Ha, Iso yer yuzida bo‘lganida «Yo‘lboshchi bo‘lmish Masih», ya’ni «dunyo qutqaruvchisi» bo‘ladigan kishi haqidagi ko‘plab bashoratlar unda amalga oshgan. (Doniyor 9:25; 1 Yuhanno 4:14) Hatto Iso o‘lganidan keyin ham Masihga oid bashoratlar unda amalga oshishda davom etgan. (Zabur 110:1; Havoriylar 2:34–36)

•  «Masih» so‘zi nimani anglatadi?

•  Masihga oid bashoratlar boshqa kishilarda ham amalga oshgan bo‘lishi mumkinmi?

•  Masih hali kelmagan degan da’vo to‘g‘rimi?

•  Muqaddas Kitobda Masihga oid qancha bashorat bor?

•  Isoda amalga oshgan Masihga oid ayrim bashoratlar

 Ibroniycha «mashiax», yunoncha «xristos» so‘zlari «moylangan» degani. Demak, Iso Masih iborasi Iso «moylanganini» anglatadi.

 Muqaddas Kitob yozilgan vaqtlarda insonga o‘zgacha vakolat berilganda uni moylashgan, ya’ni boshiga moy quyishgan. (Levilar 8:12; 1 Shohlar 16:13) Alloh Isoni Masih qilib tayinlab, unga katta hokimiyat ato etgan. (Havoriylar 2:36) Biroq Xudo Isoni moy bilan emas, muqaddas ruh bilan moylagan. (Matto 3:16)

 Yo‘q. Barmoq izlari faqat bitta insonga tegishli bo‘lganidek, Muqaddas Kitobdagi bashoratlar ham birgina Masihga ishora qiladi. Muqaddas Kitobda shunday ogohlantiruvchi so‘zlar bor: «Ko‘pgina soxta Masihlar va soxta payg‘ambarlar paydo bo‘lib, iloji bo‘lsa hatto tanlanganlarni ham yo‘ldan ozdirish niyatida buyuk alomatlar-u mo‘jizalar ko‘rsatishadi». (Matto 24:24)

 Yo‘q. Muqaddas Kitobda Masih Isroil shohi Dovudning zurriyotidan kelib chiqishi bashorat qilingan edi. (Zabur 89:3, 4) Lekin milodiy 70-yili rimliklar Quddusni bosib olganida yahudiylarning Dovudgacha bo‘lgan nasabnomasi yo‘q qilingan bo‘lishi mumkin a. O‘sha vaqtdan buyon hech kim o‘zining shoh Dovud naslidan kelib chiqqanini isbotlay olmaydi. Isoning davrida esa bu nasabnomalar hali bor edi. Shu sababli hatto dushmanlari ham Isoning Dovud zurriyotidan kelib chiqqanini inkor eta olishmagan. (Matto 22:41–46)

 Muqaddas Kitobdagi Masihga oid bashoratlarning sonini aniqlash imkonsiz. Hatto qaysidir parcha Masihga oid ekani aniq bo‘lib ko‘rinsa-da, bu parchada qancha bashorat borligi to‘g‘risida turli xil fikrlar mavjud bo‘lishi mumkin. Masalan, Ishayo 53:2–7 oyatlarida Masihga tegishli bashoratning bir nechta tafsiloti yozilgan. Ayrimlar butun bu parchani bitta bashorat deb hisoblasa, boshqalar undagi har bir tafsilotni alohida bashorat deb bilishi mumkin.