Шоҳлар тўртинчи китоб 6:1–33
6 Пайғамбарлар ўғиллари*+ Элишайга: «Сиз билан яшаётган жойимиз биз учун торлик қиляпти.
2 Иорданга боришимизга рухсат этинг. Ўша ердан ҳар биримиз ёғоч олиб, ўзимизга турар жой қурайлик»,— дейишди. Элишай уларга: «Бора қолинглар»,— деб айтди.
3 Улардан бири: «Илтимос, сиз ҳам хизматчиларингиз билан бирга юринг»,— деб таклиф қилди. Элишай бўлса: «Майли, бораман»,— деди.
4 Шундай қилиб, Элишай улар билан бирга жўнади. Улар Иорданга етиб келиб, дарахт кеса бошлашди.
5 Хизматчилардан бири дарахт кесаётганда, болтанинг тиғи сувга тушиб кетди ва у: «Вой, хўжайин! Болтани бировдан сўраб олгандим!» — дея бақирди.
6 Ҳақ Худонинг одами ундан: «У қаерга тушди?» — деб сўради. Хизматчи ўша жойни унга кўрсатди. Элишай ёғочдан бир бўлак кесиб олиб, ўша ерга улоқтирган эди, болтанинг тиғи сув бетига чиқди.
7 Элишай хизматчига: «Уни чиқариб ол»,— деди ва у қўлини узатиб, болтанинг тиғини чиқариб олди.
8 Сурия шоҳи Исроил шоҳига қарши уруш бошлади+ ва хизматчилари билан маслаҳатлашиб, қайси жойларда қароргоҳ қуриш ҳақида келишиб олди.
9 Ҳақ Худонинг одами+ Исроил шоҳини: «Эҳтиёт бўлинг! Ўша ердан ўтманг, чунки у ерга сурияликлар бостириб келяпти»,— дея огоҳлантирди.
10 Исроил шоҳи ҳақ Худонинг одами огоҳлантирган ерга хабар юборди. Элишай Исроил шоҳини кўп маротаба огоҳлантирди ва шоҳ ўша ердан узоқроқ юрди+.
11 Бундан Сурия шоҳи ғазабланди ва у хизматчиларини йиғиб: «Қани айтинглар-чи, орамиздан ким Исроил шоҳининг тарафида?» — деб сўради.
12 Унинг хизматчиларидан бири: «Ҳеч биримиз, шоҳ ҳазратлари! Бу, Исроилдаги Элишай пайғамбарнинг иши. У ҳатто ётоғингизда айтган гапингизни Исроил шоҳига етказиб туради»+,— дея жавоб берди.
13 Шоҳ бўлса: «Бориб, у қаерда эканини билиб келинглар. Мен одам юбориб, уни қўлга тушираман»,— деди. Кейин шоҳга: «У Дўтанда+ экан»,— дея хабар беришди.
14 Шоҳ дарҳол у ерга катта қўшинни отлару жанг аравалар билан бирга юборди. Улар тунда келиб, шаҳарни қуршаб олишди.
15 Ҳақ Худо одамининг хизматчиси эрта тонгда туриб, ташқарига чиқди. У шаҳарни отлару жанг аравалар билан бирга катта қўшин ўраб олганини кўриши билан: «Войдод, хўжайин! Энди нима қиламиз?» — дея ҳайқирди.
16 Аммо Элишай: «Қўрқма!+ Бизнинг тарафимиздагилар уларникидан кўпроқ»+,— деди.
17 Сўнгра у: «Эй Яҳова, ўтинаман, у кўра олиши учун кўзларини оч»+,— дея ибодат қилди. Яҳова дарҳол хизматчининг кўзларини очди ва у Элишайнинг атрофидаги тоғли ҳудуд оташли жанг аравалару отларга+ тўлиб кетганини кўрди+.
18 Сурияликлар Элишайнинг олдига кела бошлашганда, у Яҳовага: «Ўтинаман, бу халқни кўр қилиб қўй»+,— дея ибодат қилди. Элишай сўраганидай, Аллоҳ уларни кўрликка мубтало қилди.
19 Кейин Элишай уларга: «Сизлар излаган йўл ҳам, шаҳар ҳам бу эмас. Ортимдан эргашинглар, сизлар қидираётган одамнинг олдига бошлаб бораман»,— дея, уларни Самарияга+ эргаштириб кетди.
20 Улар Самарияга етиб келишгач, Элишай: «Эй Яҳова, улар кўра олиши учун кўзларини оч»,— деди. Яҳова уларнинг кўзларини очган эди, улар Самариянинг қоқ ўртасида туришганини кўришди.
21 Исроил шоҳи сурияликларни кўриб, Элишайдан: «Тақсирим, уларни қириб ташлайми? Қириб ташлайми?» — деб сўради.
22 Аммо Элишай: «Йўқ, уларни қирманг. Ахир қиличу камонингиз билан асирликка олган одамларни ўлдирган бўлармидингиз?! Уларга нон билан сув беринг, еб-ичишсин+, сўнг ҳукмдори олдига қайтишсин»,— деди.
23 Шоҳ уларга катта зиёфат берди ва улар еб-ичишгандан сўнг, уларни ҳукмдори олдига жўнатиб юборди. Шундан кейин, Суриянинг+ босқинчилар тўдаси Исроил юртига қадам босмайдиган бўлди.
24 Вақт ўтиб, Сурия шоҳи Банҳадад бутун қўшинини тўплади-да, Самарияга отланиб, уни қамал қилди+.
25 Шунда Самарияда кучли қаҳатчилик бошланди+. Сурияликлар шаҳарни шу қадар узоқ қамал қилишдики, эшакнинг калласи+ 80 шекел кумушга, икки ҳовуч* каптар гўнги 5 шекел кумушга тенг бўлди.
26 Бир куни Исроил шоҳи девор устида кетаётганда, бир аёл: «Ёрдам беринг, эй шоҳ ҳазратлари!» — дея қичқирди.
27 Шоҳ бунга: «Яҳованинг Ўзи сенга ёрдам бермаса, менинг қўлимдан нима ҳам келарди? Мени дон, шароб ёки мой бера олади, деб ўйлаяпсанми?» — деб айтди.
28 Шоҳ ундан: «Нима бўлди ўзи?» — деб сўради. Аёл жавобан деди: «Манави аёл: “Ўғлингни бер, бугун уни ейлик, менинг ўғлимни эса эртага еймиз”+,— деган эди.
29 Биз ўғлимни пишириб едик+. Эртасига: “Ўғлингни бер, уни ейлик”,— десам, у бўлса ўғлини яшириб қўйди».
30 Шоҳ аёлнинг сўзларини эшитиши билан, эгнидаги кийимини йиртди-да+, девор бўйлаб кета бошлади. Шунда халқ, у кийими тагидан жул кийиб олганини кўрди.
31 Кейин шоҳ: «Бугун Шофот ўғли Элишайнинг боши олинмаса, Худо мени не кўйга солса солсин, ундан баттарроғини ҳам қилсин!»+ — деди.
32 Бу пайтда Элишай оқсоқоллар билан бирга уйида ўтирган эди. Шоҳ ўзидан олдин бир хабарчини жўнатди. Аммо у келишидан аввал, Элишай оқсоқолларга: «Бу жаллоднинг ўғли+ менинг бошимни олиш учун одам юборганини биласизларми? Кўз-қулоқ бўлиб, хабарчи келган заҳоти, уни киритмай эшикни ёпиб, итариб туринглар. Унинг ортидан келаётган хўжайинининг қадам товушларини эшитяпсизларми?» — деб айтди.
33 Элишай ҳали гапини тугатмасидан, хабарчи ва унинг кетидан шоҳ келди. Шоҳ: «Бу балони Яҳова юборди. Шундай экан, Яҳовани кутишнинг нима ҳожати бор?!» — деди.
Изоҳлар
^ «Пайғамбарлар ўғиллари» ибораси, пайғамбарлар таълим оладиган мактаб ёки пайғамбарлар гуруҳини англатиши мумкин.
^ Ибр. каб. Бир каб=1,22 л. Илованинг Б14 мавзусига қ.
