Sahroda 35:1-34
35 Yahova Mo‘ab dashtlarida, Iordan bo‘yida+, ya’ni Yerixo yaqinida Musoga shunday deb aytdi:
2 «Isroil o‘g‘illariga buyur, o‘zlariga tekkan merosdan levilarga yashash uchun shaharlarni va ularning atrofidagi yaylovlarni+ berishsin+.
3 Levilar bu shaharlarda yashashadi, yaylovlar esa ularning uy hayvonlari, chorvalari va boshqa hayvonlari uchun xizmat qiladi.
4 Sizlar levilarga beradigan shaharlarning yaylovlari, shahar devori atrofi bo‘ylab 1 000 tirsak* masofani o‘z ichiga olsin.
5 Shahar atrofi bo‘ylab, shahar tashqarisining sharq tomonidan 2 000 tirsak, janub tomonidan 2 000 tirsak, g‘arb tomonidan 2 000 tirsak va shimol tomonidan 2 000 tirsak o‘lchab chiqinglar. Bu yerlar shaharlarning yaylovlari bo‘ladi.
6 Odam o‘ldirgan kishi qochib borishi uchun+, levilarga 6 ta panoh shahar+, bundan tashqari yana 42 ta shahar ajratib beringlar.
7 Ularga jami bo‘lib 48 ta shaharni yaylovlari bilan birga beringlar+.
8 Bu shaharlarni Isroil o‘g‘illarining mulkidan bo‘lib beringlar+. Kattaroq qabiladan ko‘proq, kichikrog‘idan esa kamroq olinglar+. Har bir qabila o‘ziga tekkan merosga yarasha, shaharlaridan ba’zilarini levilarga bersin».
9 Yahova Musoga gapirishda davom etib, dedi:
10 «Isroil o‘g‘illariga bunday deb ayt: “Sizlar Kan’on yurtiga+ kirish uchun Iordan daryosidan o‘tyapsizlar.
11 O‘zlaringiz uchun qulay bo‘lgan shaharlarni tanlanglar. Ular panoh shaharlar sifatida xizmat qilib, atayin odam o‘ldirmagan kishi o‘sha yerga qochib boradi+.
12 Bu shaharlar qon uchun qasos oluvchidan panoh bo‘lib xizmat qiladi+. Shunda qotil jamoa oldida hukm qilinmasidan oldin o‘ldirilmaydi+.
13 Sizlar taqdim etadigan mana shu oltita shahar panoh shaharlar bo‘ladi.
14 Panoh shaharlarning uchtasini Iordanning shu tarafidan+, qolgan uchtasini esa Kan’on yurtidan ajratib beringlar+.
15 Bu oltita shahar Isroil o‘g‘illari, orangizdagi musofirlar+ va kelgindilar uchun panoh shaharlar bo‘lib xizmat qiladi. Atayin odam o‘ldirmagan kishi o‘sha yerga qochib boradi+.
16 Agar bir kishi boshqasini temir asbob bilan urib o‘ldirsa, u qotil hisoblanadi. Qotil albatta o‘ldirilsin+.
17 Bordi-yu, kimdir boshqa odamni tosh bilan urib o‘ldirsa, u qotildir. Qotil albatta o‘ldirilsin.
18 Agar bir kishi boshqasini yog‘och asbob bilan urib o‘ldirsa, u qotil hisoblanadi. Qotil albatta o‘ldirilsin.
19 Qotilni qon uchun qasos oluvchi o‘ldirsin. Uni uchratishi bilanoq o‘ldirsin.
20 Mabodo biron kishi boshqani yomon ko‘rgani dastidan itarib yoki yovuz niyatda* unga biron narsa otib o‘ldirib qo‘ysa+,
21 yo bo‘lmasa, nafratdan musht tushirib o‘ldirsa, musht tushirgan odam albatta o‘ldirilsin. U qotildir. Qotilni qon uchun qasos oluvchi kishi uchratishi bilanoq o‘ldirsin.
22 Bordi-yu, biron kishi boshqani yomon ko‘rgani uchun emas, balki bexosdan itarib yuborsa yoki hech qanday yovuz niyatsiz unga biron narsa otib yuborsa+,
23 yoxud uni ko‘rmasdan tosh otib yuborsa yoki toshni ustiga tushirib yuborsa va u o‘lib qolsa, lekin unga nisbatan hech qanday dushmanligi yoki zarar yetkazish niyati bo‘lmagan bo‘lsa,
24 jamoa keltirilgan bu yo‘l-yo‘riqlarga asoslanib, odam o‘ldirgan kishi bilan qon uchun qasos oluvchi o‘rtasidagi masalani hal qilsin+.
25 Jamoa odam o‘ldirgan kishini qon uchun qasos oluvchining qo‘lidan xalos etib, u qochib borgan panoh shaharga qaytarib yuborsin. U o‘sha yerda, muqaddas moy bilan moylangan oliy ruhoniy vafot etgunga qadar yashasin+.
26 Mabodo odam o‘ldirgan kishi o‘zi qochib borgan panoh shaharning tashqarisiga chiqsa
27 va qon uchun qasos oluvchi kishi panoh shaharning tashqarisida uni ushlab olib o‘ldirsa, u qon to‘kilishida aybdor bo‘lmaydi.
28 Chunki odam o‘ldirgan kishi oliy ruhoniyning vafotigacha panoh shaharda yashashi lozim. Oliy ruhoniyning o‘limidan keyingina, u o‘z yeriga qaytib bora oladi+.
29 Bular — barcha turar joylaringiz bo‘ylab avlodlaringiz osha amal qilishingiz kerak bo‘lgan qonunlar.
30 Odam o‘ldirgan har qanday kishi guvohlarning ko‘rsatmalari bo‘yicha+ qotil sifatida o‘ldirilsin+. Lekin bittagina guvohning ko‘rsatmasi asosida hech bir kishi o‘ldirilmasin.
31 O‘limga loyiq bo‘lgan qotilning hayoti* uchun to‘lov olmanglar. U albatta o‘ldirilsin+.
32 Shuningdek, panoh shaharga qochib borgan, ammo oliy ruhoniyning vafotiga qadar o‘z yeriga qaytib borib yashamoqchi bo‘lgan kishi uchun ham to‘lov olmanglar.
33 Yashayotgan yurtingizni bulg‘amanglar, chunki qon to‘kish yurtni bulg‘aydi+. Qon to‘kilgan yurtni qon to‘kkan odamning qoni bilangina yuvish mumkin+.
34 O‘zingiz yashaydigan yurtni bulg‘amanglar, chunki Men ham shu yurtda yashayman. Men Yahova, Isroil xalqi orasida yashayman”+».
Izohlar
^ Bir tirsak=44,5 sm. Ilovaning B14 mavzusiga q.
^ So‘zma-so‘z «pistirmadan».
^ Yoki «joni».
