Ee. Ṱhanzi dza Yehova vha tenda uri Bivhili yoṱhe yo ‘hevhedzwa nga Mudzimu nahone i a vhuyedza.’ (2 Timotheo 3:​16) Zwenezwo zwi katela Thestamennde ya Kale na Thestamennde Ntswa, samusi dzi tshi anzela u vhidzwa nga u ralo. Nga ho ḓoweleaho, Ṱhanzi dza Yehova vha vhidza zwenezwi zwipiḓa zwa Bivhili Maṅwalo a Luheberu na Maṅwalo a Tshikriste a Lugerika. Nga yeneyi nḓila, ri iledza u ṋea muhumbulo wa uri zwiṅwe zwipiḓa zwa Bivhili zwo fhelelwa nga tshifhinga kana a zwi shumi.

 Muapostola Paulo wa Mukriste o hevhedzelwa uri a ṅwale zwi tevhelaho: “Zwithu zwoṱhe zwo ṅwalwaho kale zwo ṅwalelwa u ri funza.” (Vharoma 15:4) Nga zwenezwo, hu na mafhungo a ndeme ane a nga ri vhuyedza kha Maṅwalo a Luheberu. Maṅwe a hone ndi ḓivhazwakale i thusaho na nyeletshedzo i shumaho.

•   Ḓivhazwakale i thusaho. Maṅwalo a Luheberu a na rekhodo yo dodombedzwaho ya tsiko na nḓila ye vhathu vha dzhena ngayo kha tshivhi. Arali ro vha ri si na eneo mafhungo, ro vha ri sa ḓo kona u fhindula mbudziso dzi tevhelaho: Ri bva ngafhi? Ndi ngani vhathu vha tshi fa? (Genesi 2:7, 17) Zwiṅwe hafhu, Maṅwalo a Luheberu a na rekhodo ya nḓila ye Yehova Mudzimu a shumisana ngayo na vhathu vhe vha wana madakalo nahone vha sedzana na khaedu dzi fanaho na dzaṋu.​—Yakobo 5:​17.

•   Nyeletshedzo i shumaho. Bugu dza Bivhili dzine dza vha Mirero na Muhuweleli, dzine dza vha tshipiḓa tsha Maṅwalo a Luheberu, dzi na vhuṱali vhu sa fheliwi nga tshifhinga ha matshilele. Dzi ṋea nyeletshedzo malugana na nḓila ya u ḓiphina nga vhutshilo ha muṱa (Mirero 15:17), u vha na mavhonele o linganyiselwaho a mushumo (Mirero 10:4; Muhuweleli 4:6), na nḓila ine vhaswa vha nga vhuyelwa ngayo nga vhuswa havho (Muhuweleli 11:9–​12:1).

 Zwiṅwe hafhu, ri nga vhuyelwa nga u guda Mulayo wa Mushe wo ṅwalwaho kha Torah (bugu ṱhanu dza u thoma dza Bivhili). Naho wonoyo Mulayo u si khombe-khombe kha Vhakriste, u na maitele a ndeme ane a nga ri thusa uri ri tshile vhutshilo vhu takadzaho.​—Levitiko 19:18; Doiteronomio 6:5-7.