Mazwifhi: Ṱhanzi dza Yehova a vha tendi uri madokotela a nga vha thusa nga nṱhani ha zwenezwo a vha ṱoḓi thuso ya zwa ngalafho.

 Ngoho: Ri ita zwi re maanḓani ashu u itela uri riṋe na miṱa yashu ri wane ngalafho ya khwine vhukuma. Musi ri tshi lwala, ri ya kha madokotela a re na vhukoni ha zwa ngalafho na ane a ita muaro a sa shumisi malofha. Ri dzhiela nṱha mvelaphanḓa dzo itwaho kha sia ḽa zwa ngalafho. Zwi re zwone ndi uri muaro une wa itwa hu sa shumiswi malofha wo itelwaho u thusa vhalwadze vha Dziṱhanzi, u khou vhuyedza vhathu vhoṱhe. Mashangoni manzhi, vhalwadze vha nga iledza khombo dzine dza ḓiswa nga u shelwa malofha, dzi ngaho malwadze a re malofhani, u tshinywa ha maswole a muvhili na vhukhakhi vhune ha itwa nga vhathu.

Mazwifhi: Ṱhanzi dza Yehova vha tenda uri lutendo lu fhodza malwadze ane muthu a vha nao.

 Ngoho: A ri fhodzi nga lutendo.

Mazwifhi: Ngalafho ine muthu a sa shelwe malofha i a ḓura vhukuma.

 Ngoho: Ngalafho dzine muthu a sa shelwe malofha dzo tshipa vhukuma. a

Mazwifhi: Ṱhanzi nnzhi, u katela na vhana, vha a fa ṅwaha muṅwe na muṅwe nga nṱhani ha u hana u shelwa malofha.

 Ngoho: Enea ndi mazwifhi madala-dala. Tshifhinga tshoṱhe vhaari vha ita miaro yo serekanaho i ngaho ya mbilu, ya muṱoḓo na u dzheniswa muṅwe muraḓo muthu a songo shelwa malofha. b Vhalwadze, u katela na vhana, kanzhi vha fhola nga u ṱavhanya u fhira vhe vha shelwa malofha. c Kha vhuimo naho vhu vhufhio, a hu na muthu ane a nga khwaṱhisedza fhungo ḽa uri mulwadze o fa nge a hana u shelwa malofha kana u ḓo tshila arali a shelwa malofha.

 Ndi nga nṱhani ha mafhungo a vhurereli, hu si a zwa ngalafho. Thestamennde ya Kale na Ntswa dzi laedza nga hu pfalaho uri ri iledze malofha. (Genesi 9:4; Levitiko 17:10; Doiteronomio 12:23; Mishumo 15:28, 29) Zwiṅwe hafhu, Mudzimu u dzhia malofha a tshi imela vhutshilo. (Levitiko 17:14) Nga zwenezwo ri iledza malofha nga nṱhani ha uri ri thetshelesa Mudzimu nahone ri a mu ṱhonifha samusi e Muṋei wa vhutshilo.

 Tshifhingani tsho fhiraho, madokotela vho vha tshi dzhia uri ngalafho i sa shumisi malofha a yo ngo luga, ndi u vhulaha, fhedzi zwenezwo zwo shanduka miṅwahani ya zwenezwino. Sa tsumbo, nga 2004, thero yo gandiswaho kha magazini wa zwa ngalafho yo amba uri “maitele manzhi a zwa ngalafho ane a shumiswa kha vhalwadze vhanzhi vha Ṱhanzi dza Yehova a ḓo fheleledza e one maitele o ḓoweleaho miṅwahani i ḓaho.” d Thero ya magazini une wa pfi Heart, Lung and Circulation yo amba zwi tevhelaho nga 2010, yo ri “‘muaro u sa shumisi malofha’ ndi maitele ane a fanela u shumiswa kha vhathu vhoṱhe, hu si kha Ṱhanzi dza Yehova fhedzi.”

 Madokotela manzhi a shumisa maitele ane a sa ṱoḓe uri muthu a shelwe malofha musi a tshi ita miaro yo serekanaho. Eneo maitele a shumiswa mashangoni ane a khou ita mvelaphanḓa nahone vhalwadze vhanzhi vha si Ṱhanzi dza Yehova vha ṱoḓa u alafhiwa nga yeneyo nḓila.