2023 йил 24 январда олимлар Қиёмат куни соати a милларини ярим тунга янада яқинроқ суриб қўйишди. Бу рамзий маънода Қиёмат куни яқин эканини англатади.

•   «Қиёмат куни соати бутун инсоният йўқ бўлиб кетиш хавфини тасвирлайди. Сешанба куни олимлар Украинадаги уруш, ядровий уруш бошланиш қўрқуви ҳамда иқлим инқирози туфайли Қиёмат куни соати милларини ярим тунга яна яқинроқ суриб қўйишди». («AFP International Text Wire»)

•   «Олимлар шуни айтишмоқчики, Қиёмат куни соатида ярим тун бошланишига 90 сония қолди. Бу инсоният бутунлай йўқ бўлиб кетишига ҳар қачонгидан ҳам оз қолганини англатади». («ABC News»)

•   «Халқаро олимлар кенгаши инсоният ўзини-ўзи йўқ қилиш хавфи ҳар қачонгидан ҳам кўпроқ экани ҳақида огоҳлантирмоқда». («The Guardian»)

 Инсоният ҳамда Ер шаримиз йўқ бўлиб кетишига яқин қолдими? Келажакда юз берадиган воқеалардан қўрқишимиз керакми? Муқаддас Китобда нима дейилган?

 Муқаддас Китобга кўра, «ер абадий туради» ва одамлар «ерда абадий яшайди». (Воиз 1:4; Забур 37:29) Шундай экан, инсонлар ерни йўқ қилмайди ёки яшаш учун уни яроқсиз ҳолатга келтирмайди.

 Аммо Муқаддас Китобда охират келиши ҳақида эслатиб ўтилган. Мисол учун, у ерда: «Дунё... ўтиб кетади»,— деб айтилган. (1 Юҳанно 2:17)

•   «Дунёнинг охири келиши» деганда Муқаддас Китоб нимани назарда тутишини билишни истасангиз, «Дунёнинг охири яқинми? Апокалипсис нимани англатади?» номли мақолани ўқинг.

•   Муқаддас Китобда дунёда юз берадиган бўлажак воқеалар вақти тўғрисида нима дейилганини билишни истасангиз, «Дунё қачон ўз ниҳоясига етади?» номли мақолани ўқинг.

 Муқаддас Китоб ҳозирги муаммоларга қарамай, ижобий нуқтаи назарни сақлаб қолишга ёрдам бера олади. Қандай қилиб?

•   Муқаддас Китоб бизга амалий маслаҳатлар беради. (2 Тимўтийга 3:16, 17) Масалан, ҳаётдаги қийинчиликларга қарамай, қандай қилиб Муқаддас Китоб сизга кўмаклашишини билиш учун «Ҳаддан ташқари кўп хавотирланмасликка нима ёрдам беради?» номли мақолани ўқинг.

•   Муқаддас Китоб келажак учун мустаҳкам умид тақдим этмоқда. (Римликларга 15:4) Мазкур китобда ҳозир ва келажакда нималар бўлиши аниқ тушунтириб берилган. Бу эса ҳозирги дунё воқеалари қандай бўлишидан қатъи назар, дадил бўлиб қолишга ёрдам беради.

 Муқаддас Китобни яхшироқ тушуниш учун, таълим берувчи ёрдамида ўтказиладиган Муқаддас Китобни бепул тадқиқ қилиш дастурини таклиф қиламиз.