Shohlar to‘rtinchi kitob 8:1-29
8 Bir kuni Elishay o‘zi tiriltirgan bolaning onasiga+: «Turing, xonadoningiz bilan birga istagan joyingizga borib, o‘sha yerda musofir bo‘lib yashang. Chunki Yahova bu yurtda yetti yil ocharchilik bo‘lishini aytdi»+,— dedi.
2 Ayol haq Xudoning odami aytganiday qilib, o‘rnidan turdi-da, xonadoni bilan birga filistimliklar+ yurtiga borib, u yerda yetti yil yashadi.
3 Yetti yil o‘tgach, ayol filistimliklar yurtidan qaytib kelib, uyi va dalasini shohdan so‘rash uchun uning huzuriga bordi.
4 Bu paytda shoh, haq Tangri odamining xizmatchisi Gaxazi bilan gaplashib, undan: «Elishay amalga oshirgan barcha buyuk ishlari+ haqida menga aytib ber»,— deb so‘rab turgan edi.
5 Gaxazi shohga Elishay o‘lgan bolani qanday tiriltirgani+ to‘g‘risida so‘zlab berayotganda, o‘sha bolaning onasi uyi bilan dalasini so‘ragani keldi+. Uni ko‘rib Gaxazi: «Shoh hazratlari, Elishay tiriltirgan bola shu ayolning o‘g‘li»,— dedi.
6 Shoh ayoldan o‘sha voqea haqida so‘radi va u barini aytib berdi. Keyin shoh saroy amaldorlaridan birini chaqirib: «Uning butun mulkini va yurtni tark etgan kunidan to bugunga qadar dalasidan tushgan daromadning hammasini qaytarib ber»,— deya tayinladi.
7 Suriya shohi Banhadad+ kasal bo‘lganida, Elishay Damashqga+ keldi. Shohga: «Bu yerga haq Xudoning odami+ kelibdi»,— deya xabar berishdi.
8 Shoh Xazayilga+: «O‘zing bilan sovg‘a-salom olib, haq Tangrining odamini+ kutib olgani chiq. Unga ayt, bu kasallikdan tuzalish-tuzalmasligimni Yahovadan so‘rab bersin»,— dedi.
9 Xazayil Damashqning turli xil in’omlaridan olib, 40 ta tuyaga yukladi-da, yo‘lga chiqdi. U Elishayning oldiga kelib: «Suriya shohi, o‘g‘lingiz Banhadad sizdan: “Men bu kasallikdan forig‘ bo‘lamanmi yoki yo‘qmi?” — deb so‘rash uchun meni yubordi»,— dedi.
10 Elishay Xazayilga: «Borib, shohga: “Albatta tuzalasiz”,— deb ayt. Ammo Yahova menga u albatta o‘lishini ayon qildi»+,— deya javob berdi.
11 Keyin Elishay unga tik qarab turaverdi. Shunda Xazayil o‘zini noqulay his qildi. So‘ngra haq Xudoning odami yig‘lab yubordi.
12 Xazayil undan: «Taqsirim nega yig‘layaptilar?» — deb so‘radi. Javoban u: «Boisi, sen Isroil xalqiga qanday jabr-zulm o‘tkazishingni bilaman+. Sen ularning mustahkam shaharlariga o‘t qo‘yib, baquvvat kishilarini qilichdan o‘tkazasan, farzandlarini chopib o‘ldirasan, homilador ayollarining esa qornini yorib tashlaysan»+,— dedi.
13 Xazayil: «Ko‘ppakdan farq qilmaydigan men, xizmatkoringiz, kim bo‘libmanki, bunday ishlarni qilsam?!» — deb aytdi. Lekin Elishay: «Yahova sen Suriya shohi bo‘lishingni menga ayon qildi»+,— dedi.
14 Xazayil Elishayning oldidan chiqib, xo‘jayini huzuriga yo‘l oldi. Shoh undan: «Elishay nima dedi?» — deya so‘radi. Xazayil: «U menga albatta tuzalishingizni aytdi»+,— deb javob berdi.
15 Ammo ertasi kuni Xazayil choyshabni olib, suvga botirdi-da, shohning yuziga yopib, nafasi qisilib o‘lguncha ushlab turdi+. O‘rniga esa o‘zi shoh bo‘lib oldi+.
16 Isroil shohi Axabning o‘g‘li Yohuram+ hukmronligining beshinchi yili, Yohushafat o‘g‘li Yohuram+ Yahudo shohi bo‘ldi.
17 U taxtga o‘tirganida 32 yoshda edi va Quddusda sakkiz yil shohlik qildi.
18 U Axabning qiziga uylangani sababli+, Axabning xonadoni singari+ Isroil shohlari yo‘lidan yurdi+ va Yahovaning nazarida yovuz ishlar qilib keldi+.
19 Biroq Yahova O‘z xizmatchisi Dovud haqqi-hurmati Yahudo shohligini yo‘q qilishni istamadi+. Chunki Dovudga, uning va o‘g‘illarining chirog‘ini hech qachon o‘chirmaslikka va’da bergan edi+.
20 Yohuram davrida edomliklar Yahudoga qarshi isyon ko‘tarib+, o‘zlariga shoh tayinlashdi+.
21 Shunda Yohuram butun jang aravalari bilan Zoirga bordi va tunda turib, ularni qurshab turgan edomliklar va jang aravalari qo‘mondonlarini tor-mor qildi. Edomlik askarlar esa o‘z chodirlariga qochib ketishdi.
22 Lekin edomliklar shu kunga qadar Yahudoga qarshi isyon ko‘tarib kelmoqda. Libna+ ham o‘shanda isyon ko‘targan edi.
23 Yohuramning hayoti va qilgan barcha ishlari Yahudo shohlari tarixi yozilgan kitobda bayon etilgan.
24 So‘ng Yohuram vafot etib, ota-bobolariga qo‘shildi va Dovud shahrida+, ota-bobolari yoniga dafn etildi. O‘rniga o‘g‘li Oxaziyo+ shoh bo‘ldi.
25 Yohuram o‘g‘li Oxaziyo, Isroil shohi Axabning o‘g‘li Yohuram hukmronligining 12- yili Yahudo taxtiga o‘tirdi+.
26 Oxaziyo 22 yoshida shoh bo‘lib, Quddusda bir yil hukmronlik qildi. Onasining ismi Otaliyo bo‘lib+, u Isroil shohi Omrining+ nevarasi edi.
27 Oxaziyo Axabning qiziga uylangani sababli, Axabning+ xonadoni yo‘lidan yurib, Yahovaning nazarida yovuz ishlar qildi+.
28 Shu bois, u Axabning o‘g‘li Yohuramga qo‘shilib, Suriya shohi Xazayil bilan jang qilgani Ramo‘t-Giladga+ bordi. Lekin suriyaliklar Yohuramni+ yarador qilishdi.
29 Shu tariqa, Axabning o‘g‘li Yohuram Ramada Suriya shohi Xazayil bilan jang qilganida yaralandi va davolanish uchun Yizrilga+ qaytdi+. U kasal bo‘lib yotganda, Yahudo shohi Yohuramning o‘g‘li Oxaziyo uni ko‘rgani Yizrilga bordi.
