Chiqish 4:1-31
4 Biroq Muso: «Bordi-yu, ular: “Yahova senga zohir bo‘lmagan”,— deb, menga ishonmay, gaplarimga quloq solishmasa-chi?»+ — dedi.
2 Yahova undan: «Qo‘lingdagi nima?» — deb so‘radi. U: «Tayoq»,— deb javob berdi.
3 Xudo: «Uni yerga tashla»,— dedi. Muso tayoqni yerga tashlagan edi, tayoq ilonga aylanib qoldi+. Muso ilondan o‘zini olib qochdi.
4 Ammo Yahova: «Qo‘lingni uzatib, uning dumidan ushla»,— deb aytdi. Muso qo‘lini uzatib, uni ushlagan edi, ilon uning qo‘lida yana tayoqga aylanib qoldi.
5 Keyin Xudo: «Shunday qilsang, ular senga ota-bobolaring Xudosi, Ibrohim, Is’hoq va Yoqubning Tangrisi Yahova+ zohir bo‘lganiga ishonishadi»+,— dedi.
6 So‘ng Yahova: «Qo‘lingni qo‘yningga tiq»,— deb aytdi. Muso qo‘lini qo‘yniga tiqib chiqargan edi, qo‘li pes kasalligiga* chalinib, qorday oppoq bo‘lib qoldi+.
7 Xudo unga: «Qo‘lingni qaytadan qo‘yningga tiq»,— dedi. Muso qo‘lini qo‘yniga tiqib qayta chiqargan edi, qo‘li avvalgi holiga qaytdi.
8 Tangri unga shunday dedi: «Agar ular senga ishonmay, birinchi mo‘jizaga parvo qilishmasa, ikkinchisiga albatta ishonishadi+.
9 Bordi-yu, ular hatto shu ikkala mo‘jizaga ham ishonmay, so‘zlaringga quloq solishmasa, unda Nil daryosidan suv olib, yerga to‘k. Shunda yerga to‘kilgan suv qonga aylanadi»+.
10 Muso bo‘lsa Yahovaga: «Meni kechir Yahova, lekin men hech qachon — avval ham, men quling bilan so‘zlashishni boshlaganingdan buyon ham — gapga chechan bo‘lgan emasman. Chunki men yaxshi gapira olmayman, gapga chechan odam emasman»+,— deb aytdi.
11 Ammo Yahova unga: «Odamga tilni kim bergan? Axir uni soqov, kar, ko‘r yoki ko‘ra oladigan qiluvchi Men, Yahova emasmanmi?
12 Shunday ekan, bor! Gapirayotganingda senga yordam berib, nima deyishingni o‘rgatib turaman»+,— dedi.
13 Biroq Muso: «Meni kechir Yahova, o‘rnimga boshqa kishini yubora qol»,— deya iltimos qildi.
14 Shunda Yahova Musodan achchiqlanib, dedi: «Levi qabilasidan bo‘lgan akang Horun-chi?+ U gapga chechan ekanini bilaman. Hozir u sen tomonga qarab kelyapti. Seni ko‘rganda uning qalbi quvonchga to‘ladi+.
15 Sen u bilan gaplashib, so‘zlarimni yetkaz+. Men esa sizlar gapirganingizda, sen hamda u bilan birga bo‘lib+, nima qilishni o‘rgatib turaman.
16 U sening o‘rningga xalqga gapirib, vakiling bo‘ladi va sen u uchun Xudo kabi* bo‘lasan+.
17 Bu tayoqni o‘zing bilan ol, u bilan mo‘jizalar ko‘rsatasan»+.
18 Xullas, Muso qaynatasi Yatroning+ oldiga keldi-da: «Misrdagi birodarlarim oldiga borib, ularning ahvolini bilib kelishimga ruxsat bering»,— dedi. Yatro Musoga: «Eson-omon boring»,— deb aytdi.
19 Bundan so‘ng, Muso hali Midiyon yurtida bo‘lganida Yahova unga: «Misrga qaytib bor, chunki joningni olmoqchi bo‘lganlarning hammasi o‘ldi»+,— dedi.
20 Shu tariqa Muso xotini va o‘g‘illarini eshakka mindirib, Misr yurtiga jo‘nadi. Muso haq Tangri olishni buyurgan tayoqni ham o‘zi bilan oldi.
21 Yahova Musoga bunday dedi: «Men senga mo‘jizalar ko‘rsatish qudratini ato etdim. Misrga qaytib borganingda, ularning hammasini fir’avn oldida ko‘rsat+. Men esa uning yuragi tosh bo‘lishiga yo‘l qo‘yaman+ va u xalqimni qo‘yib yubormaydi+.
22 Sen fir’avnga: “Yahova: “Isroil Mening o‘g‘lim, to‘ng‘ichimdir+.
23 Shunday ekan, Menga xizmat qilishi uchun o‘g‘limni qo‘yib yubor. Bordi-yu, uni qo‘yib yubormasang, sening o‘g‘lingni, to‘ng‘ichingni o‘ldiraman”,— deb aytdi”+,— degin».
24 Yo‘lda tunash uchun to‘xtagan joylarida, Yahova*+ unga duch kelib, uni o‘ldirmoqchi bo‘ldi+.
25 Ammo Zippura+ o‘tkir toshni* oldi-da, o‘g‘lini sunnat qilib: «Sen mening qon kuyovimsan»,— deya sunnat terisini uning* oyoqlari ostiga tashladi.
26 Shunda Xudo uni qo‘yib yubordi. Zippura sunnat qilgani uchun: «Qon kuyovim»,— deb aytdi.
27 Yahova Horunga: «Musoni qarshi olish uchun sahroga bor»+,— dedi. U yo‘lga chiqdi va haq Tangrining tog‘i+ oldida Musoni uchratib, u bilan o‘pishib ko‘rishdi.
28 Muso uni yuborgan Yahovaning barcha so‘zlarini hamda qanday mo‘jizalar+ ko‘rsatishni buyurganini Horunga aytib berdi+.
29 So‘ngra Muso bilan Horun borib, Isroil xalqining hamma oqsoqollarini yig‘ishdi+.
30 Horun ularga Yahovaning Musoga aytgan barcha gaplarini so‘zlab berdi. Muso xalqning ko‘z oldida o‘sha mo‘jizalarni ko‘rsatdi+.
31 Shunda xalq Musoga ishondi+. Yahova ularga e’tibor qaratib+, tortayotgan azoblarini+ ko‘rganini eshitishganda, Isroil o‘g‘illari yuztuban tiz cho‘kib, ta’zim qilishdi.
Izohlar
^ Lug‘atdagi «moxov kasalligi» so‘ziga q.
^ Yoki «Xudoning vakili».
^ Ayrim qo‘lyozmalarga ko‘ra «Yahovaning farishtasi».
^ Yoki «chaqmoqtosh pichoq».
^ Farishta nazarda tutilgan bo‘lishi mumkin.
