Chiqish 24:1-18
24 Keyin Yahova Musoga: «Sen, Horun, Nadov, Abihu+ va Isroilning 70 ta oqsoqoli tog‘ga chiqib, olisdan Menga sajda qilinglar.
2 Faqat sen — Muso, Menga — Yahovaga yaqinlashgin, boshqalar yaqinlashmasin, xalq esa sen bilan birga tog‘ga chiqmasin»+,— dedi.
3 So‘ng Muso kelib Yahovaning barcha so‘zlari va qonun-qoidalarini xalqga aytib berdi+. Shunda butun xalq bir ovozdan: «Yahovaning hamma aytganlarini bajaramiz»+,— deb aytdi.
4 Muso Yahovaning barcha so‘zlarini yozib qo‘ydi+. Tong saharda esa o‘rnidan turib, tog‘ etagida qurbongoh bunyod etdi va Isroilning 12 ta qabilasi soniga yarasha 12 ta yodgorlik toshini o‘rnatdi.
5 Bundan keyin Muso Isroil o‘g‘illari orasidan yigitlarni yubordi va ular kuydiriladigan qurbonliklar keltirishdi hamda tinchlik qurbonliklari sifatida buqalarni Yahovaga qurbon qilishdi+.
6 Keyin Muso qonning yarmini olib, kosalarga quydi, qolgan qonni esa qurbongohga sachratdi.
7 So‘ng u ahd kitobini* oldi-da, xalqga o‘qib berdi+. Ular bo‘lsa: «Yahovaning hamma aytganlarini bajaramiz, itoatkor bo‘lamiz»+,— deyishdi.
8 Shunda Muso qonni olib xalq ustiga sachratdi-da+: «Bu — Yahova sizlar bilan shu so‘zlar asosida qilgan ahd qoni»+,— deb aytdi.
9 Keyin Muso, Horun, Nadov, Abihu va Isroilning 70 ta oqsoqoli tog‘ga chiqib,
10 Isroil xalqining Xudosini ko‘rishdi+. Uning oyog‘i ostida sapfirga o‘xshash, osmonday musaffo bir narsa to‘shalgan edi+.
11 Tangri Isroilning tanlangan ushbu kishilariga ziyon yetkazmadi+. Ular yeb-ichib o‘tirgan paytda vahiyda haq Xudoni ko‘rishdi.
12 Bundan so‘ng Yahova Musoga: «Tog‘ga, Mening oldimga chiqib, o‘sha yerda qol. Men senga tosh lavhalar beraman va ularga xalqqa ta’lim berish uchun qonun va amrlarni yozib qo‘yaman»+,— dedi.
13 Muso yordamchisi Yoshua+ bilan birga o‘rnidan turdi va Muso haq Tangrining tog‘iga chiqdi+.
14 Oqsoqollarga bo‘lsa Muso: «Biz qaytib kelmagunimizcha, shu yerda kutib turinglar+. Horun va Xur sizlar bilan qolishadi+. Kimdir biror masalani hal qilmoqchi bo‘lsa, ularga murojaat etsin»+,— deb aytdi.
15 Muso tog‘ga chiqqanida, tog‘ni bulut qoplab turardi+.
16 Yahovaning ulug‘vorligi+ Sinay tog‘i+ ustida bo‘lib, tog‘ni olti kun bulut qoplab turdi. Yettinchi kuni U bulut ichidan Musoga murojaat qildi.
17 Yahovaning ulug‘vorligini kuzatib turgan Isroil xalqiga tog‘ cho‘qqisi lovullab turgan olov kabi ko‘rindi.
18 Keyin Muso bulut ichiga kirib, tog‘ tepasiga chiqdi+. U 40 kecha-yu 40 kunduz tog‘da qoldi+.
Izohlar
^ Bu kitobda Chq 20:22–23:33- oyatlardagi qonunlar qayd etilgan bo‘lishi mumkin.
