Ro vha ri tshi ḓi shumisa Bivhili u bva kale sa yone thikho ya zwine ra zwi tenda, nga zwenezwo ro ita tshanduko kha zwine ra zwi tenda musi nḓila ine ra pfesesa ngayo Maṅwalo i tshi bvela phanḓa u khwiniswa. a

 Tshanduko dzo raloho dzi tendelana na zwo ambiwaho Bivhilini kha Mirero 4:​18: “Hone gondo ḽa vhavhuya ḽi nga tshedza u naka, tshine tsha ḓi tshena tshi tshi ya, ḽa vhuya ḽa tsha.” Samusi ri tshi kona u vhona nḓila ine fhethu ha vha ngayo nga zwiṱuku nga zwiṱuku musi ḓuvha ḽi tshi khou ṱavha, Mudzimu u ita uri ri kone u pfesesa ngoho nga hae nga zwiṱuku nga zwiṱuku, nga tshifhinga tshe a tshi vhea. (1 Petro 1:​10-​12) Samusi Bivhili yo zwi amba hu tshee nga phanḓa, o ṱavhanyisa enea maitele kha “tshifhinga tsha vhufhelo.”​—Daniele 12:4.

 Dzenedzi tshanduko dzine dza itwa kha nḓila ine ra pfesesa ngayo zwithu a dzo ngo tea u ri mangadza kana u ri vhilaedzisa. Na vhagwadameli vha Mudzimu vha kale vho vha na mavhonele o khakheaho na zwilavhelelwa zwo khakheaho nahone zwo ṱoḓea uri vha shandule mavhonele avho.

•   Mushe o ḓiṋekedzela u vha muvhofhololi wa lushaka lwa Isiraele hu tshee ho sala miṅwaha ya 40 uri tshifhinga tsha Mudzimu tshi swike.​—Mishumo 7:​23-​25, 30, 35.

•   Vhaapostola a vho ngo pfesesa vhuporofita he ha amba hu tshee nga phanḓa nga ha lufu lwa Messia na mvuwo yawe.​—Yesaya 53:​8-​12; Mateo 16:21-​23.

•   Vhaṅwe Vhakriste vha u thoma vho vha na mavhonele o khakheaho nga ha tshifhinga tsha u ḓa ha “ḓuvha ḽa Yehova.”​—2 Vhathesalonika 2:​1, 2.

 Nga murahu Mudzimu o ita uri vha pfesese nga nḓila yo teaho nahone ri rabelela uri u ḓo bvela phanḓa a tshi ita nga u ralo na kha riṋe.​—Yakobo 1:5.