Ibtido 26:1-35
26 Ibrohim davrida yuz bergan ocharchilikdan+ keyin, yurtda yana ocharchilik bo‘ldi. Shunda Is’hoq filistimliklar shohi Abumalekning oldiga, Garorga bordi.
2 Keyin Yahova unga zohir bo‘lib, dedi: «Misrga borma. Men senga tayinlagan yurtda yasha.
3 Mana shu yurtda musofir bo‘lib yasha+ va Men doim sen bilan bo‘lib, senga barakamni yog‘diraman. Otang Ibrohimga bergan va’damni amalga oshirib+, mana bu yerlarning barini senga hamda zurriyotingga* beraman+. Zero, unga ont ichib:
4 “Zurriyotingni osmondagi yulduzlarday ko‘paytiraman+ va ushbu yerlarning barini ularga beraman+. Sening zurriyoting orqali yer yuzidagi barcha xalqlar baraka topadi”+,— degan edim.
5 Chunki Ibrohim Menga quloq solib, Mening talablarimga, amrlarimga, farmonlarim-u qonunlarimga rioya qilib kelgan edi»+.
6 Shunday qilib, Is’hoq Garorda yashab yurdi+.
7 O‘sha yerlik odamlar uning xotini haqida so‘rashganida, Is’hoq: «U mening singlim»+,— dedi. Chunki: «O‘sha yerlik odamlar Rivqo sababli meni o‘ldirishlari mumkin»,— deb o‘ylab, uni «xotinim», deyishdan qo‘rqdi. Sababi, Rivqo chiroyli edi+.
8 Oradan bir muncha vaqt o‘tgach, filistimliklar shohi Abumalek derazadan qarab turganida, Is’hoq xotini Rivqoni erkalayotganiga* ko‘zi tushib qoldi+.
9 Abumalek zudlik bilan Is’hoqni chaqirib, unga: «Aslida u xotining ekan-ku! Nega: “U mening singlim”,— deding?» — deb so‘radi. Is’hoq unga: «U tufayli meni o‘ldirib qo‘yishmasin deb qo‘rqqan edim»+,— deb javob berdi.
10 Abumalek gapini davom ettirib: «Bu nima qilganing?+ Xalqimdan birortasi xotining bilan yotishi hech gap emas edi-ku. Axir sen bizni gunohga botirishingga sal qoldi!»+ — dedi.
11 So‘ng Abumalek butun xalqiga buyruq berib: «Kimki bu kishiga va uning xotiniga tegsa, o‘limga mahkum etiladi!» — dedi.
12 Is’hoq o‘sha yurtga urug‘ sepa boshladi. O‘sha yili Yahova unga baraka bergani uchun, Is’hoq ekkan urug‘idan 100 barobar ko‘proq hosil yig‘di+.
13 U boyib ketdi va mol-mulki shu darajada ko‘paydiki, u nihoyatda boy insonga aylandi.
14 U poda-poda qo‘y va qoramollarga hamda ko‘pgina xizmatkorlarga ega bo‘ldi+. Shunda filistimliklar unga hasad qiladigan bo‘lishdi.
15 Filistimliklar, otasi Ibrohimning davrida uning xizmatkorlari qazigan barcha quduqlarni tuproq bilan to‘ldirib, ko‘mib qo‘yishdi+.
16 Keyin Abumalek Is’hoqga: «Bu yerdan ket, chunki sen bizdan ko‘ra ancha kuchayib ketding»,— dedi.
17 Is’hoq u yerdan ko‘chib ketib, Garor+ vodiysiga borib o‘rnashdi va o‘sha yerda yashay boshladi.
18 Is’hoq, otasi Ibrohim davrida qazilgan, lekin Ibrohimning vafotidan keyin filistimliklar ko‘mib tashlagan quduqlarni qaytadan qaziy boshladi+ va ularga otasi bergan nomlarni berdi+.
19 Is’hoqning xizmatkorlari vodiyda quduq qazishayotganida, quduqdan toza suv chiqdi.
20 Garorlik cho‘ponlar esa: «Bu suv bizniki!» — deya Is’hoqning cho‘ponlari bilan janjallasha boshlashdi. Shunda Is’hoq quduqga Esek* deb nom berdi, chunki o‘sha yerda filistimliklar u bilan janjallashgan edilar.
21 Ular boshqa bir quduq qazidilar va yana filistimliklar janjal chiqarishdi. Shuning uchun, Is’hoq unga Sitno* deb nom berdi.
22 Keyin Is’hoq u yerdan ketdi va boshqa quduq qazidi. Bu gal filistimliklar uning ustidan janjal chiqarishmadi. U quduqni Rexobo‘t* deb nomlab: «Mana endi Yahova bizga keng joy berib, bizni ushbu yurtda barakali qildi»+,— dedi.
23 So‘ng Is’hoq u yerdan jo‘nab, Bershevaga+ ketdi.
24 O‘sha kecha Yahova unga zohir bo‘lib: «Men otang Ibrohimning Tangrisiman+. Qo‘rqma+, chunki Men sen bilanman. Xizmatkorim Ibrohim haqqi Men seni barakali qilib, zurriyotingni ko‘paytiraman»+,— dedi.
25 Shunda Is’hoq u yerda qurbongoh qurib, Yahovaning ismini aytib chaqirdi+ va o‘sha yerda chodir tikdi+. Xizmatkorlari esa u yerda quduq qazidilar.
26 Vaqt o‘tib, Garordan Abumalek keldi. U bilan birga ishonchli maslahatchisi Oxizat va lashkarboshisi Pixol bor edi+.
27 Is’hoq ularga: «Nega mening oldimga keldingizlar? Mendan nafratlanib, yurtingizdan haydagan sizlar emasmidingiz?» — dedi.
28 Javoban ular mana bunday deyishdi: «Yahova sen bilan ekanini biz aniq ko‘rdik+. Shu bois, senga shularni aytmoqchimiz: “Kel, bir-birimizga qasam ichaylik va sen bilan ahdlashaylik+.
29 Biz senga faqatgina yaxshilik qilib, seni eson-omon jo‘natib yuborgan edik. Senga hech qanday yomonlik qilmaganimizdek, sen ham bizga yomonlik qilma. Axir sen Yahovaning barakasini olgan kishisan”».
30 Keyin Is’hoq ular uchun ziyofat uyushtirdi va ular yeb-ichishdi.
31 Ular erta sahar turib, bir-birlariga qasam ichishdi+. So‘ng Is’hoq ularni kuzatib qo‘ydi va ular eson-omon jo‘nab ketishdi.
32 O‘sha kuni Is’hoqning xizmatkorlari: «Biz suv topdik!» — degan xabar keltirishdi va o‘zlari qazigan quduq haqida aytib berishdi+.
33 Shunda Is’hoq unga Shiva* deb nom berdi. Shuning uchun hozirgacha bu shahar Bersheva*+ deb ataladi.
34 Esov 40 yoshda bo‘lganida, xetiy Berining qizi Yahuditni hamda xetiy Elo‘nning qizi Bosimatni xotinlikka oldi+.
35 Ularning dastidan Is’hoq bilan Rivqo ko‘p azob chekishdi+.
Izohlar
^ So‘zma-so‘z «urug‘ingga».
^ Yoki «quchoqlayotganiga».
^ Ma’nosi «janjal».
^ Ma’nosi «tuhmat».
^ Ma’nosi «keng joylar».
^ Ma’nosi «ont» yoki «yetti».
^ Ma’nosi «ont qudug‘i» yoki «yettilar qudug‘i».
