Rut 3:1-18
3 Bir kuni Naima Rutga shunday dedi: «Qizim, tinch-xotirjam hayot kechirishingiz uchun, sizni uyli-joyli qilish mening zimmamda emasmi?!+
2 Siz xizmatkor qizlari bilan birga ishlagan Boz bizga qarindosh bo‘ladi+. U shu kecha xirmonda arpa shopiradi.
3 Siz yuvining-da, xushbo‘y moydan surting. Keyin chiroyli kiyinib, xirmonga boring. U kishi yeb-ichib bo‘lmagunicha, borligingizni sezdirmang.
4 Boz uxlagani ketganda, u qayerga borib yotishini bilib oling. So‘ng borib, oyoq tomonini oching-da, o‘sha yerga yoting. Uning o‘zi nima qilishingiz kerakligini aytadi».
5 Rut qaynanasiga: «Xo‘p bo‘ladi, siz aytgandek qilaman»,— dedi.
6 U xirmonga borib, hammasini qaynanasi o‘rgatganday qildi.
7 Bu paytda Boz yeb-ichib o‘tirgandi va ko‘tarinki kayfiyatda edi. Keyin u don uyib qo‘yilgan joyga borib yotdi. Shunda Rut sekingina kelib, uning oyoq tomonini ochdi-da, o‘sha yerga yotdi.
8 Yarim kechada Boz seskanib uyg‘onib ketdi. Boshini ko‘tarib qarasa, oyoq tomonida bir ayol yotgan ekan.
9 U: «Siz kimsiz?» — deb so‘radi. Rut: «Men cho‘ringiz Rutman, meni o‘z panohingizga oling*, chunki siz qarindoshlik burchini o‘tay oladigan odam ekansiz»+,— deya javob berdi.
10 Boz unga shunday dedi: «Yahovadan baraka toping, qizim. Hozirgi ko‘rsatgan mehr-sadoqatingiz, oldingisidan ham a’loroq bo‘ldi+. Sababi, siz o‘zingizga kambag‘al yoki boylar orasidan yoshroq kuyov qidirmadingiz.
11 Endi qo‘rqmang, qizim. Aytganlaringizning hammasini bajaraman+, chunki shahardagi hamma* siz yaxshi ayol ekaningizni biladi.
12 To‘g‘ri, men qarindoshlik burchini o‘tay oladigan odamman+. Lekin qarindoshlik burchini o‘tay oladigan mendan ham yaqinroq kishi bor+.
13 Bu kecha shu yerda qoling. Agar ertaga u qarindoshlik burchini o‘tashga rozi bo‘lsa, shunday bo‘la qolsin+. Bordi-yu, u o‘tashni istamasa, barhayot Yahova haqqi qasam ichib aytamanki, o‘zim o‘tayman. Siz esa tong otguncha shu yerda yotib qoling».
14 Shunday qilib, Rut uning oyoq tomonida tong sahargacha yotdi-da, so‘ng birov ko‘rib qolmasin deb, g‘ira-shira paytda o‘rnidan turdi. Boz unga: «Xirmonga ayol kishi kelganini hech kim bilmasin»,— dedi.
15 Keyin esa: «Yopinchig‘ingizni yoyib, ushlab turing»,— deb aytdi. Rut yopinchig‘ini yoydi. Boz ichiga olti o‘lchov* arpa solib, unga ko‘tartirib qo‘ydi, o‘zi bo‘lsa shaharga ketdi.
16 Rut kelganida, qaynanasi: «Nima bo‘ldi*, qizim?» — deb so‘radi. U qaynanasiga Boz u uchun nima qilganini aytib berdi.
17 So‘ngra Rut: «U kishi menga olti o‘lchov arpa berib: “Qaynanangizning oldiga bo‘sh qo‘l bilan qaytmang”,— dedi»,— deb qo‘shib qo‘ydi.
18 Shunda qaynanasi: «Endi, masala hal bo‘lguncha kutib turing, qizim. Ana ko‘rasiz, bu odam ishni bugunoq oxiriga yetkazmaguncha tinchimaydi»,— dedi.
Izohlar
^ So‘zma-so‘z «cho‘ringizni etagingiz bilan yoping».
^ So‘zma-so‘z «xalqimning barcha darvozalari».
^ Ehtimol, olti sexa yoki taxminan 44 l. Ilovaning B14 mavzusiga q.
^ So‘zma-so‘z «Siz kimsiz?»
