Shohlar ikkinchi kitob 13:1-39
13 Dovudning o‘g‘li Absalomning Tamara+ ismli go‘zal singlisi bor edi. Dovudning o‘g‘li Omno‘n+ esa uni sevib qoldi.
2 Tamara bokira bo‘lgani bois, Omno‘n uchun unga yaqinlashish imkonsiz bo‘lib ko‘rinardi. Omno‘n bu haqda o‘ylab qattiq jafo chekkanidan kasal bo‘lib qoldi.
3 Omno‘nning Yohunadov+ degan juda mug‘ombir do‘sti bor edi. U Dovudning akasi Shimoxning+ o‘g‘li edi.
4 Yohunadov undan: «Ayting-chi shahzodam, nega doim xomushsiz?» — deb so‘radi. Omno‘n: «Men ukam Absalomning singlisi+ Tamarani sevib qolganman»,— deb aytdi.
5 Yohunadov unga shunday dedi: «O‘rningizga yotib, o‘zingizni kasalga soling. Otangiz sizni ko‘rgani kelganlarida, u kishiga: “Iltimos, singlim Tamara kelib, menga taom tayyorlab bersin. Ko‘z oldimda bemorga beriladigan taomdan pishirib bersa, uning qo‘lidan yegan bo‘lardim”,— deb ayting».
6 Shunday qilib, Omno‘n o‘zini kasalga solib, yotib oldi. Shoh uni ko‘rgani kelganida, Omno‘n shohga: «Iltimos, singlim Tamara kelib, ko‘z oldimda menga ikkita non* pishirib bersin, uning qo‘lidan taom yeyayin»,— deb aytdi.
7 Shunda Dovud Tamaraga: «Akang Omno‘nning uyiga borgin-da, unga taom tayyorlab bergin»,— deb aytish uchun uning uyiga odam yubordi.
8 Tamara to‘shakda yotgan akasi Omno‘nning uyiga bordi. U xamir qorib, akasining ko‘z oldida non yasadi-da, nonlarni* pishirdi.
9 Keyin Tamara ularni tovadan olib, Omno‘nning oldiga qo‘ydi. Lekin Omno‘n yeyishni istamay: «Hammangiz chiqib keting!» — deb buyurdi va hamma chiqib ketdi.
10 Omno‘n Tamaraga: «Taomni yotoqxonaga olib kir, sening qo‘lingdan yeyman»,— dedi. Tamara pishirgan nonlarini olib, akasi Omno‘nning yotoqxonasiga olib kirdi.
11 Tamara, akasi yeyishi uchun nonni yaqin olib kelganida, Omno‘n uni ushlab olib: «Singlim, kel, men bilan yot»,— dedi.
12 Ammo Tamara unga: «Yo‘q, aka! Meni xo‘rlamang! Axir Isroilda bunday qilinmaydi-ku+. Bunday sharmandali ishga qo‘l urmang+.
13 Bu sharmandalik bilan keyin qanday yashayman? Siz ham Isroilda axloqsiz odam degan nom chiqarasiz. Iltimos, shohga ayting, meni sizga berishga qarshi bo‘lmaydilar»,— deb aytdi.
14 Biroq Omno‘n uni tinglashni istamadi. U kuch ishlatib, uning nomusiga tegib xo‘rladi.
15 Bundan so‘ng, Omno‘n Tamaradan qattiq nafratlanib ketdi. Uning nafrati unga bo‘lgan sevgisidan kuchliroq edi. Omno‘n unga: «Tur, yo‘qol bu yerdan!» — dedi.
16 Tamara bo‘lsa: «Yo‘q, akajon, meni haydamang! Bu ishingiz, bundan oldingisidan ham yomonroq-ku!» — deb aytdi. Lekin Omno‘n uni tinglashni xohlamadi.
17 U bir xizmatchi yigitni chaqirib: «Manavini tashqariga chiqarib, orqasidan eshikni bekitib qo‘y»,— dedi.
18 (Qizning egnida shohning bokira qizlari kiyib yuradigan naqshli* kamzuli bor edi.) Omno‘nning xizmatkori uni tashqariga chiqarib yuborib, orqasidan eshikni bekitib qo‘ydi.
19 Tamara boshiga kul sepib+, egnidagi chiroyli kamzulini yirtib tashladi. U qo‘llari bilan boshini ushlab keta boshladi, u yo‘l bo‘yi yig‘lab ketdi.
20 Buni ko‘rib, Absalom+ unga: «Akang Omno‘n seni shu ko‘yga soldimi? Singlim, bu haqda hech kimga aytma. U akang bo‘ladi+. Buni o‘ylab yuraging ezilmasin»,— dedi. Tamara hech kimga qo‘shilmay, akasi Absalomning uyida yashay boshladi.
21 Shoh Dovud bu haqda eshitganida, qattiq jahli chiqdi+. Biroq Omno‘n uning to‘ng‘ichi bo‘lib, uni yaxshi ko‘rgani bois xafa qilgisi kelmadi.
22 Absalom esa Omno‘nga lom-mim demadi, yaxshi so‘z ham, yomon so‘z ham aytmadi. Singlisi Tamarani xo‘rlagani uchun+, Absalom Omno‘nni yomon ko‘rib qoldi+.
23 Ikki yil o‘tgach, Absalom Efrayim+ yaqinidagi Baal-Xazorda qo‘ylarining junini qirqtirayotganda, shohning barcha o‘g‘illarini ziyofatga chaqirdi+.
24 Absalom shohning oldiga kelib: «Xizmatkoringiz qo‘ylarining junini qirqyapti. Iltimos, shoh hazratlari ham xizmatkorlari bilan birga men bilan borsinlar»,— dedi.
25 Lekin shoh Absalomga: «Yo‘q, o‘g‘lim. Agar hammamiz borsak, senga og‘irligimiz tushadi»,— deb aytdi. Absalom ko‘ndirishga qancha urinmasin, u rozi bo‘lmadi. O‘zi bormasa ham, uni duo qildi.
26 Shunda Absalom shohga: «Agar siz bormasangiz, akam Omno‘n biz bilan borsin»+,— dedi. Shoh bo‘lsa: «Nega aynan Omno‘n sen bilan borishi kerak?» — deb so‘radi.
27 Absalom yalinib so‘rayverganidan, shoh Omno‘nni va barcha o‘g‘illarini u bilan birga yubordi.
28 Absalom xizmatkorlariga: «Kuzatib turinglar. Omno‘n sharob ichib, dimog‘i chog‘ bo‘lganida, men sizlarga: “Omno‘nni o‘ldiringlar!” — deb buyuraman. Shu zahoti uni o‘ldiringlar. Qo‘rqmanglar, chunki bu buyruqni men beryapman. Dadil va botir bo‘linglar»,— deb aytdi.
29 Absalomning xizmatkorlari u buyurganiday, Omno‘nni o‘ldirishdi. Buni ko‘rgan shohning barcha o‘g‘illari darhol o‘rinlaridan turib, xachirlariga minishdi-da, qochib ketishdi.
30 Ular hali yo‘lda kelayotganda, Dovudga: «Absalom shohning hamma o‘g‘illarini o‘ldiribdi, hech biri tirik qolmabdi»,— degan xabar yetdi.
31 Bu haqda eshitishi bilan, shoh o‘rnidan turdi-da, kiyimlarini yirtib, o‘zini yerga otdi. Yonida turgan xizmatkorlari ham kiyimlarini yirtishdi.
32 Ammo Dovudning akasi Shimoxning+ o‘g‘li Yohunadov+ shunday dedi: «Shoh hazratlari barcha o‘g‘illarim o‘libdi, deb o‘ylamasinlar, faqat Omno‘n o‘ldi+. Uni Absalomning buyrug‘i bilan o‘ldirishdi+. Singlisi Tamarani+ Omno‘n xo‘rlagandan+ keyin shunday qilishni Absalom yuragiga tugib qo‘ygan ekan.
33 Shu bois: “Shohning hamma o‘g‘illari o‘libdi”,— degan xabarga shoh hazratlari ishonmasinlar*. Faqat Omno‘n o‘ldi, xolos».
34 Bu orada, Absalom qochib ketdi+. Biroz o‘tgach, qo‘riqchi boshini ko‘tarib, tog‘ning etagidagi yo‘ldan bir gala odam kelayotganini ko‘rib qoldi.
35 Shunda Yohunadov+: «Qarang, shoh o‘g‘illari qaytishyapti! Xizmatkoringizning aytganlari to‘g‘ri chiqdi»,— dedi.
36 U gapini tugatishi bilan, shoh o‘g‘illari uvvos tortib yig‘lab kirib kelishdi. Shoh bilan barcha xizmatkorlari ham dod solib yig‘lashdi.
37 Absalom, Gashur shohi Omihud o‘g‘li Talmayning+ oldiga qochib ketdi. Dovud uzoq vaqt o‘g‘li Omno‘n uchun motam tutdi.
38 Absalom Gashurga+ qochib ketgach, o‘sha yerda uch yil yashab yurdi.
39 Dovud Omno‘nning o‘limiga ancha ko‘nikkanidan so‘ng, oxiri Absalomni juda sog‘indi.
Izohlar
^ So‘zma-so‘z «yurak shaklida non».
^ Ehtimol, non singari tandirda emas, balki ko‘p miqdordagi yog‘da ko‘pchib pishgan kulchaga o‘xshash bo‘lgan.
^ Yoki «o‘zgacha».
^ So‘zma-so‘z «yuraklariga olmasinlar».
