Levilar 6:1-30
6 Yahova Musoga yana quyidagilarni aytdi:
2 «Bordi-yu, kimdir Yahovaga nisbatan bevafolik qilib+, unga ishonib topshirilgan yoki garov sifatida berilgan yoki o‘g‘irlagan narsasi haqida yaqiniga yolg‘on gapirsa yoki uni aldasa+
3 yoki yo‘qolgan biron narsani topib olib, u haqda yolg‘on gapirsa va bu kabi gunoh ishlarni qilmaganlikda yolg‘ondan qasam ichsa+,
4 u gunoh qilgan bo‘lib, aybdor hisoblanadi. Shu bois, u o‘g‘irlagan yoki do‘q-po‘pisa yo aldov yo‘li bilan tortib olgan yoki unga ishonib topshirilgan yoki topib olgan narsani egasiga qaytarib bersin.
5 Agar u foyda ko‘rish niyatida birovning narsasi borasida yolg‘ondan qasam ichgan bo‘lsa, unda keltirilgan ziyonning o‘rnini to‘ldirib+, u qanchaga baholansa, o‘sha bahoning beshdan bir qismini ustiga qo‘shib bersin. Uning aybi ochilgan kuni o‘sha narsani egasiga qaytarib bersin.
6 Keyin belgilangan bahoga binoan, suruvidan nuqsonsiz bir qo‘chqorni Yahovaga atab olib kelsin. Uni ayb qurbonligi sifatida ruhoniyga bersin+.
7 Ruhoniy Yahovaning oldida uning gunohini yuvsin va u qaysi qilmishda aybdor bo‘lishiga qaramay, uning gunohi kechiriladi»+.
8 Yahova so‘zida davom etib, Musoga dedi:
9 «Horun bilan o‘g‘illariga shunday qilishni buyur: “Kuydiriladigan qurbonlik haqidagi qonun quyidagichadir+: kuydiriladigan qurbonlik kechasi bilan, ertalabgacha qurbongoh ichidagi olov ustida qolishi va qurbongohdagi olov yonib turishi lozim.
10 Ruhoniy xizmat paytida kiyiladigan zig‘ir matosidan tikilgan ko‘ylagini+ va uyatli joylarini yopish uchun zig‘ir matoli ishtonini* kiysin+. So‘ng qurbongohdagi yonib bo‘lgan kuydiriladigan qurbonlikning kulini olib+, qurbongohning yoniga qo‘ysin.
11 Keyin esa bu kiyimini yechib+, boshqa kiyimini kiysin va kulni qarorgohning tashqarisidagi toza joyga olib chiqsin+.
12 Qurbongohdagi olov o‘chmay, yonib tursin. Ruhoniy har kuni ertalab unga o‘tin solib+, ustiga kuydiriladigan qurbonlikni qo‘ysin va qurbongoh ustida tinchlik qurbonliklarining yog‘ini kuydirsin+.
13 Qurbongohdagi olov o‘chmay, doim yonib tursin.
14 Don nazri to‘g‘risidagi qonun esa quyidagichadir+: Horunning o‘g‘illari uni olib kelib, Yahovaning huzuriga, qurbongoh oldiga qo‘yishsin.
15 Ulardan biri don nazri sifatida olib kelingan oliy navli unning bir hovuchini, oz-moz moyni va don nazri ustidagi xushbo‘y smolaning hammasini olib, qurbongohdan tutun ko‘tarilishi uchun kuydirsin. Bu — Yahova uchun xush hidli ramz nazri+.
16 Don nazrining ortib qolganini Horun va uning o‘g‘illari yeyishsin+. Ular undan xamirturushsiz non pishirib, uni muqaddas joyda, uchrashuv chodirining hovlisida yeyishsin+.
17 U xamirturush qo‘shilmay pishirilsin+. Buni ularga, Menga atab olovda kuydiriladigan don nazridan ulush sifatida berdim+. Bu, gunoh qurbonligi va ayb qurbonligi singari o‘ta muqaddasdir+.
18 Uni Horunning avlodidan bo‘lgan barcha erkaklar yeyishsin+. Bu — Yahovaga atalgan kuydiriladigan nazrdan avlodlaringiz osha, asrlar bo‘yi sizlarga tegadigan ulush bo‘ladi+. Bu nazrlarga tekkan hamma narsa muqaddas bo‘ladi”».
19 Keyin Yahova Musoga shularni aytdi:
20 «Moylanadigan kuni+, Horun bilan o‘g‘illari Yahovaga quyidagi nazrni keltirishsin: muntazam don nazri sifatida+ keltirilganiday oliy navli undan efaning*+ o‘ndan bir qismini olib, uning yarmini ertalab, qolgan yarmini esa kechqurun olib kelishsin.
21 Unga moy qo‘shib, tovada pishirilsin+. U moy bilan yaxshilab aralashtirilgan bo‘lsin va uni pishirilgan don nazri sifatida bo‘lak-bo‘lak qilib sindirib, Yahovaga atalgan xush hidli nazr sifatida olib kelinsin.
22 Bu nazrni Horunning o‘rniga ruhoniy etib moylanadigan o‘g‘li ham olib kelsin+. Yahovaga atalgan ushbu nazr butunlayin kuydirilsin. Bu, asrlar osha amal qilinadigan qoidadir.
23 Ruhoniy olib keladigan har qanday don nazri butunlayin kuydirilsin. U yeyilmasin».
24 Yahova Musoga yana quyidagilarni aytdi:
25 «Horun bilan o‘g‘illariga shunday deb ayt: “Gunoh qurbonligi borasidagi qonun mana bunday+: gunoh qurbonligi kuydiriladigan qurbonlik so‘yiladigan joyda+, Yahovaning oldida so‘yilsin. U g‘oyat muqaddasdir.
26 Uni gunoh qurbonligini keltirgan ruhoniy muqaddas joyda, uchrashuv chodirining hovlisida+ yesin+.
27 Bu qurbonlikning go‘shtiga tekkan har qanday narsa muqaddas bo‘lib qoladi. Agar uning qoni kimningdir kiyimiga sachrab ketsa, qon sachragan kiyimini muqaddas joyda yuvsin.
28 Bu qurbonlik qaynatilgan sopol idish sindirilsin. Bordi-yu, u mis idishda qaynatilgan bo‘lsa, bu idish tozalanib, suv bilan yuvilsin.
29 Qurbonlikning go‘shtini ruhoniy bo‘lgan erkaklarning hammasi yesin+. U g‘oyat muqaddasdir+.
30 Lekin gunohni yuvish maqsadida qoni muqaddas joyga, uchrashuv chodiriga olib kirilsa, gunoh qurbonligini yeb bo‘lmaydi+. U olovda kuydirilishi darkor.
