Шоҳлар иккинчи китоб 9:1–13
-
Довуд Мефибоситга меҳр-садоқат кўрсатади (1–13)
9 Довуд: «Шоулнинг хонадонидан бирор киши қолганмикин? Агар қолган бўлса, Йўнатанга берган ваъдамга кўра, мен ўша одамга меҳр-садоқат кўрсатардим»+,— деди.
2 Ўша ерда Шоул хонадонида хизматкорлик қилган Зибах+ исмли киши бор эди. Ўша кишини Довуднинг олдига чақиртириб келишди ва шоҳ ундан: «Сен Зибахмисан?» — деб сўради. У: «Ҳа, мен хизматкорингиз Зибахман»,— деб жавоб берди.
3 Шоҳ гапида давом этиб: «Шоул хонадонидан бирор киши қолганми? Агар қолган бўлса, мен ҳам унга Аллоҳ каби меҳр-садоқат кўрсатардим»,— деди. Зибах шоҳга: «Фақатгина Йўнатаннинг ўғли қолган. Унинг иккала оёғи ҳам майиб»+,— деб жавоб берди.
4 Шоҳ ундан: «У қаерда?» — деб сўради. Зибах: «У Лўдаворда, Омиёл ўғли Мохирнинг+ уйида»,— деб жавоб берди шоҳга.
5 Шоҳ Довуд дарҳол Лўдаворга одам юбориб, уни Омиёл ўғли Мохирнинг уйидан чақиртириб келди.
6 Шоулнинг невараси, Йўнатан ўғли Мефибосит Довуднинг олдига келгач, юзтубан тиз чўкиб унга таъзим қилди. Довуд унга: «Мефибосит!» — деди. У: «Лаббай, тақсирим»,— деб жавоб берди.
7 Довуд унга: «Қўрқма. Отанг Йўнатан ҳаққи-ҳурмати мен сенга меҳр-садоқат кўрсатиб+, бобонг Шоулнинг ҳамма ерларини қайтариб бераман. Ўзинг эса доим менинг дастурхонимдан таом ейсан»+,— деди.
8 Шунда Мефибосит таъзим қилиб: «Мен хизматкорингиз ким бўлибманки, ўлик итга+ ўхшаган мендек бир кимсага назарингиз тушган бўлса!» — деб айтди.
9 Шоҳ, Шоулнинг ёрдамчиси Зибахнинг олдига одам юбориб, унга шундай деди: «Шоулга ва унинг бутун хонадонига тегишли ҳамма нарсани мен марҳум хўжайининг Шоулнинг неварасига бердим+.
10 Хўжайининг Шоулнинг неварасига тегишли одамларни озиқ-овқат билан таъминлаб туриш учун, сен, ўғилларинг ва хизматкорларинг унинг ерларига ишлов бериб, ҳосилини йиғиб оласизлар. Хўжайининг Шоулнинг невараси Мефибосит эса ҳамиша менинг дастурхонимдан таом ейди»+.
Зибахнинг 15 та ўғли ва 20 та хизматкори бор эди+.
11 Шунда Зибах шоҳга: «Шоҳ ҳазратлари хизматкорига нимаики буюрсалар, хизматкорингиз ҳаммасини бажо келтиради»,— деб айтди. Шу тариқа, Мефибосит подшоҳ ўғилларининг биридай Довуднинг дастурхонидан* таом ейдиган бўлди.
12 Мефибоситнинг Миха+ исмли ёшгина ўғли бор эди. Зибах хонадонида яшайдиганларнинг ҳаммаси Мефибоситнинг хизматкорлари бўлишди.
13 Мефибосит Қуддусда яшаб, ҳамиша шоҳ дастурхонидан таом ерди+. Унинг иккала оёғи ҳам майиб эди+.
Изоҳлар
^ Бошқа вариант «менинг дастурхонимдан».
