Пандемия пайтида кўп биродару опа-сингилларимиз ҳудудидаги одамларга тасалли бериш мақсадида далдали хатлар юборишяпти. Хосе Лапорта ва унинг хотини Ванеса Барселонадаги (Испания) бир касалхонада ишлайдиган инсонларга ва COVID-19 га чалинган беморларга хатлар ёзиб тасалли беришган. Битта ҳамшира уларга жавобан хат ёзибди. Қуйида оз-моз ўзгаришлар киритилган хатини ўқиш мумкин a. (Унинг розилиги билан чоп этилган.)

Мен ҳамшираман... Сизларга 97 ёшли бувижон номидан [беморнинг исми] ёзяпман. Хатингизни бугун эрталаб бирга ўқидик. Одатда беморларга хатларни бу ердаги ишчилар етказишади, лекин бу хат қўлимга тасодифан тушмаган деб ўйлайман. Бу хат [беморга] ва менга умид бахш этиб, жуда таъсир қилди. [Беморнинг] аҳволи унча яхши эмас, буни ўзи ҳам яхши тушуняпти. Шунинг учун, Хосе, у сизга: «97 ёшда бўлсам ҳам, Муқаддас Китобда башорат қилинган бу ваъдаларни кўра оламанми?» — деган саволни бермай, ҳаётдан кўз юмишни хоҳламаётганини айтди.

Бугун эрталаб ўн дақиқа вақтим бор эди ва сизлар хатда келтирган сайтга кириб, оз-моз маълумот ўқиб бердим. Бувижоннинг кўзлари чарақлаб, чеҳраси ёришиб кетди. Жуда хурсанд ва хотиржам эди. Илгари уни бундай кайфиятда кўрмаган эдим. Кейин «Исо нима учун ўлган?» номли видеони ҳам томоша қилдик.

Шунингдек, стрессдан озод бўлиш ҳақидаги [«Уйғонинг!»] журналингизни ўқиб бердим. Бу ўз вақтида, чунки ҳозирги кунда қийналмаган одамнинг ўзи йўқ.

Бизга, касалхонадаги ишчиларга психолог ёрдами тақдим этилмайди, сайтингиздаги маълумотни эса ҳар қачон, кундузи ҳам, кечаси ҳам ўқиш ва кўриш мумкин. Мавзулар айнан муддао. Бу вазият тугаганда, хатингизда яхшироқ шароитлар бўладиган дунё ҳақида кўпроқ билиб олишни хоҳлар эдим. Умид қиламанки, менга ёрдам берасизлар. Хатингиз айнан ўша, мен ишлаган куни келгани ва мен уни [беморнинг] хонасига олиб борганим учун Худодан қанчалар миннатдор эканимни айтишга тил ожиз.

Ўйлайманки, ўзингиз ва оила аъзоларингизнинг соғлиги яхши. Умидингиз туфайли ҳозирги вазиятни кўпчилигимизга қараганда, осонроқ енга олаётганингизга аминман. Вақт топиб, бизга ўхшаш инсонларга [беморга], менга хат ёзаётганингиз учун катта раҳмат. Бизни танимасангиз ҳам, ажойиб хат ёзгансиз, уни ўқиган кунимиз охирги олти ҳафта ичида энг қувончли кун бўлди.

Сизларга чин дилдан раҳмат деймиз!

Бу аёлнинг миннатдорчилик изҳор этиб ёзган сўзлари ушбу қийин пайтда бизни янада кўпроқ ваъз қилишга ундайди. Келинг, хизматимизда қўллаётган сўзлар бошқаларга тасалли бахш этсин, деб ибодат қилайлик. (Ҳикматлар 15:23)