Asosiy materiallarga o‘tish

Mundarijaga o‘tish

32-TADQIQ MAQOLASI

Kamtar bo‘ling va imkoniyatlaringiz chegaralanganini tan oling

Kamtar bo‘ling va imkoniyatlaringiz chegaralanganini tan oling

Kamtarlik ila Xudoga hamroh bo‘l! MIXO 6:8

31-QO‘SHIQ Allohga hamroh bo‘ling!

BU MAQOLADA *

1. Dovud Yahovaning kamtarligi haqida nima degan edi?

YAHOVANI chinakamiga kamtarin, deb ayta olamizmi? Albatta. Bir safar Dovud: «Menga najot qalqoningni berasan, kamtarliging meni yuksaltiradi»,— deb yozgan edi. (2 Shoh. 22:36; Zab. 18:35) Ehtimol, bu so‘zlarni yozayotib u Isroilning bo‘lajak shohini moylash uchun otasining uyiga Shomuil payg‘ambar kelgan payt haqida o‘ylagandir. Dovud sakkiz o‘g‘ilning kenjasi edi, ammo Yahova aynan uni Shoulning o‘rniga shoh bo‘lishi uchun tanlagandi. (1 Shoh. 16:1, 10–13)

2. Bu maqolada nimani ko‘rib chiqamiz?

2 Dovud Yahova haqida quyidagi so‘zlarni aytgan sano bastakorining fikriga qo‘shilgan bo‘lardi: «U egilib osmon bilan yerga qaraydi, bechorani tuproqdan, kambag‘alni kuldan turg‘izadi. Uni asilzodalar bilan... birga o‘tqazadi». (Zab. 113:6–8) Mazkur maqolada avvaliga Yahova kamtarlikni qay yo‘sin namoyon etganini ko‘rib chiqib, bu fazilat borasida qanday muhim saboqlar olishimiz mumkinligiga diqqat qaratamiz. Keyin esa shoh Shoul, Doniyor payg‘ambar va Isodan o‘z imkoniyatlari chegaralanganini tan olish borasida nimani o‘rganishimiz mumkinligini ko‘rib chiqamiz.

YAHOVANING O‘RNAGIDAN QANDAY SABOQ OLISHIMIZ MUMKIN?

3. Yahova bizga qanday muomala qiladi va bu nimani isbotlamoqda?

3 Yahova nomukammal odamlarga qanday muomala qilayotgani bilan kamtarin ekanini isbotlamoqda. U nafaqat topinishimizni qabul qiladi, balki bizni do‘stlari, deb ham biladi. (Zab. 25:14) U bilan do‘st bo‘la olishimiz uchun Yahova tashabbus ko‘rsatib, gunohlarimizni yuvish maqsadida O‘z O‘g‘lini qurbonlik sifatida taqdim etdi. Yahova naqadar shafqatli va rahmdil-a?!

4. Yahova bizga nimani bergan va nega?

4 Yahova kamtarlikni namoyon etgan boshqa vaziyatni ko‘rib chiqaylik. Yaratuvchi sifatida U bizga o‘z hayot yo‘limizni tanlash qobiliyatini bermasligi mumkin edi. Ammo U bunday qilmadi. Xudo bizni O‘ziga o‘xshash qilib yaratdi va iroda erkinligini berdi. Yahova bilan solishtirganda kichkina va zaif bo‘lishimizga qaramay, qarorlarimiz U uchun muhim. Alloh biz Unga chin qalbdan, Uni sevganimiz va Unga quloq solish bizga foyda keltirishini tushunganimiz uchun xizmat qilishimizni istaydi. (Qonun. 10:12; Ishayo 48:17, 18) Yahova kamtarin bo‘lgani uchun Undan minnatdor bo‘lishimiz lozim, shunday emasmi?

Iso osmonda turgani tasvirlangan. Uning yonida u bilan birga boshqaradigan ayrim moylanganlar bor. Ular birgalikda ko‘plab farishtalarni kuzatib turishibdi. Ayrim farishtalar o‘z vazifalarini bajarish uchun Yer tomonga uchib ketyapti. Yahova rasmda tasvirlangan barchaga muayyan mas’uliyatni topshirgan. (5-xatboshiga qarang.)

5. Yahova bizni kamtarlikka qanday o‘rgatmoqda? (Muqovadagi rasmga qarang.)

5 Yahova bizga qanday muomala qilayotgani bilan bizni kamtarlikka o‘rgatmoqda. Alloh koinotdagi eng dono Shaxs. Shunga qaramay, U boshqalarning takliflarini qabul qilishga tayyor. Masalan, Yahova yaratish jarayonida O‘g‘li Unga ko‘maklashishiga izn bergan. (Hik. 8:27–30; Kolos. 1:15, 16) Yahova qodir Tangri bo‘lsa-da, boshqalarga ham muayyan mas’uliyatni topshiradi. Misol uchun, U Isoni Samoviy Shohlikning Shohi etib tayinladi va Iso bilan birgalikda boshqaradigan 144 000 kishiga muayyan hokimiyat beradi. (Luqo 12:32) To‘g‘ri, Yahova Isoga Shoh va Oliy ruhoniy bo‘lishi uchun ta’lim bergan. (Ibron. 5:8, 9) Xudo Iso bilan boshqaradigan kishilarga ham ta’lim beryapti, biroq ular bu ishni qanday bajarishini U mayda-chuydasigacha nazorat qilishga intilmaydi. Aksincha, Yahova ular Uning irodasini bajarishiga ishonadi. (Vah. 5:10)

Boshqalarga ta’lim berib, vazifalarimizni ular bilan bo‘lishsak, Yahovaga taqlid qilgan bo‘lamiz (6-7-xatboshilariga qarang.) *

6, 7. Hokimiyatni boshqalar bilan bo‘lishish borasida samoviy Otamizdan nimani o‘rganishimiz mumkin?

6 Agar hech kimning yordamiga muhtoj bo‘lmagan samoviy Otamiz hokimiyatini boshqalar bilan bo‘lishsa, biz bunday qilishimiz yanada muhimroq emasmi?! Ehtimol, siz oila boshi yoki jamoat oqsoqolidirsiz. Yahovaning o‘rnagiga ergashib boshqalar bilan vazifalaringizni bo‘lishing va ularning har bir qadamini nazorat qilish istagiga qarshi turing. Yahovaga taqlid qilsangiz, nafaqat o‘z vazifalaringizni bajarasiz, balki boshqalarga ham ta’lim berasiz va ularning o‘ziga bo‘lgan ishonchini mustahkamlaysiz. (Ishayo 41:10) Muayyan hokimiyatga ega kishilar Yahovadan yana nimani o‘rganishlari mumkin?

7 Muqaddas Kitobdan Yahova farishtalarining fikri bilan qiziqishini bilib olyapmiz. (3 Shoh. 22:19–22) Ota-onalar, siz Yahovaning o‘rnagiga qanday taqlid qila olasiz? O‘rinli bo‘lganida muayyan ish qanday bajarilishi kerakligi haqida farzandlaringizning fikrini so‘rang. Agar ularning taklifi mos kelsa, uni qabul qiling.

8. Yahova Ibrohim bilan Soraga sabr-toqatini qanday namoyon etdi?

8 Yahovaning kamtarligi U sabr-toqatni namoyon etishidan ham ko‘rinadi. Masalan, xizmatchilari Yahovadan qarorlarini qayta ko‘rib chiqishni iltimos qilishganida U sabr-toqatni ko‘rsatadi. Ibrohim Xudoning Sado‘m va G‘amo‘ra shaharlarini yo‘q qilish haqidagi qaroridan tashvishlanayotganini izhor qilganida, U xizmatchisini diqqat bilan tingladi. (Ibt. 18:22–33) Shuningdek, Yahova Ibrohimning xotini Sora bilan qanday muomala qilganini eslaylik. Xudo Sora qarigan bo‘lsa-da, homilador bo‘lishi haqida va’da berganida u kuldi. Lekin Xudo undan achchiqlanmadi. (Ibt. 18:10–14) Aksincha, U Soraga hurmat ila muomala qildi.

9. Ota-onalar-u oqsoqollar Yahovaning o‘rnagidan qanday saboq olishi mumkin?

9 Ota-onalar-u oqsoqollar, Yahovaning o‘rnagidan qanday saboq olishingiz mumkin? Bordi-yu, bolalaringiz yoki jamoat a’zolari qaroringizga qo‘shilmasa, qanday yo‘l tutasiz? Darhol ular nohaq ekanini aytasizmi? Yoki ularning nuqtai nazarini tushunishga harakat qilasizmi? Hokimiyatga ega kishilar Yahovaga taqlid qilishsa, bu oilalar va jamoatlarga foyda keltirishi shubhasiz. Mana Yahovaning o‘rnagidan kamtarlik haqida nimalarni o‘rganishimiz mumkinligini ko‘rib chiqdik. Endi, keling, Xudoning Kalomida yozilgan misollardan o‘z imkoniyatlari chegaralanganini tan olish to‘g‘risida nimani o‘rganishimiz mumkinligini bilib olaylik.

BOSHQALARNING MISOLIDAN NIMANI O‘RGANISHIMIZ MUMKIN?

10. Bizga ta’lim berish uchun Yahova boshqa odamlarning misolidan qanday foydalanadi?

10 «Buyuk Ustozi»miz sifatida Yahova bizga ta’lim berish uchun Kalomida misollar yozilishiga g‘amxo‘rlik qilgan. (Ishayo 30:20, 21) Muqaddas Kitob hikoyalaridan Xudoga ma’qul fazilatlarni namoyon etgan, jumladan, imkoniyatlari chegaralanganini tan olgan odamlar haqida bilib olishimiz mumkin. Shuningdek, bunday fazilatlarni namoyon etmaganlarning misolidan saboq olsak bo‘ladi. (Zab. 37:37; 1 Kor. 10:11)

11. Shoulning ogohlantiruvchi misolidan nimani o‘rganishimiz mumkin?

11 Shoh Shoul bilan nima yuz bergani haqida o‘ylab ko‘ring. U yoshligida imkoniyatlari chegaralanganini biladigan va hatto zimmasiga ko‘proq mas’uliyat olishdan tortinadigan yigit bo‘lgan. (1 Shoh. 9:21; 10:20–22) Biroq vaqt o‘tib Shoul o‘zboshimcha insonga aylangan. Bu illat u shoh bo‘lganidan ko‘p o‘tmay yuzaga chiqa boshlagan. Bir safar Shomuil payg‘ambarni kutishga uning sabri chidamagan. Yahova O‘z xalqining manfaatini ko‘zlab yo‘l tutishiga ishonish o‘rniga, Shoul haqqi bo‘lmagan ishga qo‘l urgan, ya’ni kuydiriladigan qurbonlik keltirgan. Oqibatda Shoul Yahovaning marhamatidan, keyinchalik esa shohligidan ham mahrum bo‘lgan. (1 Shoh. 13:8–14) Agar ushbu ogohlantiruvchi misoldan saboq chiqarib, o‘zboshimcha ish qilishdan qochsak, dono yo‘l tutgan bo‘lamiz.

12. Nega Doniyor yaxshi o‘rnak qoldirgan, deya olamiz?

12 Shoulning yomon o‘rnagidan farqli o‘laroq, Doniyor payg‘ambarning yaxshi o‘rnagiga diqqat qarataylik. Hayoti davomida Doniyor Xudoning kamtar va o‘z haddini biladigan xizmatchisi bo‘lib qolgan hamda doim Yahovadan yo‘l-yo‘riq izlagan. Masalan, Yahova Doniyor orqali Navuxodonosorning tushini ta’birlab berganida, u buni o‘z kuchi bilan qilganini aytmagan. Aksincha, u kamtarlik ila butun shon-sharafni Yahovaga yo‘naltirgan. (Don. 2:26–28) Bundan qanday saboq olishimiz mumkin? Agar imondoshlarimizga nutqlarimizni tinglash yoqsa yoki xizmatda muayyan muvaffaqiyatga erishsak, butun sharafni Yahovaga yo‘naltirishimiz kerakligini yodda tutaylik. Bu ishlarni Yahovaning madadisiz amalga oshira olmasligimizni tan olishimiz lozim. (Filip. 4:13) Bunday yo‘l tutib, Isoning a’lo o‘rnagiga taqlid qilgan bo‘lamiz. Qanday qilib?

13. Yuhanno 5:19, 30 ga ko‘ra, Isodan nimani o‘rganishimiz mumkin?

13 Xudoning mukammal O‘g‘li bo‘lishiga qaramay, Iso Unga tayangan. (Yuhanno 5:19, 30 ni o‘qing.) U hech qachon samoviy Otasiga tegishli hokimiyatga ega bo‘lishga intilmagan. Filippiliklarga 2:6 da aytilganiday, Iso «Xudoga tenglikni qo‘lga kiritishni, aniqrog‘i, Unga teng bo‘lishni xayoliga keltirmagan». Itoatkor O‘g‘il sifatida Iso imkoniyatlari chegaralanganini tushungan va Otasining hokimiyatini hurmat qilgan.

Iso imkoniyatlari chegaralanganini tan olgan (14-xatboshiga qarang.)

14. Isodan uning vakolatiga kirmagan narsani so‘rashganida u qanday javob bergan?

14 Yoqub va Yuhanno ismli shogirdlari onasi bilan birga Isoning yoniga kelib, sharafli vazifalarni ularga berishini so‘rashgan. Bu esa uning vakolatiga kirmagan. Keling, bu vaziyatda u qanday javob berganini ko‘rib chiqaylik. Iso ikkilanmay, Shohligida kim uning o‘ng tomonida-yu kim chap tomonida o‘tirishini faqatgina samoviy Otasi hal qilishini aytgan. (Mat. 20:20–23) Bu bilan Iso imkoniyatlari chegaralanganini tan olganini ko‘rsatgan. U hech qachon Yahovaning aytganidan tashqariga chiqmagan. (Yuhan. 12:49) Isoning a’lo o‘rnagiga qanday taqlid qila olamiz?

Imkoniyatlarimiz chegaralanganini tan olish borasida Isoga qanday taqlid qila olamiz? (15-16-xatboshilariga qarang.) *

15, 16. Korinfliklarga yo‘llangan birinchi maktub 4:6 dagi maslahatni amalda qanday qo‘llasak bo‘ladi?

15 Korinfliklarga yo‘llangan birinchi maktub 4:6 dagi maslahatni amalda qo‘llasak, Isoning o‘rnagiga taqlid qilgan bo‘lamiz. Bu oyatda: «Yozilganlardan tashqariga chiqmanglar»,— deb aytilgan. Shuning uchun, bizdan maslahat so‘rashganida o‘z fikrimizni olg‘a surishni yoki aqlimizga kelgan birinchi narsani aytishni aslo istamaymiz. Buning o‘rniga, insonning diqqatini Muqaddas Kitob va unga asoslangan adabiyotlardagi maslahatlarga qaratishimiz kerak. Shu yo‘sin biz hamma narsani bilmasligimizni tan olayotganimizni namoyon etamiz. Bunday yo‘l tutayotgan bo‘lsak, demak kamtarinmiz, chunki Yahovaning maslahatlari doim biznikidan yaxshiroq ekanini tushunishimizni ko‘rsatamiz. (Vah. 15:3, 4)

16 Yahovaga sharaf keltirishdan tashqari, kamtarlik namoyon etishimizning boshqa sabablari ham bor. Endi kamtarlik va imkoniyatlarimiz chegaralanganini tan olish bizga quvonch keltirishi hamda boshqalar bilan til topishishga qanday yordam berishini ko‘rib chiqamiz.

KAMTARIN BO‘LISH VA HADDIMIZNI BILISHNING FOYDASI

17. Nega kamtarin va haddini biladigan odamlar baxtiyor?

17 Kamtarin bo‘lsak va haddimizni bilsak, baxtiyor bo‘lamiz. Nega? Agar imkoniyatlarimiz chegaralanganini bilsak, boshqalar ko‘rsatgan har qanday yordam uchun minnatdor bo‘lamiz. Masalan, Iso o‘nta moxovni sog‘aytirgan vaziyatni olaylik. Ulardan faqat bittasi Iso ularni dahshatli kasallikdan sog‘aytirgani, ya’ni bu insonning o‘zi hech qachon qila olmaydigan ishni amalga oshirgani uchun minnatdorchilik bildirishga kelgan. Ushbu kamtar va imkoniyatlari chegaralanganini bilgan inson unga ko‘rsatilgan yordam uchun minnatdor bo‘lgan va Xudoni sharaflagan. (Luqo 17:11–19)

18. Kamtar bo‘lish va haddimizni bilish boshqalar bilan til topishishga qanday yordam beradi? (Rimliklarga 12:10)

18 Kamtar va haddini biladigan insonlar boshqalar bilan yaxshi til topishadi hamda yaqin do‘stlarga ega bo‘ladi. Nima uchun? Ular boshqa odamlarda yaxshi xislatlar borligini tan oladi va ularga ishonch bildiradi. Kamtar va haddini biladigan kishilar boshqalar olgan vazifalarini yaxshi bajarishganidan quvonadi hamda ularni maqtab, hurmat ko‘rsatadi. (Rimliklarga 12:10 ni o‘qing.)

19. Mag‘rurlikdan qochishimiz kerakligining ayrim sabablari qanday?

19 Bulardan farqli o‘laroq, mag‘rur kishilarga boshqalarni maqtash qiyin, chunki ular o‘zlari sharaf olishni yoqtirishadi. Ular o‘zlarini boshqalar bilan solishtirib, raqobatlashishga moyil bo‘lishadi. Boshqalarga ta’lim berish va mas’uliyatlarini bo‘lishish o‘rniga, ular: «Ish yaxshi bajarilishini istasang, [ya’ni ularga yoqadigan tarzda] uni o‘zing bajar»,— degan shior bilan yashashadi. Mag‘rur odamlar odatda manman va hasadgo‘y bo‘lishadi. (Galat. 5:26) Kamdan-kam hollarda bunday kishilarning haqiqiy do‘stlari bo‘ladi. Agar o‘zimizda mag‘rurlikka moyillikni payqasak, bu illat ichimizda chuqur ildiz otib ketmasligi uchun Yahovaga ibodat qilib ongimizni yangilashga yordam berishini so‘rashimiz kerak. (Rim. 12:2)

20. Nega kamtar va o‘z haddini biladigan inson bo‘lishimiz lozim?

20 Yahovaning o‘rnagi uchun naqadar minnatdormiz! U xizmatchilariga qanday muomala qilishidan kamtarin ekanini ko‘ryapmiz va Unga taqlid qilishni istaymiz. Qolaversa, Muqaddas Kitobda tilga olingan va Xudoga hamroh bo‘lish sharafiga ega bo‘lgan kamtar kishilarning ajoyib o‘rnagiga ergashishni xohlaymiz. Yahovaga doim shon-sharaf keltiraylik, zero U bunga loyiq! (Vah. 4:11) Shunda biz ham kamtar va o‘z haddini biladigan kishilarni sevuvchi samoviy Otamizga hamroh bo‘la olamiz.

123-QO‘SHIQ Ilohiy tartibga sadoqat-la bo‘ysunamiz

^ 5- x.b. Kamtarin inson shafqatli va rahmdildir. Shu bois, haqli ravishda Yahovani kamtarin, deb ayta olamiz. Ushbu maqoladan Yahovaning o‘rnagidan kamtarlik borasida saboqlar olishimiz mumkinligini bilib olamiz. Qolaversa, shoh Shoul, Doniyor payg‘ambar va Isodan o‘z imkoniyatlari chegaralanganini tan olish borasida nimani o‘rganishimiz mumkinligini ko‘rib chiqamiz.

^ 58- x.b. RASMGA SHARH. Oqsoqol yosh birodarga jamoat hududini taqsimlashni o‘rgatyapti. Keyinroq oqsoqol yosh birodarning har bir qadamini nazorat qilmayapti, balki vazifani qanday bajarishni uning ixtiyoriga qo‘yib beryapti.

^ 62- x.b. RASMGA SHARH. Imondoshimiz oqsoqoldan cherkovda o‘tkaziladigan to‘yga borish-bormaslik haqida maslahat so‘rayapti. Oqsoqol o‘z nuqtai nazarini aytmayapti, aksincha, uning diqqatini Muqaddas Kitobdagi ayrim prinsiplarga qaratyapti.