Qonunlar 27:1-26
27 Keyin Muso Isroil oqsoqollari bilan birga xalqqa qarata shunday buyruq berdi: «Bugun men sizlarga berayotgan barcha amrlarga rioya qilinglar.
2 Iordan daryosini kechib o‘tib, Xudoyingiz Yahova sizlarga berayotgan yurtga kirgan kun, katta toshlarni o‘rnatinglar va ularni suvab* qo‘yinglar+.
3 Daryoni kechib o‘tganingizdan so‘ng, ushbu Qonunning barcha so‘zlarini toshlarga yozib qo‘yinglar. Shunda Tangringiz Yahova sizlarga berayotgan yurtga — ota-bobolaringizning Xudosi, Allohingiz Yahova sizlarga va’da bergan, sut va asal oqayotgan yurtga kira olasizlar+.
4 Iordan daryosini kechib o‘tganingizda, men bugun sizlarga amr berayotganimdek mazkur toshlarni Ebal tog‘ida+ o‘rnatinglar va ularni suvab qo‘yinglar.
5 Shuningdek, o‘sha yerda Allohingiz Yahovaga atab toshdan qurbongoh quringlar. Qurbongohni qurishda temir asboblardan foydalanmanglar+.
6 Xudoyingiz Yahovaning qurbongohini ishlov berilmagan toshlardan quringlar va ustida Tangringiz Yahovaga atab kuydiriladigan qurbonliklarni keltiringlar.
7 Tinchlik qurbonliklarini keltirib+, o‘sha yerda yenglar+ va Allohingiz Yahovaning huzurida quvoninglar+.
8 Mazkur Qonunning barcha so‘zlarini toshlarga aniq qilib yozib qo‘yinglar»+.
9 So‘ng Muso va levi ruhoniylari butun Isroil xalqiga murojaat qilib, quyidagilarni aytishdi: «Ey Isroil xalqi, sukut saqlab, quloq solinglar. Bugun sizlar Xudoyingiz Yahovaning xalqi bo‘ldingizlar+.
10 Allohingiz Yahovaning aytganlariga quloq tutib, bugun men sizlarga buyurayotgan Uning amrlariga+ va qoidalariga rioya qilinglar».
11 O‘sha kuni Muso xalqqa buyruq berib, dedi:
12 «Xalq Iordandan o‘tib bo‘lgach, xalqqa baraka tilash uchun Shimo‘n, Levi, Yahudo, Issaxor, Yusuf va Benyamin qabilalari Garizim tog‘ida+ tursin.
13 La’natni e’lon qilish uchun esa Ruben, Gad, Osher, Zabulun, Dan va Naftali qabilalari Ebal tog‘ida+ tursin.
14 Levilar baland ovozda butun Isroil xalqiga shunday deyishsin+:
15 “O‘yma tasvir+ yoki quyma but*+ Yahova uchun jirkanch bo‘lib+, bunday narsalarni yasagan kishi hamda ustaning* qo‘llari bilan yasalgan biror narsani yashirgan kishi la’nati bo‘lsin”. (Butun xalq javoban: “Omin!*” — desin.)
16 “Otasi yoki onasiga yomon muomalada bo‘lib, ularni nazar-pisand qilmagan la’nati bo‘lsin”+. (Butun xalq: “Omin!” — desin.)
17 “Qo‘shnisining chegara belgilarini joyidan jildirgan la’nati bo‘lsin”+. (Butun xalq: “Omin!” — desin.)
18 “Ko‘r kishini yo‘ldan adashtirgan la’nati bo‘lsin”+. (Butun xalq: “Omin!” — desin.)
19 “Musofir, yetim va bevaning+ ishini ko‘rib chiqayotib, adolatsiz hukm chiqargan la’nati bo‘lsin”+. (Butun xalq: “Omin!” — desin.)
20 “Otasining xotini bilan yotgan la’nati bo‘lsin. Chunki bu ishi bilan otasini sharmanda qiladi+”. (Butun xalq: “Omin!” — desin.)
21 “Birorta hayvon bilan jinsiy aloqa qilgan la’nati bo‘lsin”+. (Butun xalq: “Omin!” — desin.)
22 “O‘z opasi yoki singlisi bilan, otasining yoki onasining qizi bilan yotgan la’nati bo‘lsin”+. (Butun xalq: “Omin!” — desin.)
23 “Qaynanasi bilan yotgan la’nati bo‘lsin”+. (Butun xalq: “Omin!” — desin.)
24 “Yaqiniga pistirma qo‘yib, uni o‘ldirgan la’nati bo‘lsin”+. (Butun xalq: “Omin!” — desin.)
25 “Beayb kishini o‘ldirish uchun pul olgan la’nati bo‘lsin”+. (Butun xalq: “Omin!” — desin.)
26 “Ushbu Qonunda yozilgan so‘zlarga muvofiq yo‘l tutmay, ularga rioya qilmaganlar la’nati bo‘lsin”+. (Butun xalq: “Omin!” — desin.)
Izohlar
^ Yoki «ohak bilan oqlab».
^ Yoki «Shunday bo‘lsin!»
^ Yoki «yog‘och va metallga ishlov beradigan ishchining».
^ Yoki «metall haykal».
