Havoriylar 2:1-47
2 Hosil bayrami*+ nishonlanayotgan paytda, shogirdlarning hammasi bir joyda to‘planishgan edi.
2 To‘satdan osmondan kuchli shamol esganday bir shovqin keldi-yu, ular o‘tirgan uyni tamoman to‘ldirdi+.
3 Shunda ular alangalanib turgan tilga o‘xshash bir narsalar paydo bo‘lganini va bo‘linib har birining ustiga bittadan tushganini ko‘rishdi.
4 Natijada shogirdlarning bari muqaddas ruhga to‘lib+, har xil tillarda gapira boshladi. Ular ruh ato etgan qobiliyatga ko‘ra gapirishardi+.
5 O‘shanda Quddusda dunyoning turli chetlaridan kelgan dindor yahudiylar bor edi+.
6 Bu shovqinni eshitgach, ko‘pchilik u yerga yig‘ildi. Shogirdlar ularning tillarida gapirishayotganini eshitib, o‘sha odamlar dovdirab qolishdi.
7 Ular juda hayron bo‘lib, bir-biriga shunday deyishdi: «Buni qarang-a, axir bu gapirayotgan kishilar hammasi jalilalik+ emasmi?
8 Unday bo‘lsa, qanday qilib har birimiz ularning o‘z ona tilimizda gapirishayotganini eshityapmiz?
9 Parfiyaliklar, midiyaliklar+, elamliklar+, Mesopotamiya, Yahudiya, Kappadokiya, Pont, Osiyo* viloyatida yashovchilar+,
10 Frigiya, Pamfiliya, Misr va Liviyaning Kirineyaga yaqin o‘lkalarida istiqomat qiluvchilar, shuningdek, Rimdan kelgan yahudiylar va yahudiy diniga kirganlar+,
11 kritliklar va arablar — hammamiz ularning o‘z ona tilimizda Allohning ulug‘vor ishlari haqida gapirishayotganini eshityapmiz».
12 Bundan barcha hang-u mang bo‘lib bir-biridan: «Nima bo‘lyapti o‘zi?» — deya so‘rashar edi.
13 Boshqalar esa mazax qilib: «Bular sharobdan yaxshigina otib olishganga o‘xshaydi»,— deyishdi.
14 Shunda Butrus 11 havoriy+ bilan birga o‘rnidan turib, baland ovozda xitob qildi: «Ey yahudiyaliklar va Quddusda yashovchilar, gaplarimga diqqat bilan quloq solib, nimalar bo‘layotganini bilib olinglar.
15 Bu odamlar sizlar o‘ylagandek mast bo‘lishgani yo‘q, chunki hozir ertalab soat to‘qqiz-ku*.
16 Aslida bu voqea haqida Yo‘el payg‘ambar shunday deb bashorat qilgan edi:
17 “Oxirgi kunlarda,— demoqda Xudo,— Men har qanday inson ustiga O‘z ruhimni yog‘diraman. O‘g‘il-u qizlaringiz bashorat qiladi, yigitlaringizga vahiylar keladi, mo‘ysafidlaringiz tushlar ko‘radi+.
18 O‘sha kunlarda hatto qul-u cho‘rilarimga O‘z ruhimni yog‘diraman va ular bashorat qiladi+.
19 Osmon-u falakda g‘aroyibotlar, yer yuzida esa alomatlar yaratib, qon, olov va pag‘a-pag‘a tutun hosil qilaman.
20 Yahovaning* ulug‘ va ajoyib kuni kelishidan oldin, quyosh qorayib, oy qonga bulanganday qizarib qoladi.
21 O‘shanda Yahovaning* ismini aytib chaqirgan har bir odam qutqariladi”+.
22 Ey isroilliklar, gaplarimga quloq solinglar! O‘zlaringiz ham bilasizki, Alloh nosiralik Iso orqali orangizda qudratli ishlar, g‘aroyibot-u alomatlar ko‘rsatib+, uni sizlarga tanitdi.
23 Sizlar esa uni qonunsiz odamlarning qo‘liga topshirib, ustunga mixlatib o‘ldirdingizlar+. Aslida, Tangri O‘z irodasiga ko‘ra, bu kishining hibsga olinishini avvaldan belgilab qo‘ygan edi+.
24 Biroq Xudo uni o‘lim azobidan* xalos etib tiriltirdi+, chunki o‘lim bu kishini asirlikda ushlab turishga qodir emasdi+.
25 Dovud payg‘ambar u haqda shunday aytgan: “Yahova* hamisha ko‘z oldimda. U mening o‘ng tomonimda ekan, men hech qachon tebranmayman.
26 Bundan qalbim shodlikka, tilim quvonchga to‘ldi. Endi men umid bilan yashayman.
27 Zero Sen meni mozorda* tashlab ketmaysan, sadoqatli xizmatching chirishiga yo‘l qo‘ymaysan+.
28 Hayot yo‘llarini menga ko‘rsatding, huzuringda meni shod-xurram qilasan”+.
29 Birodarlar, bobokalonimiz Dovud vafot etib, dafn qilingani+ va uning maqbarasi hozirgacha shu yerda ekanligi haqida ochiqchasiga gapirishimga ruxsat etinglar.
30 U kishi payg‘ambar bo‘lgan va Alloh ont ichib, uning naslidan bo‘lgan bittasini taxtiga o‘tqazishni va’da qilgan+.
31 Shu bois Masihning tirilishini, ya’ni mozorda* tashlab ketilmasligini hamda badanining chirimasligini oldindan bilib, ma’lum qilgan+.
32 Alloh bu Isoni tiriltirdi va hammamiz bunga shohidmiz+.
33 U yuksaltirilib, Xudoning o‘ng tarafiga o‘tirdi+ va samoviy Otasi tomonidan va’da qilingan muqaddas ruhni+ oldi. O‘zingiz ko‘rganingiz va eshitganingizday, shu ruhni ustimizga yog‘dirdi.
34 Dovud osmonga ko‘tarilmagan bo‘lsa-da, shunday degan: “Yahova* Hazratimga aytdi:
35 “Dushmanlaringni oyog‘ing ostiga kursi qilmagunimcha, Mening o‘ng tomonimda o‘tirib tur”+.
36 Shunday ekan, sizlar ustunga mixlatgan Isoni+ Tangrimizning O‘zi Hazrat+ va Masih qilib tayinlaganini butun Isroil xonadoni yaxshilab uqib olsin».
37 Buni eshitganlarning yuragiga o‘q qadalganday bo‘ldi va ular Butrus bilan boshqa havoriylarga murojaat qilib: «Birodarlar, biz nima qilishimiz kerak?» — deb so‘rashdi.
38 Butrus esa ularga dedi: «Tavba qilinglar+ va gunohlaringiz kechirilishi uchun+ har biringiz Iso Masihning nomi ila suvga cho‘minglar+. Shu tariqa muqaddas ruh in’omini olasizlar.
39 Axir bu va’da+ sizlarga va farzandlaringizga, uzoqda bo‘lganlarning hammasiga, qolaversa, Allohimiz Yahova* kimni da’vat etgan bo‘lsa, shularning bariga beriladi»+.
40 Butrus yana boshqa so‘zlar bilan keng shohidlik berib, tinglovchilarni: «Bu buzuq nasldan+ ehtiyot bo‘linglar»,— deya ogohlantirardi.
41 Uning so‘zlarini chin yurakdan qabul qilganlar suvga cho‘mishdi+ va o‘sha kunning o‘zida shogirdlar safiga taxminan 3 000 kishi qo‘shildi+.
42 Ular havoriylardan ta’lim olishda davom etar, hamma narsalarini o‘zaro bo‘lishar va birga ovqatlanib+ ibodat qilishardi+.
43 Hamma dahshatga tushdi va havoriylar orqali ko‘pgina g‘aroyibot-u alomatlar sodir bo‘la boshladi+.
44 Isoning izdoshi bo‘lganlarning hammasi birgalashib, barcha narsalarini o‘zaro baham ko‘rishardi.
45 Ular mol-mulklarini sotib+, daromadni har kimning ehtiyojiga qarab taqsimlashardi+.
46 Ular har kuni ma’badda birdam bo‘lib yig‘ilishar va bir-birining uyiga borib, katta quvonch va samimiyat bilan birga ovqatlanishar edi.
47 Ular Xudoni ulug‘lab, xalqning hurmatiga sazovor bo‘lishardi. Yahova* esa kundan-kunga najot topayotganlarni ularning safiga qo‘shardi+.
Izohlar
^ Rim imperiyasining Kichik Osiyodagi viloyati.
^ So‘zma-so‘z «kunning uchinchi soati».
^ Boshqa variant «o‘lim kishanlaridan».
