Ṱhanzi dza Yehova vha a ṱhonifha mivhuso na zwiga zwa lushaka. Ri a tenda uri vhaṅwe vhathu vha nga nanga u losha fulaga na u imba luimbo lwa lushaka.

 Fhedzi Ṱhanzi dza Yehova vha nanga u sa ṱanganela kha honohu vhuṱambo ngauri vha tenda uri zwenezwi zwi lwisana na zwine Bivhili ya funza. Ri a livhuwa musi vhaṅwe vha tshi ṱhonifha zwine ra tenda khazwo samusi na riṋe ri tshi ṱhonifha phetho dzine vha dzi dzhia.

Kha ino thero ri ḓo fhindula hedzi mbudziso:

•  Ndi vhulivhisi vhufhio vhu re Bivhilini vhune ra vha ri tshi khou vhu tevhedza?

•  Ṱhanzi dza Yehova vha ita mini arali hu na mulayo une wa ri vha tea u shela mulenzhe kha honoho vhuṱambo?

•  Naa Ṱhanzi dza Yehova vha a lingedza u dzhia sia kha zwa politiki?

 Vhulivhisi vhuvhili vhu tevhelaho vhune ha vha Bivhilini ndi hone vhune ha kwama nḓila ine ra dzhia ngayo phetho:

•   Mudzimu ndi ene e eṱhe ane ra tea u mu gwadamela. Bivhili i ri: “U tea u rabela Yehova Mudzimu wau, u shumele ene fhedzi.” (Luka 4:8) Kanzhi luimbo lwa lushaka lu katela maipfi ane a sumbedza uri muthu u khou fhulufhedzisa u tikedza ḽeneḽo shango u fhira zwithu zwoṱhe nga u fhulufhedzea. Ngauralo Ṱhanzi dza Yehova vha nga si kone u ṱanganela kha honoho vhuṱambo.

   Zwiṅwe hafhu, Ṱhanzi dza Yehova vha pfesesa uri u losha fulaga zwi fana na u i gwadamela kana u gwadamela Midzimu ya zwifanyiso, zwine Bivhili ya si tendelane nazwo. (1 Vhakorinta 10:14) Vhaṅwe vhaḓivhazwakale vha a tenda uri fulaga ya lushaka ndi tshiga tsha vhurabeli. Muḓivhazwakale ane a pfi Vho Carlton J. H. Hayes vho ṅwala u ri: “Arali lushaka lu vhurereli, tshiga tshihulwane tshe vha vha vha tshi ḓo tshi shumisa u itela u rabela, ndi fulaga.” a Muṅwali ane a pfi Vho Daniel P. Mannix vho amba zwi tevhelaho nga ha Vhakriste vha u thoma, vho ri: “Vhakriste vho hana u . . . ṋekedza zwiṱhavhelo kha mudzimu wa muvhusi wa [Vharoma] zwine ṋamusi zwa fana na u hana u losha fulaga.” b

  Naho Ṱhanzi dza Yehova vha sa loshi fulaga, a vha i kherukanyi kana u i fhisa kana u sumbedza u sa i ṱhonifha kana u sa ṱhonifha zwiṅwe zwiga zwa lushaka.

•   Vhathu vhoṱhe vha a lingana phanḓa ha Mudzimu. (Mishumo 10:34, 35) Bivhili i amba uri Mudzimu “ndi ene o itaho uri kha muthu muthihi hu bve tshaka dzoṱhe.” (Mishumo 17:26) Ndi ngazwo Ṱhanzi dza Yehova vha tshi tenda uri zwi ḓo vha zwo khakhea u hulisa tshiṅwe tshigwada tsha vhathu kana luṅwe lushaka u fhira luṅwe. Ri hulisa vhathu vhoṱhe hu sa londwi uri vha bva ngafhi kana vha dzula gai.—1 Petro 2:17.

 Ṱhanzi dza Yehova a vha lwi na muvhuso. Vha tenda uri muvhuso ndi tshipiḓa tsha “ndugiselelo ya Mudzimu” ye a i tendela uri i vhe hone. (Vharoma 13:1-7) Ri tenda uri Vhakriste vha fanela u thetshelesa vhavhusi.—Luka 20:25.

 Hu pfi mini arali milayo ya shango i tshi lwisana na milayo ya Mudzimu? Nga tshiṅwe tshifhinga, zwi a konadzea u ita khumbelo kha muvhuso uri wonoyo mulayo u shandulwe. c Fhedzi arali zwi sa konadzei u shandula wonoyo mulayo, Ṱhanzi dza Yehova vha khetha “u thetshelesa Mudzimu ane a vha muvhusi nṱhani ha vhathu.”—Mishumo 5:29.

 Hai. Ṱhanzi dza Yehova a vha dzhii sia kha zwa politiki. Musi ri sa ḓidzhenisi kha u losha fulaga kana u imba luimbo lwa lushaka, a si ngauri ri vha ri tshi khou ṱoḓa u lwela tshanduko kha maitele a politiki. Nṱhani hazwo, ri vha ri tshi khou tevhela kana u tenda vhulivhisi ha Bivhili malugana na honoho vhuṱambo.