Oilaning zaruriy ehtiyojlarini qondirishda pul muhim o‘ringa ega (Hikmatlar 30:8). Shuningdek, pul qaysidir ma’noda himoya beradi (Voiz 7:12). Ehtimol, pul haqida gap ochish siz uchun oson emasdir, ammo pul nikohga sovuqchilik solishiga yo‘l qo‘ymang (Efesliklarga 4:32). Er-xotin bir-biriga ishonishi zarur va pulni qanday sarflashni muhokama qilayotib, fikrlarini inobatga olishlari kerak.

MUQADDAS KITOBDA NIMA DEYILGAN? «Orangizdan kimdir imorat qurmoqchi bo‘lsa, uni bitirishga mablag‘i yetishini bilish uchun, avvaliga o‘tirib, qancha xarajat ketishini hisoblab olmaydimi?» (Luqo 14:28). Xarajatlarni birgalashib rejalashtirishingiz o‘ta muhim (Amos 3:3). Aynan nima sotib olishingiz kerakligini aniqlab, sharoitingiz bunga yo‘l qo‘yish-qo‘ymasligini hal qiling (Hikmatlar 31:16). Agar biron narsani sotib olishga qurbingiz yetsa ham, uni xarid qilish shart degani emas. Qarzga botib ketishdan ehtiyot bo‘ling. Bor pulingizga yarasha hayot kechiring (Hikmatlar 21:5; 22:7).

FOYDALI MASLAHATLAR

• Zaruriy narsalarni xarid qilgach, ortib qolgan mablag‘ni nima qilishni birga hal qiling.

• Pul yetmayotgan bo‘lsa, xarajatlarni kamaytirish uchun muayyan reja tuzing. Masalan, ko‘chada ovqatlanishdan ko‘ra, ovqatni uyda tayyorlash yaxshiroqdir.

MUQADDAS KITOBDA NIMA DEYILGAN? «Bu ishni faqatgina Yahovaning nazarida emas, balki odamlarning oldida ham halollik bilan bajarishga intilyapmiz» (2 Korinfliklarga 8:21). Qancha pul topib, sarflayotganingizni turmush o‘rtog‘ingizdan yashirmang.

Sarf-xarajat borasida jiddiy qarorlar chiqarayotib, buni doimo umr yo‘ldoshingiz bilan muhokama qiling (Hikmatlar 15:22). Mablag‘ haqida ochiqchasiga suhbatlashish, nikohingizda tinchlik hukm surishiga hissa qo‘shadi. Daromadingizni faqatgina o‘zingizga emas, balki oilangizga tegishli deb biling (1 Timo‘tiyga 5:8).

FOYDALI MASLAHATLAR

• Har biringiz o‘z xohishingiz bo‘yicha qancha pul ishlatishingiz mumkinligini kelishib oling.

• Muammo paydo bo‘lmasidan oldin, pul to‘g‘risida gaplashing.