Ṱhanzi dza Yehova a vha pembeli ḓuvha ḽa mabebo ngauri ri tenda uri zwimima zwo raloho a zwi takadzi Mudzimu. Naho Bivhili i sa tou thivhela ngaho livhaho u pembelela ḓuvha ḽa mabebo, i a ri thusa u humbula nga ha zwithu zwine zwa itea kha zwenezwo zwiitea na mavhonele a Mudzimu nga hazwo. Ṱhogomelani masia maṋa a zwenezwo zwiitea na nḓila ine zwa tshimbidzana ngayo na maitele a Bivhili.

1.   U pembelela ḓuvha ḽa mabebo zwi tshimbidzana na vhuhedeni. U ya nga bugu Funk & Wagnalls Standard Dictionary of Folklore, Mythology, na Legend, vhathu vha ita eneo mabembela vhe na lutendo lwa uri nga ḓuvha ḽa mabebo, “mimuya mivhi na ṱhuṱhuwedzo mmbi zwi na tshibuli tsha u vutshela vhane vha khou pembelela ḓuvha ḽa mabebo” na uri “u vha hone ha dzikhonani na mibulo ya u tamela mashudu zwi ḓo tsireledza muṋe wa ḓuvha ḽa mabebo.” Bugu The Lore of Birthdays i amba uri zwifhingani zwa kale, “ḓuvha ḽa mabebo ḽo vha ḽi ndeme u itela u bvumba vhumatshelo” u ya nga “ngudo dza mimuya dza dziṋaledzi.” Yeneyo bugu i dovha ya engedza uri “makhanḓela a ḓuvha ḽa mabebo, u ya nga pfunzothendwa dza u tenda zwi siho, zwi tshimbidzana na madambi a itaho uri muthu a vhe na mashudu.”

    Naho zwo ralo, Bivhili i dzivhisa u shumisa madambi, u tungula, vhungome kana “zwithu zwi fanaho na zwenezwi.” (Doiteronomio 18:14; Vhagalata 5:19-21) Ngoho ndi ya uri tsho itaho uri Mudzimu a sande muḓi wa kale wa Babele ndi nge vhathu vha ita zwa vhungome ha dziṋaledzi, zwine zwa tshimbidzana na u tungula. (Yesaya 47:11-15) Ṱhanzi dza Yehova a dzuli vho farakanea nga u guda midzi ya mikhuvha yoṱhe; fhedzi musi Maṅwalo a tshi ri ṋea tsevho malugana na zwenezwo zwithu ri a i dzhiela nṱha.

2.   Vhakriste vha u thoma a vho ngo pembelela ḓuvha ḽa mabebo. The World Book Encyclopedia i amba uri “vho dzhia u pembelela ḓuvha ḽa mabebo ḽa muthu naho e nnyi sa mukhuvha wa vhuhedeni.” Bivhili i sumbedza uri vhaapostola na vhaṅwe vhe vha funzwa nga Yesu vho tevhedza maitele ane Vhakriste vhoṱhe vha tea u a tevhedza.​—2 Vhathesalonika 3:6.

3.   Tshihumbudzo tshithihi fhedzi tshine Vhakriste vha fanela u tshi humbula ndi tsha lufu lwa Yesu, hu si ḓuvha ḽawe ḽa mabebo. (Luke 22:17-​20) Zwenezwo a zwi tei u mangadza ngauri Bivhilli i ri “ḓuvha ḽa u fa hawe ḽi fhira ḽa u bebwa hawe.” (Muhuweleli 7:1) Musi Yesu e tsini na u fa kha ḽifhasi, o vha o ḓiitela dzina ḽavhuḓi na Mudzimu, zwenezwo zwo ita uri ḓuvha ḽa lufu lwawe ḽi vhe ḽa ndeme u fhira ḽa u bebwa hawe.​—Vhaheberu 1:4.

4.   Bivhili a i athu vhuya ya amba nga ha mushumeli wa Mudzimu we a pembelela ḓuvha ḽa mabebo. A si uri mafhungo a hone o tou hangwa u ṅwalwa, ngauri Bivhili i bula u pembelwa ha ḓuvha ḽa mabebo huvhili ha vhathu vha sa shumeli Mudzimu. Naho zwo ralo, kha zwenezwo zwiitea zwivhili ho itea zwithu zwi si zwavhuḓi.​—Genesi 40:20-22; Marko 6:21-29.

 U fana na vhabebi vhoṱhe vhavhuḓi, vhabebi vha Dziṱhanzi vha sumbedza vhana vhavho lufuno ṅwaha woṱhe, zwenezwo zwi katela u vha ṋea zwifhiwa na u fara mabembela a takadzaho. Vha lingedza u edzisa tsumbo yavhuḓi ya Mudzimu, ane a ṋea vhana vhawe zwifhiwa zwavhuḓi. (Mateo 7:11) Vhana vha re na vhabebi vha Dziṱhanzi a vha pfi vho dzimiwa zwiṅwe zwithu, samusi mibulo yavho i re afho fhasi i tshi zwi sumbedza:

•   “Zwi a takadza u ṋewa tshifhiwa u songo tshi lavhelela.”​—Tammy, a re na miṅwaha ya 12.

•   “Naho ndi sa ṋewi zwifhiwa nga ḓuvha ḽanga ḽa mabebo, vhabebi vhanga vha nthengela zwifhiwa nga zwiṅwe zwifhinga. Ndi a zwi takalela ngauri ndi vha ndi songo zwi lavhelela.”​—Gregory, a re na miṅwaha ya 11.

•   “Naa ni vhona u nga u fhedza mimunithi ya fumi, zwikhekhe, na luimbo ndi tshimima? Ni fanela u ndalela arali ni tshi ṱoḓa u vhona uri tshimima tsha vhukuma tsho tou ita hani!”​—Eric, a re na miṅwaha ya 6.