Вояга етган фарзандлар кекса ота-отаналарига ғамхўрлик қилинаётганига ишонч ҳосил қилиш каби муҳим масъулиятга эга. Муқаддас Китобда вояга етган фарзандлар қуйидагиларни қилиши кераклиги айтилган: «Аввал уйларида художўй бўлишни ўрганиб, ота-оналарига... нисбатан бурчларини бажаришсин, чунки бу Худога маъқулдир». (1 Тимўтийга 5:4) Вояга етган фарзандлар кекса ота-оналарига ғамхўрлик кўрсатилаётганига амин бўлса-да, улар Муқаддас Китобдаги: «Ота-онангизни ҳурмат қилинг»,— деган амрга ҳам бўйсунишади. (Эфесликларга 6:2, 3)

 Худонинг Каломида кексайган ота-оналарга ғамхўрлик қилиш борасида ўзгача йўл-йўриқлар келтирилмаган. Бироқ у ерда кексайган ота-онасига ғамхўрлик кўрсатган имонли эркагу аёлларнинг мисоллари ёзилган. Қолаверса, Муқаддас Китобда кекса ота-онасига ғамхўрлик қилувчиларга қўл келадиган амалий маслаҳатлар бор.

•  Қай йўсин қадимда баъзилар кекса ота-онасига ғамхўрлик кўрсатган?

•  Муқаддас Китобда кекса ота-онасига ғамхўрлик қилувчиларга қўл келадиган қандай амалий маслаҳатлар бор?

•  Худонинг Каломида кекса ота-оналарга фақат уйда ғамхўрлик қилиш керак, деб айтилганми?

 Улар вазиятларидан келиб чиқиб, буни турли йўллар орқали қилишган.

•   Юсуф ёши ўтиб бораётган отаси Ёқубдан узоқда яшаган. Имкон туғилганида, Юсуф отаси Ёқубни ўзига яқинроқ жойга кўчирган. Сўнг эса у Ёқубни уй-жой, озиқ-овқат билан таъминлаб, уни ҳимоя қилган. (Ибтидо 45:9–11; 47:11, 12)

•   Рут қайнанасининг она юртига кўчиб борган ва унга ғамхўрлик қилиш учун қаттиқ меҳнат қилган. (Рут 1:16; 2:2, 17, 18, 23)

•   Исо ўлимидан сал аввал, ҳойнаҳой, ўшанда бева бўлган онаси Марямга ғамхўрлик қилишни бир кишига тайинлаган. (Юҳанно 19:26, 27) a

 Кекса ота-онасига ғамхўрлик қиладиганлар баъзида жисмонан ва ҳиссан чарчайди. Бундай вазиятда Муқаддас Китобдаги принциплар уларга ёрдам бера олади.

•   Ота-онангизни ҳурмат қилинг.

   Муқаддас Китобда шундай дейилган: «Ота-онангизни ҳурмат қилинглар». (Чиқиш 20:12)

   Бу принципни қай йўсин қўлласа бўлади? Ота-онангизнинг имкониятлари йўл қўйгунча уларга эркинлик бериш орқали ҳурмат кўрсатинг. Вазият йўл қўйгунча қандай ғамхўрлик қилиш борасида ота-онангиз қарор чиқаришига йўл қўйинг. Шу билан бирга, шароитингиздан келиб чиқиб уларни қўллаб-қувватлаш орқали ҳурмат кўрсатинг.

•   Тушунадиган ва кечиримли бўлинг.

   Муқаддас Китобда шундай дейилган: «Фаҳм-фаросатли жаҳлини тия олади, хатоларни кечириш инсонни безайди». (Ҳикматлар 19:11)

   Бу принципни қай йўсин қўлласа бўлади? Ота-онангиз қўпол гапирса ёки ғамхўрлигингизни қадрламаётгандай туюлса, ўзингиздан шундай деб сўранг: «Улар каби имкониятларим чегараланган ва руҳим тушган бўлса, ўзимни қандай ҳис қилган бўлардим?» Тушунишга ва кечиримли бўлишга ҳаракат қилсангиз, бу сизга қийин вазиятни янада чигаллаштирмасликка ёрдам берар.

•   Бошқалар билан маслаҳатлашинг.

   Муқаддас Китобда шундай дейилган: «Маслаҳат бўлмаган жойда режалар барбод бўлади, маслаҳатчи кўп бўлса, улар амалга ошади». (Ҳикматлар 15:22)

   Бу принципни қай йўсин қўлласа бўлади? Ота-онангизда бўлиши мумкин бўлган соғлиқ муаммоларини қандай ҳал қилиш борасида изланиш ўтказинг. Сиз яшайдиган ҳудудда уларга яхшироқ ғамхўрлик қилишга кўмаклашадиган қандай имкониятлар борлигини аниқланг. Кекса ота-онасига ғамхўрлик қиладиганлар билан суҳбатлашинг. Ака-ука ёки опа-сингилларингиз бўлса, ота-онангизнинг эҳтиёжлари, уларга қандай ёрдам кўрсатиш ва масъулиятларни қандай бўлишиб олишни биргаликда муҳокама қилинг.

•   Имкониятларингиз чегараланганини тан олинг.

   Муқаддас Китобда шундай дейилган: «Ўз ҳаддини биладиганларга эса донолик хосдир». (Ҳикматлар 11:2, изоҳ)

   Бу принципни қай йўсин қўлласа бўлади? Имкониятларингиз чегараланганини тан олинг. Масалан, ҳар бир инсоннинг вақти ва кучи чегараланган. Имкониятлар чегараланганини билиш ота-онангиз учун нималар қила олишингизга реал қарашингизга таъсир қилади. Кекса ота-онангизга ғамхўрлик қилиш сизга оғирлик қилаётганини сезсангиз, бошқа оила аъзоларингиздан ёки мутахассислардан ёрдам сўраш ҳақида ўйлаб кўринг.

•   Соғлигингизга эътиборли бўлинг.

   Муқаддас Китобда шундай дейилган: «Ҳеч бир киши ўз танасидан нафратланмайди, аксинча, уни озиқлантириб, ардоқлайди». (Эфесликларга 5:29)

   Бу принципни қай йўсин қўлласа бўлади? Ота-онангизга ғамхўрлик қилиш масъулиятига эга бўлсангиз ҳам, ўз эҳтиёжларингизга ва агар турмуш қурган бўлсангиз, оилангизга ғамхўрлик қилишингиз лозим. Яхши овқатланишингиз керак. Етарлича дам олишингиз ва ухлашингиз даркор. (Воиз 4:6) Имкон туғилганда оз-моз дам олиш учун танаффус қилиб туриш яхши бўларди. Бундай йўл тутиб, ҳиссан, ақлан ҳамда жисмонан яхшиланиб, ота-онангизга ғамхўрлик қила оласиз.

 Муқаддас Китобда бу ҳақда аниқ йўл-йўриқ келтирилмаган. Баъзи фарзандлар ота-онасига имкон қадар уйида ғамхўрлик қилишни танлашади. Лекин қайсидир пайтда улар ота-онасига қариялар уйида сифатлироқ ёрдам берилади, деб хулоса қилар. Оила аъзолар бирга йиғилиб, ҳар бири учун қайси қарор энг маъқул бўлишини муҳокама қилиши мумкин. (Галатияликларга 6:4, 5)