1 Petro 1:1-25
1 Nṋe Petro, muapostola wa Yesu Kristo, ndi ṅwalela vhadzulapo vha tshifhinganyana vho balanganaho na ḽa Ponto, Galata, Kapadokia, Asia, na Bithinia, vho nangwaho
2 u ya nga u ḓivha hu tshee nga phanḓa ha Mudzimu Khotsi, na u itwa vhakhethwa nga muya, nga ndivho ya uri vha vhe vha thetshelesaho na u shashiwa nga malofha a Yesu Kristo, ndi ri:
Vhuthu vhuhulu na mulalo zwi ande kha inwi.
3 Nga hu rendwe Mudzimu na Khotsi a Murena washu Yesu Kristo, ngauri nga u khathutshela hawe huhulu o ita uri ri bebwe nga huswa kha fulufhelo ḽi tshilaho nga u vuswa ha Yesu Kristo vhafuni,
4 uri ri wane ifa ḽi sa tshinyali, ḽi si na tshika na ḽi sa puti. No vhetshelwa ḽone ṱaḓulu,
5 inwi no tsireledzwaho nga maanḓa a Mudzimu nga nṱhani ha lutendo u itela u tshidzwa ho lugiselwaho u itela u dzumbululwa tshifhingani tsha vhufhelo.
6 Nga nṱhani ha zwenezwi no takala zwihulu, naho lwa tshifhinganyana ni tshi nga vha no tsikeledzwa nga milingo yo fhamba-fhambanaho,
7 uri lutendo lwaṋu lune lwa khou lingwa, lune lwa vha lwa ndeme vhukuma u fhira musuku une wa tshinyala hu sa lwondwi uri lwo lingwa nga mulilo, lu wanwe lu tshiitisi tsha u renda na u ṋea vhugala na u hulisa musi hu tshi dzumbululwa Yesu Kristo.
8 Naho ni songo vhuya na mu vhona, ni a mu funa. Naho ni songo mu lavhelesa zwino, ni na lutendo khae nahone ni khou pembela zwihulu nga dakalo ḽihulu ḽi sa ṱalusei,
9 samusi ni tshi khou swikelela tshipikwa tsha lutendo lwaṋu, tshine tsha vha u tshidzwa haṋu.
10 Malugana na honoho u tshidzwa, vhaporofita vhe vha porofita nga ha vhuthu vhuhulu he ha vha vhu tshi ḓo ḓa kha inwi, vho vhudzisesa na u ṱoḓisisa nga vhuronwane.
11 Vho bvela phanḓa vha tshi ṱoḓisisa uri ndi tshifhinga tshifhio kana ndi zwiimo zwa mufuda-ḓe, zwe muya we wa vha u khavho wa vha u tshi khou zwi sumbedza malugana na Kristo, musi u tshi khou ṱanziela hu tshee nga phanḓa nga ha u tambudzwa ha Kristo na nga ha vhugala he ha vha vhu tshi ḓo ḓa nga murahu.
12 Vho dzumbululelwa uri vho vha vha sa khou shumela vhone vhaṋe, fhedzi vho vha vha tshi khou shumela inwi, malugana na zwe na ḓivhadzwa nga vhe vha huwelela mafhungo maḓifha kha inwi vhe na muya mukhethwa we wa rumelwa u tshi bva ṱaḓulu. Vharuṅwa vha a tama uri vha pfesese zwenezwo zwithu.
13 Huno lugisani mihumbulo yaṋu u itela mushumo u konḓaho, dzulani no dzivhuluwa nga ho fhelelaho; vheani fulufhelo ḽaṋu kha vhuthu vhuhulu vhune na ḓo sumbedzwa hone musi Yesu Kristo a tshi dzumbululwa.
14 Sa vhana vha thetshelesaho, litshani u ṱuṱuwedzwa nga nyemulo dze na vha ni nadzo musi ni sa athu ḓivha,
15 fhedzi u tendelana na Mukhethwa we a ni vhidza, ivhani vhakhethwa inwi vhaṋe kha vhuḓifari haṋu hoṱhe,
16 ngauri ho ṅwalwa ha pfi: “Ni tea u vha vhakhethwa, ngauri nṋe ndi mukhethwa.”
17 Zwiṅwe hafhu, arali ni tshi vhidzelela Khotsi ane a haṱula a si na tshiṱalula u ya nga mushumo wa muṅwe na muṅwe, dzulani ni tshi ofha musi ni tshi kha ḓi vha vhadzulapo vha tshifhinganyana.
18 Ngauri ni a zwi ḓivha zwauri a si nga zwithu zwi tshinyalaho, zwi ngaho tsimbi-tseṱha na musuku, zwe zwa ita uri ni tshidzwe kha matshilele aṋu a mahandana e na a wana kha vhokhotsi aṋu.
19 Fhedzi ho vha hu nga malofha a thengo khulu a Kristo, ane a nga a ngwana i sa solei i si na tshilavhi.
20 I ngoho, o dzula a tshi ḓivhiwa musi shango ḽi sa athu sikwa, fhedzi o dzumbululwa vhufheloni ha zwifhinga hu tshi itelwa inwi.
21 Ni tenda Mudzimu nga nṱhani hawe, ene we a mu vusa vhafuni a mu ṋea vhugala; uri lutendo lwaṋu na fulufhelo zwi vhe kha Mudzimu.
22 Samusi no kunakisa vhutshilo haṋu nga u thetshelesa ngoho ye ya ita uri hu vhe na lufuno lwa vhurathu na vhukomana lu si na muhoyo, funanani nga maanḓa zwi tshi bva mbiluni.
23 Ngauri no bebwa nga huswa, hu si nga mbeu i sinaho, fhedzi no bebwa nga mbeu i sa sini, nga ipfi ḽa Mudzimu a tshilaho wa lini na lini.
24 Ngauri “ṋama yoṱhe i fana na hatsi, na vhugala hayo hoṱhe vhu fana na luvha ḽa ḓaka; hatsi vhu a oma, nahone luvha ḽi a fhufhurea,
25 fhedzi maambiwa a Yehova a dzula e hone lini na lini.” Nahone enea “maambiwa” ndi mafhungo maḓifha e na ḓivhadzwa one.
