Ee, kanzhi Ṱhanzi dza Yehova vha a thusa musi wa khombo. Ri thusa Dziṱhanzi na vhathu vha si Dziṱhanzi u tendelana na nyeletshedzo i re kha Vhagalata 6:10: “Kha ri itele vhathu vhoṱhe zwivhuya, fhedzi zwihuluhulu vhane vha vha na lutendo lu fanaho na lwashu.” Ri dovha ra lingedza u thusa siani ḽa maḓipfele na ḽa muya samusi vhathu vho welwaho nga khombo vha tshi ṱoḓa zwenezwo zwithu nga maṱo matswuku.—2 Vhakorinta 1:3, 4.

 Nga murahu ha khombo, vhahulwane vha zwivhidzo zwo welwaho nga khombo vha lingedza u kwamana na vhathu vhoṱhe vhane vha ṱanganela zwivhidzoni zwo welwaho nga khombo u itela u vhona arali vho tsireledzea na u vha ṋea thuso ine vha nga i ṱoḓa. Nga murahu ha zwenezwo vhahulwane vha vhigela ofisi ya davhi ya Ṱhanzi dza Yehova ṱhoḓisiso ye vha i ita na thuso ye vha i ṋea.

 Arali zwivhidzo zwa henefho tsini zwi sa koni u ṋea thuso i ṱoḓeaho, Tshigwada tshi Langaho tsha Ṱhanzi dza Yehova tshi dzudzanya u ṋea zwine zwa shayea. Hezwi zwi fana na zwe zwa itwa nga Vhakriste vha u thoma tshifhingani tsha musi ho wa nḓala. (1 Vhakorinta 16:1-4) Ofisi ya henefho ya davhi i vhumba Komiti dza U Phalala musi wa Khombo u itela u dzudzanya na u livhisa mushumo wa u phalala. Ṱhanzi dzine dza bva huṅwe fhethu vha kumedza tshifhinga na thundu dzavho u itela u thusa.—Mirero 17:17.

 Iṅwe miṋeelo ine ya rumelwa ofisini dza davhi dza Ṱhanzi dza Yehova i shumiselwa u phalala vhathu vho welwaho nga khombo. (Mishumo 11:27-30; 2 Vhakorinta 8:13-15) Samusi wonoyu mushumo u tshi itwa nga vhomaḓilonga vha sa holelwi, tshelede yoṱhe i shumiselwa mushumo wa u phalala, hu si wa zwa vhulanguli. Ri shumisa nga vhuronwane miṋeelo yoṱhe.—2 Vhakorinta 8:20.