Hakamlar 11:1-40
11 Giladlik Yiftox+ qudratli jangchi edi. U bir fohisha ayolning o‘g‘li bo‘lib, otasining ismi Gilad edi.
2 Giladning xotini ham unga o‘g‘illar tug‘ib berdi. Xotinidan tug‘ilgan o‘g‘illari ulg‘aygach, Yiftoxga: «Sen boshqa ayoldan tug‘ilgansan, shuning uchun otamizning xonadonidan meros olmaysan»,— deb uni haydab yuborishdi.
3 Yiftox birodarlaridan qochib, Tov diyoriga borib o‘rnashdi. Ishsiz yurgan kishilar Yiftoxga sherik bo‘lishdi va unga qo‘shilib dushmanlariga qarshi bosqinchilik qilishardi.
4 Bir muncha vaqt o‘tgach, ommonliklar Isroil xalqiga qarshi urush boshlashdi+.
5 Ommonliklar Isroil xalqiga qarshi jang boshlaganida, Giladning oqsoqollari Yiftoxni qaytarib olib kelish uchun darhol Tov diyoriga yo‘l olishdi.
6 Ular Yiftoxga: «Ommonliklarga qarshi jang qilish uchun kelib bizga qo‘mondonlik qiling»,— deyishdi.
7 Yiftox bo‘lsa Gilad oqsoqollariga: «Mendan qattiq nafratlanib, otamning uyidan haydab chiqargan sizlar emasmi?!+ Endi boshingizga kulfat tushganda, nega oldimga keldingiz?!» — deb aytdi.
8 Gilad oqsoqollari Yiftoxga: «Gapingiz to‘g‘ri, shuning uchun ham sizga murojaat qilib keldik. Biz bilan borib ommonliklarga qarshi jang qilsangiz, butun Gilad aholisi ustidan yo‘lboshchimiz bo‘lasiz»+,— deb javob berishdi.
9 Yiftox bo‘lsa Gilad oqsoqollariga: «Sizlar bilan borib ommonliklarga qarshi jang qilsam va Yahova ularni qo‘limga topshirsa, yo‘lboshchingiz bo‘laman!» — deb aytdi.
10 Gilad oqsoqollari Yiftoxga: «Yahova oramizda shohid bo‘lsin, aytganingizday qilamiz»,— deyishdi.
11 Yiftox Gilad oqsoqollari bilan ketdi va xalq uni o‘z yo‘lboshchisi va qo‘mondoni etib tayinladi. Yiftox bo‘lsa aytgan hamma so‘zlarini Mispaxda+, Yahovaning oldida takrorladi.
12 So‘ng Yiftox ommonliklar+ shohi oldiga xabarchilar yuborib: «Menda biror qasdingiz bormidi, yurtimga hujum qilgani kelibsiz?» — deb so‘radi.
13 Ommonliklar shohi Yiftox jo‘natgan xabarchilarga: «Isroil xalqi Misrdan chiqib kelganida, Arnondan+ tortib Yavoqqacha hamda Iordan daryosigacha+ bo‘lgan yerlarimni tortib olgan edi+. Yaxshilikcha bu yerlarni qaytarib ber»,— deb javob qaytardi.
14 Ammo Yiftox xabarchilarni yana ommonliklar shohi oldiga yuborib,
15 shunday deyishni tayinladi:
«Yiftox bunday deb aytyapti: “Isroil xalqi mo‘abliklarning+ ham, ommonliklarning+ ham yerini tortib olgani yo‘q.
16 Misrdan chiqqach, Isroil xalqi sahroni kezib Qizil dengizga+, undan keyin Kadeshga+ bordi.
17 So‘ngra Isroil xalqi Edom+ shohiga xabarchilar yuborib: “Iltimos, yurtingizdan o‘tib ketishimizga ruxsat bering”,— deb aytdi, Edom shohi esa quloq solmadi. Mo‘ab+ shohiga ham xabar yuborganida, u ham rozi bo‘lmadi. Shunda Isroil xalqi Kadeshda+ qoldi.
18 Sahro bo‘ylab yurishganida, ular Edom va Mo‘ab yurtlarini aylanib o‘tishdi+. Mo‘ab yurtining sharqiga borib+, Arnon hududida qarorgoh qurishdi. Arnon Mo‘abning chegarasi bo‘lgani bois, Mo‘ab chegarasiga oyoq bosishmadi+.
19 Bundan so‘ng, Isroil xalqi amoriylarning Xashbondagi shohi Sixo‘nga xabarchilar orqali: “Iltimos, manzilimizga yetib olish uchun yurtingizdan o‘tib ketishimizga ruxsat bering”+,— deb ayttirib yubordi.
20 Biroq Sixo‘n Isroil xalqiga ishonmagani uchun, o‘zining hududidan o‘tib ketishga ruxsat bermadi. Sixo‘n butun xalqini yig‘ib, Yaxazda qarorgoh qurdi va Isroilga qarshi jang qildi+.
21 Isroil xalqining Tangrisi Yahova Sixo‘nni va uning butun xalqini Isroilning qo‘liga berdi. Shu tariqa, Isroil xalqi ularni mag‘lub qilib, bu yurt aholisi bo‘lmish amoriylarning hamma yerlarini mulk qilib oldi+.
22 Ular amoriylarning butun hududini — Arnondan tortib Yavoqqacha hamda sahrodan boshlab Iordan daryosigacha bo‘lgan yerlarni mulk qilib olishdi+.
23 Isroilning Xudosi Yahova O‘z xalqi isroilliklar oldidan amoriylarni haydab chiqargan edi+. Endi siz bu xalqni quvib chiqarmoqchi bo‘lyapsizmi?!
24 Xudoyingiz Xamo‘sh+ kimning yerini sizlarga bergan bo‘lsa, o‘shaning yerini egallab olmaysizmi?! Biz ham Allohimiz Yahova kimni oldimizdan haydab chiqarsa, o‘shani quvib chiqaramiz+.
25 Nima, Mo‘abning shohi Zippur o‘g‘li Boloqdan+ ortiq joyingiz bormi? U qachondir Isroil xalqi bilan talashgan yoki jang qilganmidi?
26 Isroil xalqi Xashbonda va unga qarashli* shaharchalarda+, shuningdek, Aroyerda va unga qarashli shaharchalarda, Arnon sohili bo‘yidagi barcha shaharlarda 300 yil yashadi. Nega shu vaqt davomida bu yerlarni tortib olmadingiz?+
27 Men sizga qarshi gunoh qilmadim. Siz bo‘lsangiz menga hujum uyushtirib, yaxshi ish qilmadingiz. Hakam bo‘lmish Yahova+, bugun Isroil xalqi bilan Ommon xalqi o‘rtasida ajrim qilsin”».
28 Biroq ommonliklar shohi Yiftox ayttirib yuborgan so‘zlarga quloq solmadi.
29 Yahovaning ruhi Yiftoxning ustiga tushdi+. U Gilad bilan Manashedan o‘tib, Giladdagi Mispaxga bordi+. Keyin o‘sha yerdan ommonliklar tomon yo‘l oldi.
30 Yiftox Yahovaga qasam ichib+: «Agar ommonliklarni qo‘limga topshirsang,
31 jangdan g‘alaba bilan qaytganimda, eshigimdan menga peshvoz chiqqan birinchi kishi Yahovaga tegishli bo‘ladi+. Uni kuydiriladigan qurbonlik qilib keltiraman*+»,— dedi.
32 Yiftox borib ommonliklarga qarshi jang qildi va Yahova ularni uning qo‘liga berdi.
33 U Aroyerdan tortib Minnitgacha ularni qirg‘in qilib, 20 ta shaharni bosib oldi. Ularni Ovil-Karomgacha qirdi, nihoyatda ko‘p odam halok bo‘ldi. Shu tariqa, ommonliklar isroilliklarga tobe bo‘ldi.
34 Nihoyat, Yiftox Mispaxdagi uyiga qaytdi+. Qizi childirma chalib, raqsga tushib unga peshvoz chiqdi! Qizi uning yakka-yu yagona farzandi edi. Undan boshqa o‘g‘li ham, qizi ham yo‘q edi.
35 Uni ko‘rishi bilan Yiftox kiyimlarini yirtib: «Voy, qizim! Yurak-bag‘rimni qon qilding-ku! Uydan badarg‘a qilishim kerak bo‘lgan odam sen bo‘lib chiqding. Men Yahovaga lafz qilgan edim, endi so‘zimni orqaga qaytarib ololmayman»+,— dedi.
36 Qizi bo‘lsa Yiftoxga: «Otajon, agar Yahovaga lafz qilgan bo‘lsangiz, lafzingizda turing+. Axir Yahova dushmanlaringiz bo‘lmish ommonliklardan o‘ch oldi-ku»,— deb aytdi.
37 So‘ngra otasiga: «Faqat bitta tilagim bor: menga ikki oyga ruxsat bering. Dugonalarim bilan tog‘larga chiqib, ko‘z yosh to‘kib kelayin. Chunki endi bokiraligimcha qolaman*»,— dedi.
38 Yiftox qiziga: «Mayli, boraqol»,— deb aytdi. U qiziga ikki oyga ruxsat berdi va qizi bokira qolayotgani uchun dugonalari bilan tog‘larga chiqib yig‘ladi.
39 Ikki oy o‘tgach, u otasining oldiga qaytdi. So‘ng Yiftox qiziga tegishli va’dasini bajardi+. Shunday qilib qiz erkak kishi bilan yashamadi*. Isroilda esa bir odat paydo bo‘ldi:
40 har yili Isroildagi qizlar giladlik Yiftoxning qizini vasf etgani borib, yilida to‘rt kun uning yonida bo‘lishardi.
Izohlar
^ Yoki «uning atrofidagi».
^ Ehtimol, Xudoga xizmat qilishga butunlay bag‘ishlanishni anglatadigan majoziy ibora.
^ Yoki «hech qachon turmushga chiqmayman».
^ Ya’ni jinsiy aloqada bo‘lmadi.