NEGA HAYOTNI HURMAT QILISH MUHIM?

• Tamaki chekish nafaqat saraton kasalligini keltirib chiqaradi, balki organizmning unga qarshi kurashishini qiyinlashtiradi. O‘pka saratonidan o‘lim holatlarining aksariyati insonning o‘zi yoki atrofdagilari tamaki chekkani tufayli yuz bergan.

• Bir gazetada yozilishicha, maktabda bolalar o‘rtasida zo‘ravonlik holatlarining ko‘payishi maktablar va jamiyat uchun xavf tug‘diryapti. («Jansatta editorial») Ba’zi mamlakatlarda ommaviy otishmalar tez-tez sodir bo‘lyapti. Bu esa ko‘plarga har yili hissiy jarohat yetkazyapti. AQShdagi Stanford universiteti taqdim etgan bir hisobotda shunday aytilgan: «Tadqiqotga ko‘ra, hatto maktabga qilingan hujumlarda omon qolganlar ham hujumdan keyin ancha yillar davomida hissiy hamda ruhiy jarohatlardan aziyat chekishadi».

• Spirtli ichimliklarni yoki giyohvand moddalarni iste’mol qilib mast holatda mashina haydaydigan odamlar boshqa haydovchilarga ham, piyodalarga ham xavf tug‘diradi. Odamlar hayotga hurmatsizlik ko‘rsatishganda, beayb insonlar jabr ko‘rishi mumkin.

 NIMA QILISHINGIZ MUMKIN?

Sog‘ligingizni asrang. Sigaret va veyplarni chekish, ichkilikbozlik yoki notibbiy maqsadda narkotiklarni iste’mol qilish kabi zararli odatlarni tashlash hech qachon kech emas. Bu kabi odatlar nafaqat sizga zarar keltiradi, balki atrofdagilaringizning, jumladan, oila a’zolaringizning hayotini hurmat qilmayotganingizni ham ko‘rsatadi.

Xavfsizlik choralarini ko‘ring. Baxtsiz hodisalarning oldini olish uchun uyingizni ta’mirlangan holatda saqlang. Transport vositangizni xavfsiz haydang va u doimo soz holatda ekaniga ishonch hosil qiling. Boshqalar sizni qandaydir xavfli narsani qilishga undashsa, ularga quloq solmang.

Boshqalarga mehribon bo‘ling. Hayotni hurmat qilish, shuningdek, barcha odamlarga, ularning irqi, millati va ijtimoiy kelib chiqishi qanday bo‘lishidan qat’i nazar, mehribon bo‘lishni ham o‘z ichiga oladi. Nega bu shunchalik muhim? Chunki dunyodagi zo‘ravonlik va urushlar aksar hollarda yuzxotirchilik va nafrat tufayli yuz beradi.