Levilar 3:1-17
3 Agar kimdir qoramolidan birortasini tinchlik qurbonligi sifatida keltirmoqchi bo‘lsa+, jonliq xoh erkak, xoh urg‘ochi bo‘lsin, nuqsonsizini Yahovaga olib kelsin.
2 U qurbonlik qilib keltiriladigan hayvonning boshiga qo‘lini qo‘ysin va jonliq uchrashuv chodirining kiraverishida so‘yilsin. Ruhoniylar bo‘lmish Horunning o‘g‘illari esa, qonni olib qurbongohning hamma tomoniga sachratib chiqishsin.
3 U tinchlik qurbonligining bir qismini Yahova uchun olovda kuydiriladigan nazr sifatida keltirsin+. Bular quyidagilar: ichaklarini qoplab turgan yog‘+, ichaklarning atrofidagi hamma yog‘,
4 ikkala buyragi va uni qoplab turgan yog‘, ya’ni sonlarining yonidagi yog‘. U buyraklar bilan birga jigardagi yog‘ni ham ajratib olsin+.
5 Horunning o‘g‘illari qurbongohdan tutun ko‘tarilishi uchun, bularning hammasini qurbongohda yonayotgan olov ustiga qo‘yilgan kuydiriladigan qurbonlik bilan birga kuydirishsin+. Bu — Yahova uchun olovda kuydiriladigan xush hidli nazrdir+.
6 Bordi-yu, qo‘y-echkilaridan birortasini Yahovaga tinchlik qurbonligi sifatida keltirmoqchi bo‘lsa, nuqsonsiz erkak yoki urg‘ochi hayvonni keltirsin+.
7 Agarda yosh qo‘chqorni nazr qilib keltirmoqchi bo‘lsa, uni Yahovaning oldiga olib kelsin.
8 U qurbonlik qilib keltiriladigan hayvonning boshiga qo‘lini qo‘ysin va jonliq uchrashuv chodirining oldida so‘yilsin. Horunning o‘g‘illari jonliqning qonini olib qurbongohning hamma tomoniga sachratib chiqishsin.
9 U tinchlik qurbonligining yog‘ini olib, Yahova uchun olovda kuydiriladigan nazr sifatida keltirsin+. U dumbasini umurtqasigacha kesib olsin, ichaklarini qoplab turgan yog‘ni, ichaklarning atrofidagi hamma yog‘ni,
10 ikkala buyragini va uni qoplab turgan yog‘ni, ya’ni sonlarining yonidagi yog‘ni ham olsin. Shuningdek, u buyraklar bilan birga jigardagi yog‘ni ajratib olsin+.
11 Ruhoniy bularning hammasini qurbongohda yegulik* sifatida, Yahova uchun olovda kuydiriladigan nazr qilib kuydirsin+.
12 Bordi-yu, takani nazr qilib keltirmoqchi bo‘lsa, uni Yahovaning oldiga olib kelsin.
13 U qurbonlik qilib keltiriladigan hayvonning boshiga qo‘lini qo‘ysin va jonliq uchrashuv chodirining oldida so‘yilsin. Horunning o‘g‘illari jonliqning qonini olib qurbongohning hamma tomoniga sachratib chiqishsin.
14 U qurbonligining bir qismini Yahova uchun olovda kuydiriladigan nazr sifatida keltirsin. Bular quyidagilar: ichaklarini qoplab turgan yog‘, ichaklarning atrofidagi hamma yog‘+,
15 ikkala buyragi va uni qoplab turgan yog‘, ya’ni sonlarining yonidagi yog‘. Shuningdek, u buyraklar bilan birga jigardagi yog‘ni ajratib olsin.
16 Ruhoniy bularning hammasini qurbongohda yegulik sifatida, olovda kuydiriladigan xush hidli nazr qilib kuydirsin. Yog‘ning hammasi Yahovaga tegishlidir+.
17 Hech qanday yog‘ yoki qonni iste’mol qilmanglar+. Bu, sizlar va avlodlaringiz uchun, asrlar davomida turar joylaringizda amal qilinadigan qoida bo‘lsin”».
Izohlar
^ So‘zma-so‘z «non», ya’ni tinchlik qurbonligidan Xudoga berilgan ulush.
