Исо нишонлаган сўнгги Фисиҳ байрами ўзгача бўлиши керак эди. Ўлими яқинлашиб қолгани учун у Фисиҳ таомини ҳаворийлари билан ейишни ва ҳар йили ўтказиладиган «Ҳазратимизнинг кечлик таоми» номли янги маросимни жорий этишни режалаштирганди. Шунга у Бутрус билан Юҳаннони хонани тайёрлаш учун юборган эди. (Лқ 22:7–13; муқовадаги расмга қаранг.) Бу бизга 27 март куни бўлиб ўтадиган Қутлуғ Кечликка тайёргарлик кўриш лозимлигини эслатяпти. Жамоатлар маърузачи, рамзлар ва маросим билан боғлиқ бошқа чора-тадбирларни режалаштиришлари керак бўлар. Аммо шахсан биз Қутлуғ Кечликка тайёр бўлишимиз учун нима қилсак бўлади?

Қалбингизни тайёрланг. Қутлуғ Кечлик арафасида ўқиладиган оятларни мутолаа қилиб, улар устида мулоҳаза юритинг. Қайси оятларни ўқиш кераклигини «Муқаддас Ёзувларни кунда ўрганамиз» рисоласидан топсангиз бўлади. Оятларнинг батафсил жадвали эса «Муқаддас Китоб — Янги дунё таржимаси»даги илованинг Б12 мавзусида келтирилган. (Шунингдек, «Ҳаёт тарзимиз ва хизматимиз. Таълим дастури»нинг 2020 йил апрель сонига қаранг.) Оилавий топинишда тўловнинг муҳимлиги ҳақидаги маълумотни кўриб чиқмоқчи бўлсангиз, «Қўриқчи Минораси Жамияти нашрларининг кўрсаткичи» ёки «Яҳованинг Шоҳидлари изланиш олиб бориши учун қўлланма»га мурожаат қилишингиз мумкин.

Бошқаларни таклиф қилинг. Қутлуғ Кечликка таклиф қилиш кампаниясида тўлиқ иштирок этинг. Кимларни таклиф қилишингиз мумкинлиги ҳақида ўйлаб кўринг. Бу сиз такрорий ташриф қилаётган кишилар, аввал тадқиқ ўтган инсонлар, танишларингиз ёки қариндошларингиз бўлиши мумкин. Оқсоқоллар эса барча фаолиятсиз ваъзгўйлар таклиф қилинганига амин бўлишлари керак. Борди-ю, юқорида тилга олинганлардан кимдир сизнинг ҳудудингизда яшамаса, jw.org сайтининг бош саҳифасида жойлашган «БИЗ ҲАҚИМИЗДА» туркуми остидаги «Қутлуғ Кечлик» сарлавҳасига кириб, Қутлуғ Кечлик у яшайдиган ҳудудда қаерда ва қачон ўтказилишини билиб олсангиз бўлади.

Тайёргарлик кўриш учун яна нималар қилсак бўлади?