Shohlar ikkinchi kitob 19:1-43
19 Yo‘abga: «Shoh Absalom uchun yig‘lab, qayg‘u chekyapti»+,— degan xabarni yetkazishdi.
2 Shoh Dovud o‘g‘li uchun qattiq qayg‘urayotganini xalq eshitdi va o‘sha kungi g‘alaba azaga aylandi.
3 Jang maydonidan qochib sharmanda bo‘lgan askarlarday, o‘sha kuni xalq shaharga shovqin solmay qayta boshladi+.
4 Shoh esa yuzini yopib olgancha: «Voy, o‘g‘lim Absalom! O‘g‘lim, o‘g‘ilginam Absalom!» — deya ho‘ngrab yig‘lardi+.
5 Yo‘ab shohning uyiga borib, unga dedi: «Siz bugun barcha xizmatkorlaringizni uyatga qo‘ydingiz. Axir ular sizning, o‘g‘il-qizlaringizning+ hamda xotinlaringiz-u kanizaklaringizning+ hayotini saqlab qolishdi-ku!
6 Siz o‘zingizdan nafratlanganlarni yaxshi ko‘rib, sizni yaxshi ko‘radiganlardan esa nafratlanyapsiz. Chunki bugun lashkarboshi va xizmatkorlaringiz siz uchun hech qanday qadr-qimmatga ega emasligini ko‘rsatdingiz. Bordi-yu, bugun Absalom tirik qolib, barchamiz o‘lib ketganimizda, siz uchun yaxshiroq bo‘lardi! Men shunga amin bo‘ldim.
7 Endi o‘rningizdan turing-da, borib xizmatkorlaringizga dalda bering. Yahova haqqi qasam ichib aytamanki, agar bunday qilmasangiz, kechgacha yoningizda bitta ham odam qolmaydi. Bu, yoshligingizdan to bugunga qadar boshingizga tushgan ko‘rgiliklardan eng yomoni bo‘ladi».
8 Shunda shoh o‘rnidan turdi-da, shahar darvozasi oldiga borib o‘tirdi. Butun xalqga: «Shoh shahar darvozasi oldida o‘tiribdi»,— deb xabar berildi. So‘ng xalq shohning oldiga keldi.
Qolgan isroilliklar* esa uylariga qochib ketishdi+.
9 Isroilning barcha qabilalaridan bo‘lgan odamlar, o‘zaro bahslashib: «Shoh bizni dushmanlardan xalos etdi+, filistimliklardan qutqardi. Hozir esa Absalomni deb boshqa yerda qochib yuribdi+.
10 Biz shoh etib tayinlagan* Absalom+ jangda halok bo‘ldi+. Endi bo‘lsa, shohni orqaga qaytarish uchun nega hech nima qilmayapmiz?» — deyishardi.
11 Shoh Dovud ruhoniylar Zodo‘x+ bilan Abuatarga+ shunday xabar yubordi: «Yahudo+ oqsoqollari bilan gaplashib, ularga quyidagini aytinglar: “Butun Isroil orasida aytilayotgan gap shoh yashab turgan joygacha yetdi. Nega sizlar shohni saroyga qaytarmay, imillab o‘tiribsizlar?
12 Sizlar mening birodarlarim, qon-qardoshimsiz-ku*. Shunday ekan, shohni qaytarmay, imillab o‘tirishingiz yaxshi emas”.
13 Emosaga+ bo‘lsa: “Sen mening qon-qardoshimsan. Agar bugun seni Yo‘abning o‘rniga lashkarboshi etib tayinlamasam, Tangri meni ne ko‘yga solsa solsin, undan battarrog‘ini ham qilsin!”+ — deb aytinglar».
14 Shunday qilib, Dovud barcha yahudoliklarning qalbini o‘ziga moyil qilib oldi va ular shohga: «Xizmatkorlaringiz bilan qaytib keling»,— deb xabar yuborishdi.
15 Shoh yo‘lga tushib, Iordanga yetib keldi. Yahudoliklar esa shohni qarshi olib, Iordan daryosidan o‘tkazish uchun Gilgalga+ kelishdi.
16 Boxurimda yashovchi Benyamin qabilasidan bo‘lgan Geraning o‘g‘li Shimey+ ham yahudoliklarga qo‘shilib, shoh Dovudni kutib olish uchun shoshildi.
17 Shimeyning yonida Benyamin qabilasidan 1 000 kishi bor edi. Shoul xonadonida xizmatkor bo‘lgan Zibax+ ham 15 ta o‘g‘li va 20 ta xizmatkorini olib, shohdan oldin Iordanga yetib keldi.
18 U* shoh xonadonidagilarni daryodan o‘tkazish hamda shohning istaklarini bajo keltirish uchun daryoning kechuv joyidan o‘tdi. Gera o‘g‘li Shimey bo‘lsa, daryoni kechib o‘tmoqchi bo‘lib turgan shohning oyoqlari ostiga yiqildi.
19 Shimey shohga dedi: «Taqsirim meni aybdor deb hisoblamasinlar. Shoh hazratlari Quddusdan chiqib ketayotgan kuni xizmatkorining sodir etgan qilmishini eslamasinlar+. Shohim buni ko‘ngillariga olmasinlar,
20 zero xizmatkoringiz gunoh qilganini yaxshi biladi. Shu sababli, bugun shoh hazratlarini kutib olish uchun Yusuf xonadonidagilardan birinchi bo‘lib keldim».
21 Shunda Zeruya+ o‘g‘li Abushay+: «Yahovaning moylanganini qarg‘agani uchun, Shimeyni o‘ldirish kerak emasmi?»+ — dedi.
22 Ammo Dovud: «Ey, Zeruya o‘g‘illari+, nega mening ishimga aralashib, bugun menga qarshi chiqyapsizlar? Bugun Isroilda odam o‘ldiriladigan kunmi? Axir bugun men qaytadan Isroilga shoh etib tayinlandim-ku!» — deb aytdi.
23 Keyin shoh Shimeyga: «Sen o‘lmaysan»,— deb qasam ichdi+.
24 Shoulning nevarasi Mefibosit+ ham shohni qarshi olish uchun keldi. Shoh ketgan kundan to eson-omon qaytmaguniga qadar, Mefibosit soqolini* tartibga keltirmagan, oyoqlarini va kiyimlarini ham yuvmagan edi.
25 U shohni kutib olish uchun Quddusga kelganida, shoh undan: «Mefibosit, nega men bilan birga ketmading?» — deb so‘radi.
26 U javoban dedi: «Shoh hazratlari, cho‘loq+ ekanimni yaxshi bilasiz. Shu bois, men xizmatkorimga+: “Eshagimni egarla, unga minib shoh bilan birga ketaman”,— deb aytdim, ammo u meni aldab ketdi.
27 U shoh hazratlarining oldida xizmatkoringizga tuhmat qildi+. Lekin shoh hazratlari Xudoning farishtasiday dono. Shunday ekan, nazaringizda to‘g‘ri bo‘lgan ishni qiling.
28 Otamning butun xonadoni shoh hazratlari tomonidan o‘limga mahkum etilishi kerak edi. Ammo siz xizmatkoringizga dasturxoningizdan taom yeydiganlar qatoridan joy berdingiz+. Sizdan yana biror narsa so‘rashga nima haqqim bor?»
29 Lekin shoh unga: «Bu gaplarning nima keragi bor?! Mening qarorim shu: “Zibax ikkovingiz yerni bo‘lib olinglar”+,— dedi».
30 Bunga Mefibosit shohga: «Hammasini u olaversin. Muhimi, shoh hazratlari o‘z uylariga eson-omon yetib keldilar»,— deb aytdi.
31 So‘ng giladlik Borzulay+ ham shohni Iordan daryosidan o‘tkazish uchun Ro‘g‘olimdan Iordanga keldi.
32 Borzulay 80 yoshga kirgan qari kishi edi. U juda ham boy kishi bo‘lib, shoh Moxanayimda turganida, uni oziq-ovqat bilan ta’minlagan edi+.
33 Shoh Borzulayga: «Men bilan birga daryoni kechib o‘ting. Quddusda o‘zim sizni oziq-ovqat bilan ta’minlayman»+,— dedi.
34 Lekin Borzulay shohga shunday dedi: «O‘zi qancha umrim qoldiki, shoh bilan birga Quddusga borsam?
35 Yoshim ham 80 ga borib qoldi+. Men yaxshi bilan yomonning farqiga bormayman. Yeb-ichgan narsamning mazasini bilmayman. Erkak va ayol qo‘shiqchilarning+ ovozini farqlay olmayman. Shunday ekan, men xizmatkoringiz shoh hazratlariga ortiqcha yuk bo‘lib nima qilaman?
36 Shohim, meni mukofotlashning hojati yo‘q. Sizni Iordangacha kuzatib qo‘yishning o‘zi men uchun sharaf!
37 Iltimos, xizmatkoringizning qaytishiga ruxsat bering. Men o‘z shahrimda vafot etib, ota-onam dafn etilgan joyga qo‘yilayin+. Shoh hazratlari bilan birga xizmatkoringiz Ximxam daryoni kechib o‘tsin+. Nimani niyat qilgan bo‘lsangiz, unga qiling».
38 Shunda shoh unga: «Mayli, Ximxam men bilan daryoni kechib o‘tsin va bu bilan sizning niyatingizni bajarayin. Mendan nimaiki so‘rasangiz, istaganingizni bajaraman»,— dedi.
39 Butun xalq Iordanni kechib o‘ta boshladi. Shoh Borzulayni o‘pib+, duo qilgach, daryoni kechib o‘tdi. Borzulay esa o‘z uyiga qaytib ketdi.
40 Shoh daryoni kechib o‘tib, Gilgalga+ yo‘l oldi. U bilan birga Ximxam, shuningdek, yahudoliklar bilan isroilliklarning yarmi daryoni kechib o‘tdi+.
41 Keyin barcha isroilliklar shohning oldiga kelib, unga: «Nega yahudolik birodarlarimiz sizni yashirincha olib ketib, sizni, xonadoningiz ahlini hamda barcha odamlaringizni Iordan daryosidan o‘tkazdilar?»+ — deyishdi.
42 Yahudoliklar ularga: «Chunki shoh bizning qarindoshimiz bo‘ladi+. Nega bizdan jahlingiz chiqyapti? Biz shohning biror narsasini yeb qo‘ydikmi yoki bizga qandaydir sovg‘a berildimi?» — deb javob berishdi.
43 Biroq isroilliklar yahudoliklarga: «Biz o‘nta qabilamiz, shu bois, sizlarga qaraganda Dovudda ko‘proq bizning haqqimiz bor. Shunday ekan, nega bizni nazar-pisand qilmadingizlar? Shohimizni biz birinchi bo‘lib orqaga qaytarishimiz kerak emasmidi?» — deb aytishdi. Lekin isroilliklardan ko‘ra, yahudoliklarning gapi ustun keldi*.
Izohlar
^ Ya’ni Absalomni qo‘llab-quvvatlaganlar.
^ So‘zma-so‘z «moylagan».
^ So‘zma-so‘z «etu suyagimsiz-ku».
^ Boshqa variant «Ular».
^ Yoki «mo‘ylovini».
^ Yoki «yahudoliklar qo‘polroq gapirishdi».
