Tshifhingani tsha zwenezwino, Venezuela ho vha na thaidzo ya ikonomi na dzikhakhathi u fhira naho hu lini. Muṅwe wahashu ane a pfi Edgar u ri: “Nga miṅwaha i si gathi, vhathu vho xelelwa nga tshelede na thundu ye vha vha vhe nayo zwa tou nga ro pfulutshela kha ḽiṅwe shango naho ro vha ri tshi kha ḓi vha henefha.”

 Ndi mini zwo thusaho Vho Edgar uri vha kone u konḓelela? Vha ri: “Nṋe na mufumakadzi wanga Carmen ro humbula nga ha tsumbo ya vharumiwa vhe vha pfulutshela mashangoni ane a shaya nahone vha ḓigudisa u tshila vhe si na zwiṅwe zwithu. Zwenezwi zwo ri ṱuṱuwedza uri ri lwele u tshila ri si na zwinzhi na uri ri lingedze zwithu zwiswa, zwi ngaho sa u ḓilimela zwiḽiwa.”

 Fhedzi Vho Edgar na Vho Carmen vho ita zwi fhiraho zwenezwo. Vho khuthadza vhatendi ngavho u katela na vhe vha vha vho tsikeledzea. (1 Vhathesalonika 5:11) Vho Edgar vho ri: “A ro ngo sokou vha khuthadza, ro lingedza u vha ṱuṱuwedza uri vha wane dakalo ḽine ḽa ḓiswa nga u thusa vhane vha shaya.”—Mishumo 20:35.

 Musi dziedzi ḽa COVID-19 ḽi tshi thoma, Argenis o ita phetho ya u huwelela kha mashaka awe. Nahone vhaṅwe vhavho vho tenda u guda nae Bivhili nga founu.

 Argenis o vha a tshi khou ṱoḓa uri mashaka awe vhe vha vha vha si na Inthanethe vha ṱalele buthano ḽa dzingu ḽa 2020. Muṅwe wahashu we a vha a tshi dzula tsini na mashaka a Argenis o vha ṋea mbekanyamushumo yo rekhodiwaho. Mashaka a Argenis vha hadzima TV khulu na zwipikara. Musi vha sa athu thoma u ṱalela yeneyo mbekanyamushumo Argenis o vha founela a rabela navho. Nga nṱhani ha vhuḓidini he Argenis a vhu ita, vhathu vhaṋa kha mashaka awe na vhaṅwe vha 15 vho kona u ṱalela yeneyo mbekanyamushumo.

 Vho Jairo na mufumakadzi wavho Vho Johana ndi vhone vhe vhoṱhe vha re na goloi tshivhidzoni tsha havho, nga zwenezwo vha i shumisa u itela u thusa vhaṅwe. Thaidzo ine vha sedzana nayo ndi ya uri zwi a konḓa u wana peṱirolo Venezuela. Vho Jairo vha ri: “Ri fhedza awara nnzhi-nnzhi ro lindela u shela peṱirolo, nga zwiṅwe zwifhinga ri lindela na vhusiku hoṱhe.”

 Vho Jairo vho vhona uri u shumisa goloi yavho u itela u thusa vhaṅwe zwi a vhuyedza. Vha ri: “Musi ri tshi isela vhahashu zwithu zwine vha zwi ṱoḓa, zwi a ri takadza u vhona vha tshi livhuwa Yehova nṱhani ha u livhuwa riṋe, ngauri ndi ene ane a ṋea vhathu vhawe zwoṱhe zwine zwi ṱoḓa.”—2 Vhakorinta 9:11, 14.

 Musi Norianni e na miṅwaha ya 28, o vha a tshi vhona u nga u muṱukusa kha u thusa vhaṅwe. Fhedzi a vhala 1 Timotheo 4:12 ine ya ri: “U songo tenda u nyadziwa ngauri u muswa. Nṱhani hazwo, ivha tsumbo yavhuḓi kha vha fhulufhedzeaho.”

 Yeneyo ndimana yo thusa Norianni uri a fhedze tshifhinga tsho engedzeaho na vhaaluwa vha tshivhidzoni tshawe, a tshi khou vha thusa u ṅwala marifhi na uri a vha rambe musi a tshi ya u fara pfunzo dza Bivhili. O ita na u vha founela na u vha founela na u vha rumela milaedza i ṱuṱuwedzaho. Norianni o ri: “Yehova o ntsumbedza uri hu na zwinzhi zwine nda nga zwi ita u itela u thusa vhaṅwe.”

 Vhahashu vha ngei Venezuela vha khou sedzana na thaidzo nnzhi kha zwenezwi zwifhinga zwi konḓaho. Naho zwo ralo, vha bvela phanḓa vha tshi fhisea vhuḓinḓani nahone vha a ‘khuthadzana vhukuma.’—Vhakolosa 4:11; 2 Timotheo 4:2.