Qonunlar 19:1-21
19 Xudoyingiz Yahova sizlarga berayotgan yurtdagi xalqlarni Tangringiz Yahova yo‘q qilgach, ularning yurtini egallab, shaharlari-yu uylarida yashay boshlaganingizda+,
2 Allohingiz Yahova sizlarga mulk qilib bergan yurt ichida uchta shaharni ajratinglar+.
3 Tangringiz Yahova sizlarga mulk qilib berayotgan yurtni uch qismga bo‘linglar va har bir bo‘lagida uchta shahardan biri joylashsin. So‘ng odam o‘ldirgan kishi o‘sha shaharlarning biriga qochib borishi uchun, yo‘llar tayyorlanglar.
4 Quyidagi vaziyatlarda odam o‘ldirgan kishi omon qolish uchun bu shaharlardan biriga qochib borishi mumkin: ilgari yomon ko‘rmagan yaqinini bexosdan o‘ldirib qo‘yganda+
5 yoki yaqini bilan o‘tin olib kelgani o‘rmonga borib, daraxt kesish uchun boltani ko‘targanida, bolta sopidan chiqib ketib yonidagi sherigiga tegsa va u o‘lib qolsa, unda bu kishi omon qolish uchun ushbu shaharlarning biriga qochib borsa bo‘ladi+.
6 Lekin shahar juda uzoq bo‘lsa, qon uchun qasos oluvchi+ qasoskor g‘azab o‘tida odam o‘ldirgan kishining orqasidan quvib yetib, uni o‘ldirib qo‘yishi mumkin. Aslida bu kishi o‘limga loyiq emas, chunki ilgari bu kishining o‘lgan odamga adovati bo‘lmagan+.
7 Mana shu sababli sizlarga: “O‘zlaringiz uchun uchta shaharni ajratinglar”,— deb buyuryapman.
8 Xudoyingiz Yahova ota-bobolaringizga so‘z berganiday, hududingizni kengaytirib+, ota-bobolaringizga va’da qilgan butun yurtni bersa+,
9 ya’ni men bugun sizlarga buyurgan barcha bu amrlarga astoydil amal qilganingiz, Tangringiz Yahovani sevib, doimo Uning yo‘llaridan yurganingiz uchun bu yurtni to‘liq sizlarga bersa+, ushbu uchta shaharga yana uchta shaharni qo‘shinglar+.
10 Shunda Allohingiz Yahova meros qilib berayotgan yurtda begunoh odamning qoni to‘kilmaydi+ va qon to‘kkanlikda aybdor bo‘lmaysizlar+.
11 Bordi-yu, inson yaqinini yomon ko‘rgani+ uchun pistirmadan hujum qilib, unga og‘ir jarohat yetkazsa va u o‘lib qolsa, hujum qilgan kishi esa o‘sha shaharlarning biriga qochib borsa,
12 o‘z shahrining oqsoqollari uni o‘sha yerdan chaqirtirib, qon uchun qasos oluvchining qo‘liga topshirishadi va u o‘ladi+.
13 Sizlarning unga rahmingiz kelmasin. O‘zlaringizga yaxshi bo‘lishi uchun, Isroilni begunoh odamning qoni to‘kilishida aybdorlikdan xalos etinglar+.
14 Tangringiz Yahova sizlarga mulk qilib berayotgan yurtda o‘z merosingizni olganingizda, qo‘shningizning chegara belgilarini ota-bobolaringiz chegaralab qo‘ygan joydan jildirmanglar+.
15 Odam qanday xatoga yoki gunohga qo‘l urmasin, bittagina guvohning ayblovi yetarli emas+. Uning ishi ikkita yoki uchta guvohning ko‘rsatmasi bilan tasdiqlanishi kerak+.
16 Agar guvoh yovuz niyatda boshqa kishini biron qilmishda ayblasa+,
17 unda o‘rtasida kelishmovchilik chiqqan bu ikki kishi Yahovaning oldiga, o‘sha paytda xizmat qilayotgan ruhoniylar va hakamlarning oldiga borsin+.
18 Hakamlar bu ishni har tomonlama tekshirib chiqishadi+. Agar guvohning ko‘rsatmasi soxta bo‘lib chiqib, u birodarini yolg‘ondan ayblagan bo‘lsa,
19 unda sizlar, u birodariga nima qilishni rejalashtirgan bo‘lsa, o‘zi bilan shunday yo‘l tutinglar+. Yovuzlikni orangizdan yo‘q qilinglar+.
20 Shunda buni eshitgan har kim qo‘rqib qoladi va orangizda hech kim bunday yomon ishga aslo qo‘l urmaydi+.
21 Sizlarning unga rahmingiz kelmasin+: jon evaziga jon, ko‘z evaziga ko‘z, tish evaziga tish, qo‘l evaziga qo‘l, oyoq evaziga oyoq berilsin+.
