Hai. Ṱhanzi dza Yehova vha a tenda uri zwithu zwoṱhe zwo sikwa nga Mudzimu. Fhedzi a ri tendelani na muhumbulo wa uri zwithu zwoṱhe zwo sikwa nga maḓuvha a rathi a vhukuma. Ndi ngani? Nga ṅwambo wa uri mihumbulo ya vhathu vhane vha amba uri zwithu zwo sikwa nga maḓuvha a rathi a vhukuma, i lwisana na Bivhili. Ṱhogomelani tsumbo mbili dzi tevhelaho:

1.   Vhulapfu ha maḓuvha a rathi a tsiko. Vhaṅwe vhane vha tikedza pfunzo ya tsiko vha amba uri maḓuvha a rathi a tsiko o vha e awara dza vhukuma dza 24. Fhedzi ipfi “ḓuvha” ḽo bulwaho Bivhilini ḽi nga amba tshifhinga tshilapfu.​—Genesi 2:4; Psalme ya 90:4.

2.   Miṅwaha ya ḽifhasi. Vhaṅwe vhane vha tikedza pfunzo ya tsiko vha funza uri ḽifhasi ḽi na miṅwaha ya zwigidi zwi si gathi. Naho zwo ralo, u ya nga Bivhili, ḽifhasi na fhethu hoṱhe zwo vha zwi hone nga phanḓa ha maḓuvha a rathi a tsiko. (Genesi 1:1) Nga nṱhani ha zwenezwo, Ṱhanzi dza Yehova a vha lwisani na vhuṱanzi vhu pfalaho ha ṱhoḓisiso ya saintsi vhune ha sumbedza uri ḽifhasi ḽi nga vha ḽi na miṅwaha ya dzibilioni nga vhukale.

 Naho Ṱhanzi dza Yehova ri tshi tenda kha tsiko, a ri lwisani na saintsi. Ri tenda uri saintsi ya vhukuma na Bivhili zwi a tendelana.