Watch Tower Bible and Tract Society of Pennsylvania ndi ndangulo i si ya zwa mabindu yo thomiwaho nga 1884 nga fhasi ha milayo ya Commonwealth of Pennsylvania, U.S.A. I shumiswa nga Ṱhanzi dza Yehova u itela u tikedza mushumo wavho wa shango ḽoṱhe, une wa katela u gandisa Bivhili na khandiso dzo thewaho Bivhilini.

 U ya nga ḽiṅwalwa ḽayo, ndivho dza ndangulo dzi katela zwithu zwa “vhurereli, u funza na u thusa vhathu,“ nahone zwihuluhulu “u huwelela na u funza vhathu evangeli ya Muvhuso wa Mudzimu u re nga fhasi ha Kristo Yesu.” Muthu u tou rambiwa u vha muraḓo wa yeneyi ndangulo nahone a zwi yi nga tshelede ine a i ṋeela. Miraḓo ya ndangulo na vhalivhisi vhayo vha thusa Tshigwada tshi Langaho tsha Ṱhanzi dza Yehova.

 Nga nnḓa ha Watch Tower Bible and Tract Society of Pennsylvania, Ṱhanzi dza Yehova vha shumisa madzangano manzhi-manzhi a lwa mulayo mashangoni o fhamba-fhambanaho. Maṅwe a enea madzangano a shumisa dzina ḽi ngaho “Watch Tower,” “Watchtower,” kana ṱhalutshedzelo ya ḽiṅwe ḽa enea madzina.

 Enea madzangano o fhamba-fhambanaho a lwa mulayo o ita uri ri kone u khunyeledza zwithu zwinzhi u bva tshee a thomiwa, zwithu zwi ngaho:

•   U ṅwala na u gandisa. Ro no gandisa Bivhili dza milioni dza 220 na khandiso dzo thewaho Bivhilini dza bilioni dza 40, nga nyambo dzi fhiraho 700. Nga website ya jw.org, vhathu vha kona u vhala Bivhili kha Inthanethe mahala nga nyambo dzi fhiraho 120 nahone vha wana phindulo dza mbudziso dza Bivhili dzi ngaho, “Muvhuso wa Mudzimu ndi mini?”

•   Pfunzo. Ri fara zwikolo zwo fhamba-fhambanaho zwine zwa funza Bivhili. Sa tsumbo, u bva nga 1943, Ṱhanzi dza Yehova vha fhiraho 8 000 vho vhuyelwa nga vhugudisi ha vhuimo ha nṱha vhune ha ṋewa Tshikoloni tsha Bivhili tsha Watchtower tsha Gilead, nḓila ine vha gudiswa ngayo i ita uri vha kone u vha vharumiwa kana vha khwaṱhise mushumo washu shangoni ḽoṱhe. Vhege iṅwe na iṅwe, vhathu vha dzimilioni, u katela na vha si Dziṱhanzi, vha funzwa miṱanganoni ine ya farwa zwivhidzoni zwashu. Ri dovha ra fara kilasi dza u gudisa u vhala na u ṅwala nahone ro gandisa bugupfarwa nga nyambo dza 110 dzine dza funza vhathu u vhala na u ṅwala.

•   U Thusa Vhathu. Ro gandisa mafhungo ane a thusa vhathu vho welwaho nga khombo​—dzi nga kha ḓi vha khombo dzo bveledzwaho nga vhathu, dzi ngaho bulayo ḽa lushaka ḽa 1994 ḽe ḽa itea ngei Rwanda, kana khombo dza mupo dzi ngaho mudzinginyo we wa itea nga 2010 ngei Haiti.

 Naho ho itwa zwithu zwinzhi nga dzenedzi ndangulo na madzangano a lwa mulayo, mushumo washu a u ḓitiki nga naho ḽifhio ḽao. Mukriste muṅwe na muṅwe u na vhuḓifhinduleli ha u ḓadzisa ndaela ye a ṋewa nga Mudzimu ya u huwelela na u funza mafhungo maḓifha. (Mateo 24:14; 28:19, 20) Ri tenda uri Mudzimu u khou tikedza mushumo washu nahone u ḓo bvela phanḓa a tshi u ita uri u “aluwe.”—1 Vhakorinta 3:6, 7.