гуноҳини кечириб, Сен уларга ва ота-боболарига берган юртга қайтар+.
26 Улар Сенга қарши гуноҳ қилгани+ дастидан ёмғир ёғдирмай+, осмонни ёпиб қўйганингда, улар бу жойга қараб ибодат қилишса ва исмингни улуғлашса, Сен уларни итоат эттирганинг учун гуноҳ қилишни тўхтатишса+,
27 осмондан туриб эшитгин. Хизматкорларинг бўлмиш халқинг Исроил гуноҳидан кеч ва улар юриши керак бўлган тўғри йўл ҳақида уларга таълим бериб+, халқингга мерос қилиб берган юртингга ёмғир ёғдир+.
28 Агар юртда очарчилик+, ўлат+ ёки гармсел бўлса, занг касали*+, очофат чигирткалар галаси ёпирилса+, юртдаги бирон шаҳарни душманлар қамал қилса+ ёки яна бошқа мусибат келса ё касаллик пайдо бўлса+,
29 ҳар қандай инсон ёки халқинг Исроил (чунки ҳар бир киши дарди ва азобини ўзи билади)+ бу уйга қараб+ қўлларини кўтариб ибодат қилса+ ёки илтифот кўрсатишингни сўраса+,
30 осмондан, маконингдан+ туриб қулоқ солгин ва гуноҳидан ўтгин+. Ҳар бир одамни барча ишларига яраша тақдирла, чунки қалбида нималар кечаётганини биласан (инсон юрагида нима борлигини фақат Сен биласан)+.
31 Шунда улар Сен ота-боболаримизга берган юртда бутун умр йўлларингдан юриб, Сендан қўрқиб яшашади.
32 Халқинг Исроилдан бўлмаган бирон киши Сенинг буюк исминг+, қудратли қўлинг ва кучли билагинг ҳақида эшитиб, узоқ юртдан келса ва бу уйга қараб ибодат қилса+,
33 осмондан, маконингдан туриб тингла ва тилакларининг барини бажо келтир. Токи ер юзидаги барча одамлар Сенинг исмингни билиб+, Исроил халқинг каби Сендан қўрқишсин. Мен қурган бу уй Сенинг исминг билан аталганини ҳаммага билдир.
34 Халқингни душманларига қарши қаерга бўлмасин жанг қилишга юборсанг+, Ўзинг танлаган бу шаҳарга ва мен исмингга атаб қурган уйга қараб+ Сенга ибодат қилса+,
35 осмондан туриб уларнинг ибодатини, илтифот кўрсатишингни сўраб қилган ёлворишини эшит ва одил ҳукм чиқар+.
36 Улар Сенга қарши гуноҳ қилишса (чунки гуноҳ қилмайдиган одам йўқ)+, Сен дарғазаб бўлиб, уларни душман қўлига топширсанг, душманлар эса уларни узоқ ёки яқин юртга асир қилиб олиб кетса+,
37 улар ўша юртда ақл-ҳушларини йиғиб олишса ва олдингга қайтиб: “Биз гуноҳ қилдик, ёмон ишга қўл урдик, қабиҳлик қилдик”+,— деб илтифот кўрсатишингни сўраб ёлворишса
38 ҳамда асир қилиб олиб кетилган юртда+ бутун қалби ва бутун вужуди билан Сенга қайтиб+, Ўзинг ота-боболарига берган юртга, Сен танлаган шаҳарга ва исмингга атаб мен қурган уй томонга қараб ибодат қилишса+,
39 осмондан, маконингдан туриб уларнинг ибодати ва илтифот кўрсатишингни сўраб қилган ёлворишини эшитиб, уларга одил ҳукм чиқар+. Халқинг Сенга қарши қилган гуноҳларини кечир.
40 Энди бўлса, эй Тангрим, бу ерда ибодат қилинганда, назар солиб, эшитгин+.
41 Эй, Худованд Яҳова, энди қудратинг рамзи бўлмиш аҳд сандиғи билан бирга Ўз масканингга+ кир. Эй, Аллоҳ Яҳова, руҳонийларинг нажотни кийимдай кийиб олсин ва Сенга садоқатли бўлганлар яхшиликларингдан қувонсин+.
42 Эй, Тангри Яҳова, мойлаганингдан юз ўгирма+. Хизматкоринг Довудга кўрсатган меҳр-садоқатингни унутма»+.
Изоҳлар
^ Бир тирсак=44,5 см. Илованинг Б14 мавзусига қ.
^ Ёки «жабрланувчи уни қарғаса». Яъни қасам ичган киши сохта қасам берса ёки уни бажармаса, айтилган қарғиш сўзлари амалга ошади.
^ Ёки «моғор».
