Ester 5:1-14
5 Uchinchi kuni+ Ester shohona liboslarini kiydi va shoh saroyining ichki hovlisiga, shoh uyining qarshisiga borib turdi. Bu paytda shoh o‘z saroyida — kiraverishning ro‘parasidagi taxtda o‘tirgan edi.
2 U malika Ester hovlida turganini ko‘rishi bilanoq, malika uning nazarida marhamat topdi. Shoh qo‘lidagi oltin saltanat hassasini Ester tomonga uzatdi+. U yaqinlashib, saltanat hassasining uchiga qo‘l tekkizdi.
3 Shoh unga: «Malikam Ester, qanday masala bilan kelding? Tilaging nima? Hatto shohlikning yarmini so‘rasang ham beraman!» — dedi.
4 Ester: «Agar shoh hazratlari ma’qul deb bilsalar, men shohim uchun tayyorlab qo‘ygan ziyofatga bugun Xomon+ bilan birga kelsinlar»,— deb aytdi.
5 Shoh odamlariga: «Esterning tilagiga ko‘ra, Xomonni tezda chaqirib kelinglar»,— deb buyurdi. Shunday qilib, shoh Xomon bilan Ester tayyorlab qo‘ygan ziyofatga bordi.
6 Ular sharob ichib o‘tirishganda, shoh Esterga: «Qanday iltimosing bor? Uni bajo keltiraman. Tilaging nima? Hatto shohligimning yarmini so‘rasang ham beraman!»+ — deb aytdi.
7 Ester unga javob berib dedi: «Iltimosim, tilagim shuki,
8 agar nazaringizda iltifot topgan bo‘lsam, shoh hazratlari iltimosim va tilagimni bajarishni ma’qul deb bilsalar, ertaga Xomon bilan birga men ular uchun tayyorlaydigan ziyofatga kelsinlar. Tilagimni ertaga aytaman».
9 O‘sha kuni Xomon ziyofatdan xursand va dimog‘i chog‘ bo‘lib chiqdi. Ammo shoh saroyining darvozasi oldida o‘tirgan Mordaxayga ko‘zi tushdi va u o‘rnidan turmaganini, hatto qo‘zg‘alib ham qo‘ymaganini ko‘rib g‘azabga to‘ldi+.
10 Lekin Xomon o‘zini bosdi va uyiga ketdi. So‘ng do‘stlari bilan xotini Zareshni+ chaqirtirdi.
11 Xomon ularga mislsiz boyligi, o‘g‘illarining ko‘pligi+ va shoh uning martabasini ko‘tarib, beklari-yu xizmatkorlaridan yuksaltirgani haqida aytib maqtandi+.
12 Xomon yana shularni qo‘shib qo‘ydi: «Bundan tashqari, malika Ester o‘zi tayyorlagan ziyofatga shoh bilan mendan boshqa hech kimni taklif qilmadi+. Ertangi ziyofatga ham shoh bilan birga taklif etilganman+.
13 Ammo yahudiy Mordaxay shoh saroyining darvozasi oldida o‘tirganini ko‘rar ekanman, bularning hech biri ko‘nglimga sig‘maydi».
14 Shunda xotini Zaresh bilan barcha do‘stlari unga: «Balandligi 50 tirsak* keladigan ustun o‘rnating-da, ertalab shohning oldiga boring va Mordaxayni shu ustunga osishlarini so‘rang+. So‘ng shoh bilan birga ziyofatga borib kayf-safo qilaverasiz»,— deyishdi. Bu maslahat Xomonga ma’qul keldi va u ustun o‘rnattirdi.
Izohlar
^ Taxm. 22,3 m. Ilovaning B14 mavzusiga q.
