Yeremiyo 7:1-34
7 Yahova Yeremiyoga shunday so‘zlar bilan murojaat qildi:
2 «Yahovaning uyi darvozasi oldida turib, quyidagi xabarni e’lon qil: “Ey, Yahovaga sajda qilish uchun bu darvozalardan kiradigan Yahudo xalqi, barchangiz Yahovaning so‘zlarini tinglang.
3 Isroil Xudosi, Qo‘shinlar Sarvari Yahova demoqda: “Yo‘llaringizni o‘zgartirib, ishlaringizni tuzatinglar. Shunda bu yerda yashashingizga ruxsat beraman+.
4 Yolg‘on so‘zlarga ishonib: “Bu* Yahovaning ma’badi! Yahovaning ma’badi! Yahovaning ma’badi!” — deb aytmanglar+.
5 Agar yo‘llaringizni o‘zgartirib, ishlaringizni tuzatsangiz, da’volashayotgan kishilar o‘rtasida adolat o‘rnatsangiz+,
6 musofirlar, yetimlar va bevalarni ezmasangiz+, bu yerda begunoh kishining qonini to‘kmasangiz hamda o‘zingizga zarar keltirib boshqa xudolar orqasidan ergashmasangiz+,
7 bu yerda — ota-bobolaringiz doim yashashi uchun Men bergan yurtda istiqomat qilishingizga ruxsat beraman”».
8 «Ammo sizlar yolg‘on so‘zlarga ishonyapsizlar+. Buning umuman foydasi yo‘q.
9 Sizlar o‘g‘rilik+, qotillik va zino qilasizlar, yolg‘on qasam ichasizlar+, Baalga qurbonliklar keltirib+, o‘zingiz bilmagan xudolarga ergashasizlar.
10 Shuncha jirkanch ishlar qila turib, Mening ismim bilan atalgan uy oldiga kelib: “Biz qutqarilamiz”,— deysizlarmi?
11 Mening nomim bilan atalgan bu uy sizlar uchun qaroqchilar uyasi bo‘lib qoldimi?+ Nimalar qilayotganingizni ko‘rib turibman»,— demoqda Yahova.
12 «“Endi Shilo‘dagi muqaddas maskanimga+, ismim uchun tanlagan birinchi joyga borib+, xalqim Isroilning qilgan yomonliklari uchun u yerni qanday ahvolga solganimni ko‘rib qo‘yinglar+.
13 Ammo sizlar bu barcha yovuz ishlarni qilishdan to‘xtamadingiz,— demoqda Yahova. — Hatto qayta-qayta sizlarga gapirgan bo‘lsam-da, quloq solmadingiz+. Men sizlarni chaqiraverdim, ammo javob bermadingiz+.
14 Shuning uchun, Shilo‘ni ne ko‘yga solgan bo‘lsam+, sizlar umid bog‘lagan+ va Mening ismim bilan atalgan uyni+, Men sizlarga va ota-bobolaringizga bergan joyni ham shu ko‘yga solaman.
15 Men barcha birodarlaringizni, Efrayimning hamma avlodlarini haydaganimday, sizlarni ham ko‘z oldimdan haydayman”+.
16 Sen esa, bu xalq uchun ibodat qilma. Ular uchun faryod ko‘tarma, yalinib-yolvorma+. Men seni eshitmayman+.
17 Yahudo shaharlarida va Quddus ko‘chalarida ular nimalar qilayotganini ko‘rmayapsanmi?
18 Ularning o‘g‘illari o‘tin yig‘ishadi, otalari olov yoqishadi, xotinlari esa Samo Qirolichasiga* atab qurbonlik kulchalarini pishirish uchun xamir qorishadi+. Ular boshqa xudolarga ichimlik nazrini quyib, Meni ranjitishadi+.
19 “Ular Menga zarar yetkazishyaptimi? O‘zlariga zarar yetkazishyapti-ku! O‘zlarini sharmanda qilishyapti-ku!” — demoqda Yahova+.
20 Oliy Hukmdor Yahova shunday demoqda: “Men qahr-g‘azabimni bu joyga+, odamlar-u hayvonlarga, daladagi daraxtlarga va yerning hosiliga sochaman. Qahrim olov kabi yonadi, u so‘nmaydi”+.
21 Isroil Tangrisi, Qo‘shinlar Sarvari Yahova shunday demoqda: “Boringlar, boshqa qurbonliklaringizga butunlay kuydiriladigan qurbonliklaringizni qo‘shib go‘shtini ham o‘zlaringiz yeyaveringlar+.
22 Zero, Men ota-bobolaringizni Misr yurtidan olib chiqgan kunim, ularga butunlay kuydiriladigan qurbonliklar va boshqa qurbonliklar haqida hech narsa aytmagandim, hech qanday buyruq bermagandim+.
23 Aksincha, Men ularga shunday deb buyruq bergandim: “Menga quloq solinglar, shunda Men sizlarning Xudoyingiz, sizlar esa Mening xalqim bo‘lasizlar+. O‘zingizga yaxshi bo‘lishi uchun, Men amr etgan yo‘llardan yurishingiz kerak”+.
24 Ammo ular Menga quloq solmadilar, Meni tinglash uchun quloq tutmadilar+. Aksincha, o‘zlari bilgancha yo‘l tutdilar, o‘jarlik bilan yovuz yuraklariga ergashdilar+. Ular olg‘a yurish o‘rniga, ortga ketdilar.
25 Ota-bobolaringiz Misr yurtidan chiqgan kundan to bugungacha ahvol o‘zgargani yo‘q+. Men xizmatchilarim bo‘lmish payg‘ambarlarni har kuni, qayta-qayta oldingizga yuborib turdim+.
26 Lekin bu xalq Menga quloq solishdan bosh tortdi, Menga quloq tutmadi+. Ular o‘jarlik qilib, ota-bobolaridan ham o‘tib tushdilar!
27 Sen bu barcha so‘zlarni ularga aytsang ham+, ular senga quloq solishmaydi. Ularni chaqirsang ham, ular senga javob berishmaydi.
28 Sen ularga shunday deb ayt: “Bu xalq o‘z Xudosi Yahovaga quloq solmadi va Uning tarbiyasini olishni istamadi. Sadoqat degan narsa qolmadi, ularning orasida hatto tilga olinmaydigan bo‘ldi”+.
29 Uzun sochlaringni qirqib tashla*. Yalang tepaliklarda marsiya ayt. Zero, Yahova bu avlodni rad etdi. Uning g‘azabini keltirgani uchun, ularni tark etadi.
30 “Chunki Yahudo xalqi Mening nazarimda yomon ishlar qildi,— demoqda Yahova. — Ular Mening ismim bilan atalgan uyni bulg‘ash uchun u yerga jirkanch butlarini o‘rnatishdi+.
31 Ular o‘g‘il-u qizlarini olovda kuydirish uchun+ Hinnom o‘g‘lining vodiysidagi*+ Tofatda tepaliklar barpo etishdi. Ular Men buyurmagan, hatto hech qachon xayolimga ham kelmagan ishni qilishdi”+.
32 “Mana, shunday kunlar kelyaptiki,— demoqda Yahova, — bu joy ortiq Tofat yoki Hinnom o‘g‘lining vodiysi deb emas, Qirg‘in vodiysi deb ataladi. Ular Tofat to‘lmaguncha u yerda o‘liklarni ko‘mishadi+.
33 Bu odamlarning jasadlari osmondagi qushlarga va yer yuzidagi hayvonlarga yem bo‘ladi. Ularni haydaydigan hech kim bo‘lmaydi+.
34 Men Yahudo shaharlarida va Quddus ko‘chalarida shodiyona va xursandchilik hayqiriqlariga chek qo‘yaman, u yerda kelin-kuyovning ovozi eshitilmaydi+. Chunki bu yurt xarobaga aylanadi”»+.
Izohlar
^ So‘zma-so‘z «Bularning bari». Bu oyatda ma’bad binolarining majmui nazarda tutilgan.
^ Murtad isroilliklar sig‘ingan ma’budaning nomi. Ehtimol, hosildorlik ma’budasi bo‘lgan.
^ Sion yoki Quddusga qarata aytilgan.
^ Lug‘atdagi «jahannam» so‘ziga q.
