Hakamlar 10:1-18
10 Abumalekning o‘limidan so‘ng, Isroil xalqini qutqarish uchun Issaxor qabilasidan To‘lo chiqdi+. U Efrayimning tog‘li hududidagi Shomirda yashardi. To‘lo Do‘do‘ning nevarasi, Puvaxning o‘g‘li edi.
2 U Isroilda 23 yil hakamlik qildi. So‘ngra vafot etib, Shomirda dafn qilindi.
3 To‘lodan keyin giladlik Yovir Isroilda 22 yil hakamlik qildi.
4 Uning 30 ta o‘g‘li bo‘lib, ular 30 ta eshakka minib yurishardi va ularning Gilad yurtida joylashgan 30 ta shahri bor edi. Bu shaharlar bugungacha Xavot-Yovir+ deb ataladi.
5 Keyin Yovir hayotdan ko‘z yumdi va u Kamonda dafn etildi.
6 Isroil xalqi Yahovaning nazarida yana yomon ishlar qila boshladi+. Ular Baallarga+, Ashtaretning* tasvirlariga, oromiylar*, sidonliklar, mo‘abliklar, ommonliklar va filistimliklarning xudolariga xizmat qila boshlashdi+. Ular Yahovani tark etib, Unga xizmat qilmay qo‘yishdi.
7 Isroil xalqiga qarshi Yahovaning g‘azabi alanga olib, ularni filistimliklar bilan ommonliklar qo‘liga topshirdi*+.
8 Ular o‘sha yili, Iordanning sharq tomonida, Giladdagi amoriylarning yurtida yashovchi isroilliklarga jabr-zulm o‘tkazishdi. Ular 18 yil davomida shunday qilishdi.
9 Ommonliklar Yahudo, Benyamin va Efrayim qabilalariga qarshi jang qilish uchun Iordanni kechib o‘tishdi. Ularning dastidan Isroil xalqi qattiq azob chekdi.
10 Isroilliklar Yahovadan yordam so‘rab yolvorishdi+: «Ey Xudoyimiz, biz Senga qarshi gunoh qildik. Seni tark etib, Baallarga xizmat qildik»+.
11 Biroq Yahova isroilliklarga dedi: «Men sizlarni misrliklar+, amoriylar+, ommonliklar, filistimliklar+,
12 sidonliklar, omoleklar va midiyonliklarning jabr-zulmidan xalos etmadimmi?! Axir Menga faryod qilganingizda, sizlarni ularning qo‘lidan qutqargan edim-ku!
13 Ammo sizlar Meni tashlab, boshqa xudolarga xizmat qildingiz+. Shu bois, sizlarni boshqa qutqarmayman+.
14 O‘zingiz tanlagan xudolarning oldiga borib, ulardan yordam so‘ranglar+. Boshingizga kulfat tushganda, ular sizlarni qutqarsin»+.
15 Lekin isroilliklar Yahovaga: «Biz gunoh qildik. Biz bilan istaganingni qil. Faqat bugun bizni qutqar, Sendan o‘tinib so‘raymiz»,— deyishdi.
16 Isroilliklar oralaridan soxta xudolarni yo‘q qilib, Yahovaga xizmat qila boshlashdi+. Shunda U isroilliklarning azob chekishiga ortiq chiday olmadi+.
17 Bir muncha vaqt o‘tib, ommonliklar+ birgalikda to‘planib, Giladda qarorgoh qurishdi. Shunda isroilliklar ham yig‘ilib, Mispaxda qarorgoh qurishdi.
18 Gilad aholisi va beklari bir-biriga: «Ommonliklarga qarshi jangda kim boshchilik qiladi?+ O‘sha kishi butun Gilad aholisi ustidan yo‘lboshchi bo‘lsin»,— deb aytishdi.
