Qonunlar 9:1-29
9 Tinglang, ey Isroil xalqi. Bugun sizlar o‘zingizdan ko‘proq va qudratliroq bo‘lgan xalqlarning+ yerlarini egallash uchun Iordan daryosini kechib o‘tyapsizlar+. Ularning shaharlari katta va osmono‘par*+,
2 xalqi esa Inoq avlodidan+ bo‘lib, kuchli va bo‘ylari balanddir. Ularni bilasizlar va ular to‘g‘risida: “Inoq o‘g‘illariga kim bas kela oladi?” — deyilganini ham eshitgansizlar.
3 Ammo bugun shuni bilingki, Allohingiz Yahova sizlarning oldingizda boradi+. U yutib yuboradigan olovdir+ va ularni yo‘q qilib tashlaydi. Ularni tezda quvib chiqarishingiz hamda halok qilishingiz uchun, Yahovaning O‘zi va’da berganiday, ularni ko‘z o‘ngingizda mag‘lub qiladi+.
4 Xudoyingiz Yahova ularni oldingizdan haydab chiqarganida: “Odil bo‘lganim uchun, Yahova meni bu yurtga egalik qilish uchun olib keldi”+,— degan fikrni ko‘nglingizdan o‘tkazmanglar. Aksincha, bu xalqlar yovuz bo‘lgani bois+, Yahova ularni oldingizdan quvib chiqaryapti.
5 Odilligingiz yoki yuragingiz to‘g‘ri bo‘lgani uchun ularning yurtini egallagani bormayapsizlar. Bu xalqlar yovuz bo‘lgani bois hamda Yahova ota-bobolaringiz Ibrohim+, Is’hoq+ va Yoqubga+ bergan so‘zining ustidan chiqish uchun, Tangringiz Yahova ularni oldingizdan quvib chiqaryapti+.
6 Shuni bilib qo‘yinglar, odil bo‘lganingiz uchun Allohingiz Yahova bu yaxshi yurtni sizlarga mulk qilib berayotgani yo‘q. Axir sizlar o‘jar* xalqsiz+.
7 Sahroda Tangringiz Yahovaning g‘azabini qanday qo‘zg‘atganingizni yodda tutinglar+, aslo unutmanglar. Misr yurtini tark etgan kundan boshlab to mana shu yerga yetib kelguningizga qadar, Yahovaga qarshi isyon ko‘tarib kelyapsizlar+.
8 Hatto Xorevda ham Yahovaning g‘azabini qo‘zg‘atgansizlar. O‘shanda qattiq jahli chiqqanidan, Yahova sizlarni yo‘q qilib yubormoqchi edi+.
9 Tosh lavhalarni+, Yahova sizlar uchun yasagan ahd lavhalarini+ olish uchun tog‘ga chiqqanimda, 40 kecha-yu 40 kunduz tog‘da qolib+, ovqat ham yemaganman, suv ham ichmaganman.
10 Keyin Yahova menga O‘z qo‘li* bilan yozgan ikkita tosh lavhani bergan edi. Bu lavhalarda, jamoat yig‘ilgan kuni Yahova tog‘da olov ichidan aytgan hamma so‘zlar yozilgan edi+.
11 O‘sha 40 kecha-yu 40 kunduzning oxirida, Yahova menga ikkita tosh lavhani — ahd lavhalarini berdi.
12 So‘ng Yahova menga: “O‘rningdan tur, tezroq pastga tush. Chunki sen Misrdan olib chiqqan xalq buzilib ketdi+. Men yurishni buyurgan yo‘ldan ular tezda og‘ib ketishdi. Ular o‘zlari uchun but* yasadilar”+,— dedi.
13 Keyin Yahova menga yana shunday dedi: “Bu xalq o‘jar ekanini ko‘rib turibman+.
14 Meni to‘xtatma! Men ularni yo‘q qilaman, bu xalqning nomini yer yuzidan* o‘chirib tashlayman. Sendan esa, ulardan ko‘ra kuchliroq va ko‘proq bo‘lgan bir xalqni vujudga keltiraman”+.
15 So‘ng men orqaga qaytib, tog‘dan pastga tushdim. Tog‘ esa yonayotgan edi+. Ikkita ahd lavhasi qo‘llarimda edi+.
16 Shunda sizlar Xudoyingiz Yahovaga qarshi gunoh qilayotganingizni ko‘rdim! Sizlar o‘zingiz uchun quyma buzoq yasagan edingizlar. Yahova yurishni buyurgan yo‘ldan tezda og‘ib ketdingizlar+.
17 Shunda men ikkita lavhani ikkala qo‘lim bilan ko‘tardim-da, otib yubordim va ko‘z o‘ngingizda ular chilparchin bo‘lib ketdi+.
18 Keyin avvalgiday 40 kecha-yu 40 kunduz Yahovaning oldida yuztuban yiqilib yotdim. Barcha gunohlaringiz uchun, Yahovaning nazarida yovuzlik hisoblangan ishni qilib Uni ranjitganingiz uchun, men ovqat ham yemadim, suv ham ichmadim+.
19 Yahovaning g‘azabi qaynab sizlarni yo‘q qilmoqchi bo‘lganida+, men qo‘rqib ketdim. Ammo shu safar ham Yahova gapimga quloq soldi+.
20 Yahova Horunga ham qattiq g‘azablangan edi va uni yo‘q qilishga tayyor edi+. Biroq men Horun uchun ham iltijo qildim.
21 Keyin sizlar yasagan gunoh narsani, ya’ni buzoqni+ olib olovda kuydirdim. Uni maydaladim va kukunga aylanguncha yaxshilab ezdim. So‘ng o‘sha kukunni tog‘dan oqib kelayotgan soyga sochib tashladim+.
22 Undan keyin Taverada+, Massaxda+ va Xivrut-Xattavoda+ Yahovaning g‘azabini qo‘zg‘atdingizlar.
23 Yahova sizlarni Kadesh-Barnadan+ jo‘natib: “Men sizlarga bermoqchi bo‘lgan yurtga borib, uni egallanglar”,— deb aytganida, sizlar yana Tangringiz Yahovaning buyrug‘iga qarshi chiqdingizlar+, Unga ishonmadingizlar+ va bo‘ysunmadingizlar.
24 Sizlarni taniganimdan buyon Yahovaga qarshi isyon ko‘tarasizlar.
25 Xullas, men 40 kecha-yu 40 kunduz+ Yahovaning oldida yuztuban yiqilib yotdim. Yahova sizlarni yo‘q qilmoqchi ekanini bilib, shu ko‘yga tushdim.
26 Men Yahovaga iltijo qilib, shunday dedim: “Ey, Oliy Hukmdor Yahova, O‘z xalqingni qirib tashlama. Axir ular Sening shaxsiy mulking-ku*+. Sen ularni buyukliging va qudratli qo‘ling bilan Misrdan qutqargansan+.
27 Xizmatchilaring bo‘lmish Ibrohimni, Is’hoq va Yoqubni esla+. Bu xalqning qaysarligiga, ularning yovuzligi va gunohiga e’tibor berma+.
28 Aks holda, Sen bizni olib chiqqan yurt xalqi: “Yahova O‘zi va’da qilgan yurtga ularni olib kira olmadi. Ulardan nafratlangani uchun ularni sahroda halok qildi”+,— deb aytadi.
29 Axir ular Sening xalqing, shaxsiy mulking-ku!+ Sen ularni buyuk qudrating va kuchli qo‘ling bilan olib chiqqansan”+.
Izohlar
^ Ya’ni minorali devorlari bor.
^ So‘zma-so‘z «bo‘yni egilmaydigan».
^ So‘zma-so‘z «Xudoning barmog‘i».
^ Yoki «quyma haykal».
^ So‘zma-so‘z «osmon ostidan».
^ Yoki «merosing».