Ibtido 6:1-22
6 Yer yuzida odamlar tobora ko‘paya boshlab, ulardan qizlar ham dunyoga keldi.
2 Shunda farishtalar*+ odamzod qizlarining chiroyli ekaniga e’tibor qarata boshlashdi va tanlaganlarini xotinlikka oladigan bo‘lishdi.
3 Bundan so‘ng Yahova: «Men* odamlarga toabad toqat qilib o‘tirmayman+. Chunki ular shunchaki etdan tarkib topgan*. Shunday ekan, ularning umri 120 yil bo‘ladi*»+,— dedi.
4 Farishtalar odamzod qizlariga yaqinlashib, ulardan o‘g‘il bolalar tug‘ilgani natijasida, o‘sha kunlarda va undan keyin yer yuzida nefilimlar* yashagan. Ular qadimgi davrning qudratli va dong‘i chiqqan odamlari bo‘lishgan.
5 Yahova, yer yuzida odamlar qabihlikka botib ketganini, ularning qalbidagi niyatlari doim yomon ekanini ko‘rdi+.
6 Yahova yer yuzida insonni yaratganiga achinib*, qalbi ezilib ketdi+.
7 Shu bois, Yahova: «O‘zim yaratgan insonlarni yer yuzidan yo‘q qilib yuboraman. Odamlarga qo‘shib uy hayvonlarini, o‘rmalab yuruvchi* jonzotlarni va osmonda uchib yuruvchi jonivorlarni ham qirib tashlayman. Chunki ularni yaratganimga achinib ketdim»,— deb aytdi.
8 Nuh esa Yahovaning iltifotiga sazovor bo‘lgan edi.
9 Nuhning hayotiga taalluqli bayonot quyidagicha:
Nuh odil inson+ bo‘lib, zamondoshlaridan farqli ravishda, benuqson ekanini namoyon etgan edi. Nuh Xudoga hamroh bo‘lib yashardi+.
10 Nuh vaqt o‘tib, Som, Xom va Yofas ismli uch nafar o‘g‘il ko‘rdi+.
11 Ammo yer yuzi zo‘ravonlikka to‘lib-toshib, haq Tangrining nazarida jirkanch ahvolga tushdi.
12 Alloh yer yuziga nazar tashlab, uning jirkanch ahvolda+ ekanini, butun odamzod razillashib ketganini ko‘rdi+.
13 Shunda Xudo Nuhga quyidagilarni aytdi: «Men butun jonzotni yo‘q qilishga qaror qildim, chunki ularning dastidan yer zo‘ravonlikka to‘lib ketdi. Shunday ekan, Men odamzodni va yerni halokatga duchor qilaman+.
14 Sen o‘zingga smolali daraxt yog‘ochidan* kema* yasab+, ichini xonalarga ajrat va ichki hamda tashqi tomoniga smola+ surtib chiq.
15 Kemani mana bunday qilib yasa: uzunligi 300 tirsak*, eni 50 tirsak, balandligi esa 30 tirsak bo‘lsin.
16 Kemaning tepa qismidan bir tirsak joy qoldirib, yorug‘lik tushib turishi uchun deraza* yasa. Kemaga kiradigan joy yon tarafida+ bo‘lsin, ichida esa pastki, ikkinchi va uchinchi qavatlarni yasa.
17 Men yer yuziga to‘fon+ yuborib, falak ostidagi hayot nafasi* bor bo‘lgan barcha jonzotlarni qirib tashlamoqchiman. Yer yuzidagi butun jonzot halok bo‘ladi+.
18 Sen bilan esa ahd qilyapman. Kemaga sen bilan birga o‘g‘illaring, xotining va kelinlaring kirishsin+.
19 Sen bilan birga tirik qolishi uchun, kemaga jonzotlarning+ har bir turidan bir juftdan, erkak va urg‘ochi qilib kirgiz+.
20 Tirik qolishi uchun qanotli jonivorlarning, uy hayvonlarining va o‘rmalab yuruvchi hayvonlarning har bir turidan bir juftdan kirgiz+.
21 Bundan tashqari, oziq-ovqatning har bir turidan g‘amlab ol+. Bu senga va jonivorlarga yegulik bo‘ladi».
22 Nuh hammasini Alloh amr etgani bo‘yicha bajardi. U aynan aytilganiday qildi+.
Izohlar
^ So‘zma-so‘z «Xudoning o‘g‘illari».
^ So‘zma-so‘z «Mening ruhim».
^ Boshqa variant «chunki ular tanaga xos harakat qiladi».
^ Yoki «120 yil yashashiga yo‘l qo‘yaman».
^ Yoki «qayg‘urib».
^ So‘zma-so‘z «gofer yog‘ochi», ehtimol, sarv daraxti.
^ So‘zma-so‘z «sandiq».
^ Bir tirsak=44,5 sm. Ilovaning B14 mavzusiga q.
^ Ibr. soxar; bu so‘z yorug‘lik tushadigan tuynuk yoki derazani emas, bir tirsak qiyalikda qurilgan tomni ham bildirishi mumkin.
^ Yoki «hayot ruhi».
