Hizqiyo 8:1-18
8 Oltinchi yilning* oltinchi oyida, oyning beshinchi kunida men o‘z uyimda o‘tirgan edim. Yonimda Yahudo oqsoqollari ham o‘tirishgan edi. Shunda Oliy Hukmdor Yahovaning qudrati meni qamrab oldi.
2 Qarasam, qiyofasi olovga o‘xshaydigan bir kishi ko‘rindi. Uning belga o‘xshaydigan qismining pasti olovday+, belning tepasi oltin va kumush qotishmasiday porlayotgan edi+.
3 U qo‘lga o‘xshash bir narsani uzatib meni sochimdan ushlab oldi va ruh meni osmonga ko‘tarib Xudodan kelgan vahiyda meni Quddusga, shimol tomonga qaragan ichki hovlining darvozasiga olib ketdi+. U yerda Allohning rashkini qo‘zg‘atadigan rashk buti turgan edi+.
4 O‘sha yerda Isroil Tangrisining ulug‘vorligi bor edi+. Bu ulug‘vorlik men vodiyda ko‘rgan ulug‘vorlikka o‘xshardi+.
5 U menga shunday dedi: «Ey inson o‘g‘li, shimol tomonga qara». Men shimol tomonga qaradim va u yerda, qurbongoh shimolidagi darvoza oldida rashk buti bor edi.
6 U menga: «Inson o‘g‘li, Isroil xonadoni bu yerda naqadar dahshatli, jirkanch ishlar qilayotganini ko‘ryapsanmi?+ Bu ishlarni deb Men muqaddas maskanimdan uzoqlashishga majburman+. Ammo sen bundan ham dahshatliroq narsalarga shohid bo‘lasan»,— dedi.
7 Keyin U meni ma’bad hovlisining kiraverishiga olib keldi. Qarasam, devorda teshik bor ekan.
8 U menga: «Inson o‘g‘li, devordagi teshikni kattalashtir»,— dedi. Men teshikni kattalashtirdim, shunda kirish joyi borligini ko‘rdim.
9 U menga: «Ichkariga kirib qanday yovuzliklar va jirkanch ishlar qilinayotganini ko‘rib qo‘y»,— dedi.
10 Men ichkariga kirdim. U yerda butun devor bo‘ylab har turli sudralib yuruvchi jonzotlar, jirkanch hayvonlar+ va Isroil xonadoni sig‘inadigan jirkanch butlarning* tasvirlari+ o‘yilgan edi.
11 Bu tasvirlar oldida Isroil xonadonining 70 ta oqsoqoli turardi. Oqsoqollar orasida Shofon+ o‘g‘li Yazaniyo ham bor edi. Har birining qo‘lida tutatqi tutatiladigan idish bor bo‘lib, undan xushbo‘y tutun ko‘tarilardi+.
12 U menga shunday dedi: «Inson o‘g‘li, Isroil xonadonining oqsoqollari qorong‘ilikda, har biri o‘z butining tasviri o‘yilgan xonalarda nima qilayotganini ko‘ryapsanmi? Ular: “Yahova bizni ko‘rmayapti. Yahova yurtni tark etgan”,— deyishyapti»+.
13 U tag‘in menga shunday dedi: «Sen ular qilayotgan ishlardan ham dahshatliroq jirkanch narsalarni ko‘rasan».
14 U meni Yahova uyining shimoliy darvozasi yoniga olib keldi. U yerda xudo Tammuz uchun yig‘lab o‘tirgan ayollarni ko‘rdim.
15 U yana menga shunday dedi: «Ey inson o‘g‘li, buni ko‘ryapsanmi? Sen bulardan ham dahshatliroq, yanada jirkanch narsalarni ko‘rasan»+.
16 So‘ng meni Yahova uyining ichki hovlisiga olib keldi+. Yahovaning ma’badiga kiraverishda, dahliz bilan qurbongoh orasida taxminan 25 kishi orqasini Yahovaning ma’badiga o‘girib, yuzi bilan sharq tomonga qarab turgan edi. Ular sharqga qarab quyoshga sajda qilayotgan edilar+.
17 U menga shunday dedi: «Inson o‘g‘li, buni ko‘ryapsanmi? Yahudo xonadoni uchun bu jirkanch ishlar kamlik qilganday, ular yurtni zo‘ravonlikka to‘ldirib+, g‘azabimni keltirishyapti. Ular daraxt shoxini* burnimga tiqishyapti-ku!
18 Shuning uchun qattiq g‘azablanib chora ko‘raman. Ularga achinmayman, rahm ham qilmayman+. Hatto baland ovozda Menga xitob qilishsa-da, ularga quloq solmayman»+.
Izohlar
^ Hizqiyo surgunda bo‘lganining oltinchi yili.
^ Ibroniycha bu atama ehtimol, «go‘ng» so‘ziga yaqin bo‘lib, hazar qilishni ifodalash maqsadida qo‘llaniladi.
^ Butga sig‘inganda ishlatilgan daraxt shoxi bo‘lishi mumkin.
